ସତ୍ୟଶିଖା(ଭୁବନେଶ୍ୱର) ୨୦.୧୨.୨୦୨୧: ଆଜି ବଡ଼ମ୍ବା ଗସ୍ତରେ ଆସି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମହାନଦୀର ଦୀର୍ଘତମ ଗୋପୀନାଥପୁର-ବୈଦେଶ୍ବର ସେତୁକୁ ଲୋକାର୍ପଣ କରିଛନ୍ତି। ମୁଖ୍ୟମନ୍ତ୍ରୀ ବଡ଼ମ୍ବା ବ୍ଲକ୍ର ଗୋପୀନାଥପୁରଠାରେ ଏହି ସେତୁର ଶିଳାନ୍ୟାସ କରିଥିଲେ। ଗୋପୀନାଥପୁରରେ ପହଞ୍ଚି ଏହି ସେତୁକୁ ଲୋକାର୍ପଣ କରିବା ପରେ ଓ ଜନସାଧାରଣଙ୍କୁ ସମ୍ବୋଧିତ କରିଛନ୍ତି। ବଡ଼ମ୍ବା ବିଧାୟକ ଦେବୀପ୍ରସାଦ ମିଶ୍ରଙ୍କ ଅଧ୍ୟକ୍ଷତାରେ ଗୋପୀନାଥପୁରଠାରେ ଆୟୋଜିତ କାର୍ଯ୍ୟକ୍ରମରେ ବାଙ୍କୀ ବିଧାୟକ ଦେବୀରଞ୍ଜନ ତ୍ରିପାଠୀ ମଧ୍ୟ ଉପସ୍ଥିତ ରହିଥିଲେ।
ସୂଚନାଯୋଗ୍ୟ, ୩.୧୩୯ କିଲୋମିଟର ଲମ୍ବର ଏହି ସେତୁକୁ ୨୦୧୪, ଫେବ୍ରୁଆରି ୨୮ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶିଳାନ୍ୟାସ କରିଥିଲେ। ୧୩୨ କୋଟି ୬୨ ଲକ୍ଷ ଟଙ୍କା ବ୍ୟୟରେ ନିର୍ମିତ ଏହି ସେତୁ ବାଙ୍କୀର ବୈଦେଶ୍ବରଠାରୁ ବଡ଼ମ୍ବାର ଗୋପୀନାଥପୁରକୁ ଯୋଡ଼ିବ। ଏହି ସେତୁ ମଧ୍ୟଯୁଗୀୟ ସ୍ଥାପତ୍ୟକଳାର ନିଦର୍ଶନ ଅଷ୍ଟମ ଶତାବ୍ଦୀର ପ୍ରସିଦ୍ଧ ଶୈବପୀଠ ସିଂହନାଥ ପୀଠକୁ ବି ଯୋଡ଼ିବ। ମହାନଦୀ ଗର୍ଭରେ ଥିବା ଏହି ମନ୍ଦିର ଏଏସ୍ଆଇ ଅଧୀନରେ ରହିଛି। ପୂର୍ବରୁ ଡଙ୍ଗାରେ ପୀଠକୁ ଯିବାକୁ ପଡୁଥିବା ବେଳେ ଏବେ ଏହି ସେତୁରୁ ୨୩୬ ମିଟରର ଏକ ‘ଟି’ ବ୍ରିଜ୍ ପୀଠକୁ ଯୋଡୁଛି।
ଏଭଳି ‘ଟି’ ସେତୁ ଏଯାଏ ରାଜ୍ୟରେ କୌଣସି ସ୍ଥାନରେ ନିର୍ମାଣ ହୋଇ ନଥିବା ଜଣାପଡିଛି। ଏହି ସେତୁ ନିକଟରେ ଅର୍ଥାତ୍ ବଡ଼ମ୍ବାର ଗୋପୀନାଥପୁରରେ ପର୍ଯ୍ୟଟକ ସୁବିଧା କେନ୍ଦ୍ର ପାଇଁ ଜିଲ୍ଲା ପ୍ରଶାସନ ଦୁଇ ଏକର ୩୬ ଡିସିମିଲ ସ୍ଥାନ ଯୋଗାଇ ଦେଇଥିବା ବେଳେ ଏହାର ଡିଜାଇନ୍ ମଧ୍ୟ ପ୍ରସ୍ତୁତ ସରିଛି। ଅନ୍ୟପଟେ ହଂସନାଥ ପୀଠକୁ ସଂଯୋଗ କରୁ୍ଥିବା ‘ଟି’ ସେତୁ ୨୩୬ ମିଟର ପାଇଁ ମଧ୍ୟ ପାହାଚ ଓ ବିଭିନ୍ନ କାର୍ଯ୍ୟର ଡିଜାଇନ୍ ପ୍ରସ୍ତୁତ କରାଯାଇଛି।
