ଦେଶରେ ସମସ୍ତଙ୍କୁ ମିଳିବ ମାଗଣା କରୋନା ଟିକା । ଘୋଷଣା କଲେ କେନ୍ଦ୍ର ସ୍ୱାସ୍ଥମନ୍ତ୍ରୀ ।

ସତ୍ୟଶିଖା ୦୨/୦୧/୨୦୨୧ : ଭାରତରେ କରୋନା ଟିକାକରଣ ପାଇଁ ଜୋରଦାର ପ୍ରସ୍ତୁତି ଆରମ୍ଭ ହୋଇଛି । ଟିକାକରଣ ବେଳେ ଦେଖାଦେବାକୁ ଥିବା ସମସ୍ୟାର ସମାଧାନ ପାଇଁ ଆଜିଠାରୁ ସାରା ଦେଶରେ ପାକ୍ ପ୍ରସ୍ତୁତି ବା ଡ୍ରାଏ ରନ୍ ଆରମ୍ଭ କରିଛି କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ। ଏଭଳି ଉପଯୁକ୍ତ ସମୟରେ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ହର୍ଷବର୍ଦ୍ଧନ ଏକ ବଡ ଘୋଷଣା କରିଛନ୍ତି । ଡ୍ରାଏ ରନ୍ ର ଶୁଭାରମ୍ଭ କରିବାକୁ ଦିଲ୍ଲୀର ଜିଟିବି ହସ୍ପିଟାଲ ଯାଇଥିବା ବେଳେ  ସେ କହିଛନ୍ତି କି ଦେଶସାରା ପ୍ରତିଟି ଭାରତୀୟଙ୍କୁ କରୋନା ଟିକା ମାଗଣାରେ ଦିଆଯିବ ।ଶୁଭାରମ୍ଭ କରିବା ପରେ ସେ ଯେତେବେଳେ ଜିଟିବି ହସ୍ପିଟାଲରୁ ବାହାରିଥିଲେ ସେତେବେଳେ ଗଣମାଧ୍ୟମ ପ୍ରଶ୍ନର ଉତର ଦେଇ ସେ କହିଥିଲେ କି ‘ଲୋକଙ୍କୁ ଅନୁରୋଧ କରୁଛୁ କି ସେମାନେ ମିଥ୍ୟା ପ୍ରଚାର ଠାରୁ ଦୂରେଇ ରୁହନ୍ତୁ । ଭ୍ୟାକସିନ୍ ର ସୁରକ୍ଷାକୁ ସୁନିଶ୍ଚିତ କରିବା ଆମର ଦାୟିତ୍ୱ ।’ ଏହାସହ ସେ ପୋଲିଓ ଟିକା କଥା ବି ମନେପକାଇ କହିଥିଲେ କି ପୋଲିଓ ଟିକାକାରଣ ବେଳେ ବି ଏଭଳି କିଛି ମିଥ୍ୟା ପ୍ରଚାର କରାଯାଉଥିଲା । ହେଲେ ଟିକାକରଣ ସୁରଖୁରୁରେ ଚାଲିଲା ଓ ଏବେ ଦେଶ ପୋଲିଓମୁକ୍ତ ହୋଇଛି ।ଡ୍ରାଏ ରନ୍ କୁ ନେଇ ଶ୍ରୀ ହର୍ଷବର୍ଦ୍ଧନ କହିଛନ୍ତି କି ପୂର୍ବଥର ୪ ଟି ରାଜ୍ୟରେ ସଫଳତାର ସହ ଡ୍ରାଏ ରନ୍ ହୋଇଛି । ଏହାସହ ଡ୍ରଏ ରନ୍ ବେଳେ ଦେଖା ଦେଇଥିବା ସମସ୍ୟାକୁ ନଜରରେ ରଖି ଏବେ ତାହାର ସୁଧାର ଅଣାଯାଇପାରିଛି । ଏହି ଡ୍ରଏ ରନ୍ ବେଳେ ଟିକାକୁ ଛାଡି ଅନ୍ୟସବୁ ଦିଗ ଉପରେ ଯାଂଚ କରାଯାଉଛି । ଏହାସହ ସ୍ୱାସ୍ଥ୍ୟ ବିଭାଗ ୨ ହଜାରରୁ ଅଧିକ ମାଷ୍ଟର ଟ୍ରେନରଙ୍କୁ ପ୍ରଶିକ୍ଷିତ କରାଯାଇଛି । ଏହାସହ ଜିଲ୍ଲା ଓ ବ୍ଲକ ସ୍ତରରେ ପ୍ରଶିକ୍ଷକଙ୍କୁ ଟ୍ରେନିଂ ଦିଆଯାଇଛି । ଯେଉଁମାନେ କି ଟିକାକରଣ ବେଳେ ଲୋକ ମାନଙ୍କୁ ଟିକାକରଣର ପ୍ରକ୍ରିୟା ଓ ତା ପରବର୍ତ୍ତି ସ୍ତରର ସାବଧାନତା ଉପରେ ଶିକ୍ଷା ଦେବେ ।