ସତ୍ୟଶିଖା,(ବ୍ରହ୍ମପୁର) ୨୦.୦୩ .୨୦୨୧ : ଶହ ଶହ ବର୍ଷର ପରମ୍ପରାରେ ବ୍ୟତିକ୍ରମ ଦେଖିବାକୁ ମିଳିଛି । ବ୍ରହ୍ମପୁରର ପ୍ରସିଦ୍ଧ ମା’ ବୁଢୀ ଠାକୁରାଣୀ ଯାତ୍ରା ପାଇଁ ଶୁଭଖୁଣ୍ଟି ସ୍ଥାପନକୁ ସ୍ଥଗିତ ରଖିଛନ୍ତି ଯାତ୍ରା ପରିଚାଳକ । ଯାତ୍ରା ବନ୍ଦ ପାଇଁ ନିଷ୍ପତ୍ତି ନେଇଛନ୍ତି । କୋଭିଡ୍ କଟକଣା ମଧ୍ୟରେ ଯାତ୍ରା ଆୟୋଜନ କରିବାକୁ ଜିଲ୍ଲା ପ୍ରଶାସନ ପରାମର୍ଶ ଦେଇଥିଲେ । ୭ ଦିନ ମଧ୍ୟରେ ଯାତ୍ରା ଆୟୋଜନ କରିବାକୁ ଜିଲ୍ଲା ପ୍ରଶାସନ କହିଥିଲେ । ଯାତ୍ରା ଆୟୋଜକ ୨୧ ଦିନ ଯାତ୍ରା ପାଇଁ ମାଗିଥିଲେ । ୨୧ ଦିନରୁ କମ୍ ହେଲେ ମା’ଙ୍କ ବିଧି ବିଧାନ ହୋଇପାରିବ ନାହିଁ ବୋଲି ଯାତ୍ରା ପରିଚାଳକ ଯୁକ୍ତି ଉପସ୍ଥାପନ କରିଥିଲେ ।
ଜିଲ୍ଲା ପ୍ରଶାସନ ଓ ଯାତ୍ରା ପରିଚାଳକ ନିଜ ନିଜ ଜିଦ୍ ରେ ଅଟଳ ରହି ଶୁଭଖୁଣ୍ଟି ସ୍ଥାପନକୁ ସ୍ଥଗିତ ରଖିବା ସହ ଚଳିତ ବର୍ଷ ଯାତ୍ରାକୁ ବନ୍ଦ ରଖିବା ପାଇଁ ନିଷ୍ପତ୍ତି ନେଇଥିବା ଯାତ୍ରା ଆୟୋଜକ କହିଛନ୍ତି । ଯାତ୍ରାରେ ଲକ୍ଷାଧିକ ଭକ୍ତଙ୍କ ସମାଗମ ଦୃଷ୍ଟିରୁ କରୋନା କଟକଣା ମଧ୍ୟରେ କମ୍ ଦିନ ମଧ୍ୟରେ ଯାତ୍ରା ଆୟୋଜନ କରିବାକୁ କୁହାଗଲା । କିନ୍ତୁ ଯାତ୍ରା ଆୟୋଜକ ସୀମିତ ସମୟ ମଧ୍ୟରେ ଯାତ୍ରା ଆୟୋଜନ କରିବାକୁ ସକ୍ଷମ ନଥିବା ଦର୍ଶାଇଛନ୍ତି ବୋଲି ବ୍ରହ୍ମପୁର ମହାନଗର ନିଗମ କମିଶନର ସିଦ୍ଧେଶ୍ବର ବାଳିରାମ ବନ୍ଦୋର୍ କହିଛନ୍ତି ।
ଶୁଭଖୁଣ୍ଟି ସ୍ଥାପନ ହେବ, ଯାତ୍ରା ମଧ୍ୟ ଅନୁଷ୍ଠିତ ହେବ । ଏଥିପାଇଁ ଶ୍ରଦ୍ଧାଳୁଙ୍କ ମନରେ ଆନନ୍ଦ ଓ ଉତ୍ସାହ ଥିଲା । ଜିଲ୍ଲା ପ୍ରଶାସନର ସମୟ ସୀମା ନିଷ୍ପତ୍ତି ସବୁ କିଛି ବିଗାଡି ଦେଲା । ଶୁଭଖୁଣ୍ଟି ସ୍ଥାପନ ହେଲା ନାହିଁ । ଯାତ୍ରା ବନ୍ଦ ପାଇଁ ନିଷ୍ପତ୍ତି ନେବା ଖବର ଶୁଣି ଦୁଃଖ ଅନୁଭବ କରୁଛନ୍ତି ଭକ୍ତ । । ଦୁଇ ବର୍ଷକୁ ଥରେ ମା’ଙ୍କ ଯାତ୍ରା ଅନୁଷ୍ଠିତ ହେବାର ପରମ୍ପରା ରହିଛି । ହେଲେ ପରମ୍ପରାରେ ବିଭ୍ରାଟ ସୃଷ୍ଟି ହେବା ପ୍ରଥମ ଥର ବୋଲି ଭକ୍ତ କହିଛନ୍ତି ।
କୋଭିଡ୍ କଟକଣା ନିୟମ ସାଙ୍ଗକୁ ଯାତ୍ରା ସମୟ ସୀମା ଅବଧି କମ୍ ମିଳିବା କାରଣରୁ ପ୍ରଥମ ଥର ପାଇଁ ପାରମ୍ପରିକ ଯାତ୍ରା ବନ୍ଦ ନିଷ୍ପତ୍ତି ଭକ୍ତଙ୍କ ମନରେ ଆଘାତ ଲାଗିଛି । ଯାତ୍ରା ବନ୍ଦ ପାଇଁ ନିଷ୍ପତ୍ତି ନେଇଥିବା ପରବର୍ତ୍ତୀ ପଦକ୍ଷେପ କଣ ରହୁଛି ତା ଉପରେ ରହିଛି ସମସ୍ତଙ୍କ ନଜର ।
