ପ୍ରଚଣ୍ଡ ଥଣ୍ଡା ସମ୍ଭାବନା ୬ଜିଲାରେ

ସତ୍ୟଶିଖା (ଭୁବନେଶ୍ୱର) ୨୯/୧୨/୨୦୨୦ : ରାଜ୍ୟର ଅଧିକାଂଶ ଜିଲାରେ ଶୀତଲହରୀ ଜାରି ରହିଛି । ୭ଟି ସ୍ଥାନରେ ପାରଦ ୧୦ ଡ଼ିଗ୍ରୀ ତଳେ ଥିବାବେଳେ ଫୁଲବାଣୀରେ ସର୍ବନିମ୍ନ ତାପମାତ୍ରା ସବୁଠୁ କମ ୫.୫ଡ଼ିଗ୍ରୀ ସେଲସିୟସ ରେକର୍ଡ଼ କରାଯାଇଛି । କ୍ରମାଗତ ଭାବେ ଗତ ସପ୍ତାହରୁ ଅଧିକ କାଳ ଧରି ଫୁଲବାଣୀର ପାରଦ ୪ରୁ ୬ଡ଼ିଗ୍ରୀ ମଧ୍ୟରେ ରହୁଥିବାବେଳେ ସେଠାରେ ହାଡ଼ଥରା ଜାଡ଼ ସହିତ ସ୍ବାଭାବିକ ଜୀବନଯାତ୍ରା ପ୍ରଭାବିତ ହୋଇଛି । ଅନୁଗୋଳ, ବାରିପଦା, ଝାରସୁଗୁଡ଼ା, ଭବାନିପାଟଣା, କୋରାପୁଟ, ଦାରିଙ୍ଗବାଡ଼ି ଆଦି ସ୍ଥାନରେ ପାରଦ ୧୦ଡ଼ିଗ୍ରୀ ତଳେ ରହିଛି । ରାଜ୍ୟର ୨୮ଟି ପାଣିପାଗ ଷ୍ଟେସନ ମଧ୍ୟରୁ ୨୬ଟି ଅଞ୍ଚଳରେ ସର୍ବନିମ୍ନ ତାପମାତ୍ରା ୧୫ଡ଼ିଗ୍ରୀ ତଳେ ରହିଛି । ପାଣିପାଗ ବିଭାଗ ସୂତ୍ରରୁ ମିଳିଥିବା ସୂଚନା ଅନୁସାରେ ଝାରସୁଗୁଡ଼ା, ଅନୁଗୋଳ,ସୁନ୍ଦରଗଡ଼, ଦେବଗଡ଼, ବୌଦ୍ଧ ଓ କନ୍ଧମାଳ ଆଦି ଜିଲାରେ ଅାସନ୍ତା ୩୦ରୁ ୨ତାରିଖ ପର୍ଯ୍ୟନ୍ତ ଶୀତ ଲହରୀ ଲାଗିରହିବ । ଏସବୁ ଜିଲାକୁ ୟେଲୋ ୱାର୍ନିଂ ଜାରି ହୋଇଛି । ରାଜ୍ୟର ବିଭିନ୍ନ ଜିଲାରେ ଆସନ୍ତା ୪୮ଘଣ୍ଟା ମଧ୍ୟରେ ୨ରୁ ୩ଡ଼ିଗ୍ରୀ ପର୍ଯ୍ୟନ୍ତ ତାପମାତ୍ରା କମିବା ସହିତ ୩୧ ତାରିଖ ପରେ ତାପମାତ୍ରା ସ୍ବାଭାବିକଠାରୁ ୩ରୁ ୫ଡ଼ିଗ୍ରୀ ପର୍ଯ୍ୟନ୍ତ ହ୍ରାସ ପାଇବ ବୋଲି ସତର୍କ ସୂଚନା ଦିଆଯାଇଛି । ପ୍ରଚଣ୍ଡ ଶୀତଲହରୀ ଲାଗିରହିଥିବା ଜିଲାଗୁଡ଼ିକରେ ବାସଗୃହ ନଥିବା ଲୋକମାନଙ୍କୁ ନିରାପଦ ଆଶ୍ରୟସ୍ଥଳ ଵିଶେ​ଷ କରି ରାତ୍ରି ଆଶ୍ରୟ ସ୍ଥଳ, ବିଦ୍ୟାଳୟ କୋଠା, କମ୍ୟୁନିଟି ବିଲ୍ଡ଼ିଂକୁ ସ୍ଥାନାନ୍ତର ପାଇଁ ଜିଲାପାଳମାନଙ୍କୁ ସ୍ଵତନ୍ତ୍ର ରିଲିଫ କମିଶନର ନିର୍ଦେଶ ଦେଇଛନ୍ତି ।ପାଣିପାଗ ବିଶେଷଜ୍ଞ ସୁରେନ୍ଦ୍ରନଥ ପଶୁପାଳକ କହିଛନ୍ତି ଯେ ଆସନ୍ତାକାଲିଠାରୁ ୪ଦିନ ପର୍ଯ୍ୟନ୍ତ ରାଜ୍ୟରେ ସର୍ବନିମ୍ନ ତାପମାତ୍ରା ଅପରିବର୍ତ୍ତିତ ରହିବ । ତେଣୁ ଆସନ୍ତା ନୂଆବର୍ଷରୁ ଥଣ୍ଡା ଜାରି ରହିବ । ୨ତାରିଖଠାରୁ ତାପମାତ୍ରା ବୃଦ୍ଧି ସହିତ ଥଣ୍ଡା କମିବାର ସମ୍ଭାବନା ରହିଛି । ଆସନ୍ତାକାଲିଠାରୁ ଗୁରୁଚାପ ବଳୟ ଉତ୍ତର ଛତିଶଗଡ଼ ଓ ଦକ୍ଷିଣ ଝାଡ଼ଖଣ୍ଡ ଉପରେ ରହିବ । ଏହା ଉତ୍ତରରୁ ଥଣ୍ଡା ପବନ ପ୍ରବାହକୁ ପ୍ରତିହତ କରିବାର ସମ୍ଭାବନା ଥିବାରୁ ୨ତାରିଖରୁ ୩ତାରିଖ ଭିତରେ ବିଭିନ୍ନ ସ୍ଥାନରେ ସର୍ବନିମ୍ନ ତାପମାତ୍ରା ୩ଡ଼ିଗ୍ରୀ ବଢ଼ିବାର ସମ୍ଭାବନା ରହିଛି । ଭୁବନେଶ୍ୱର ଓ କଟକରେ ପାରଦ ଯଥାକ୍ରମେ ୧୨ ଓ ୧୩.୨ଡ଼ିଗ୍ରୀ ଥିବାବେଳେ ଆସନ୍ତା ୪ଦିନ ପର୍ଯ୍ୟନ୍ତ ଏଥିରେ ସାମାନ୍ୟ ପରିବର୍ତ୍ତନ ହୋଇପାରେ ।