ସତ୍ୟଶିଖା(ନୂଆଦିଲ୍ଲୀ) ୦୮/୧୨/୨୦୨୦ : ବିଶ୍ୱର ଉଚ୍ଚତମ ଶୃଙ୍ଗ ମାଉଣ୍ଟ୍ ଏଭରେଷ୍ଟ୍ ବିଷୟରେ କିଏ ବା ନଜାଣେ । ଉଚ୍ଚତାକୁ ନେଇ ଏଭରେଷ୍ଟ୍ ଶୃଙ୍ଗ ସାରା ବିଶ୍ୱରେ ପରିଚିତ । ସଦ୍ୟତମ ରିପୋର୍ଟ ଅନୁଯାୟୀ ଏହାର ଉଚ୍ଚତା ୮୮୪୮.୮୬ ମିଟର ରହିଛି । ମାଉଣ୍ଟ୍ ଏଭରେଷ୍ଟର ନୂଆ ଉଚ୍ଚତା ବିଷୟରେ ସୂଚନା ଦେଇଛନ୍ତି ନେପାଳର ବିଦେଶ ମନ୍ତ୍ରୀ ପ୍ରଦୀପ କୁମାର ଗ୍ୟାଓ୍ବାଲୀ । ସେ ଦେଇଥିବା ସୂଚନା ଅନୁଯାୟୀ ଏଭରେଷ୍ଟ ଶୃଙ୍ଗର ଉଚ୍ଚତା ୦.୮୬ ସେଣ୍ଟିମିଟର ବୃଦ୍ଧି ପାଇଛି ।
ବିଗତ କିଛି ବର୍ଷ ଧରି ଏଭରେଷ୍ଟ୍ ଶୃଙ୍ଗର ସଠିକ୍ ଉଚ୍ଚତା ଜାଣିବାପାଇଁ ପ୍ରୟାସ ଜାରି ରଖିଥିବା ନେପାଳ ମଙ୍ଗଳବାର ଏହାର ନୂଆ ଉଚ୍ଚତା ବିଷୟରେ ବିଧିବଦ୍ଧ ଭାବେ ସୂଚନା ଦେଇଛି । ୨୦୧୫ ମସିହାରେ ନେପାଳରେ ହୋଇଥିବା ଭୟଙ୍କର ଭୂମିକମ୍ପ ପରେ ମାଉଣ୍ଟ୍ ଏଭରେଷ୍ଟର ପ୍ରକୃତ ଉଚ୍ଚତା ବିଷୟରେ ଜାଣିବା ପାଇଁ ପ୍ରୟାସ ଆରମ୍ଭ କରାଯାଇଥିଲା । ତେବେ ୨୦୧୫ ଭୂମିକମ୍ପ ପୂର୍ବରୁ ଏଭରେଷ୍ଟ୍ ଶୃଙ୍ଗର ଉଚ୍ଚତା ୮୮୪୮ ମିଟର ଥିଲା ।
ତେବେ କିଛି ବିଶେଷଜ୍ଞ ଏବଂ ଅଧିକାରୀ ଏଭରେଷ୍ଟ୍ ପର୍ବତକୁ ପୁନଶ୍ଚ ମାପିବା ପାଇଁ ଯୋଜନା କରିଥିଲେ । ଏଥିରେ ନେପାଳ ସରକାର ମଧ୍ୟ ସହଯୋଗ କରିଥିଲେ । ତେବେ ସର୍ବପ୍ରଥମେ ୧୯୫୪ ମସିହାରେ ଏଭରେଷ୍ଟ୍ ଶୃଙ୍ଗର ଉଚ୍ଚତା ମାପ କରାଯାଇଥିଲା । ସେବେ ଠାରୁ ଏଯାଏଁ ଏହାର ଉଚ୍ଚତା ୮୮୪୮ ମିଟର ବୋଲି ରହିଆସିଥିଲା । କିନ୍ତୁ ବର୍ତ୍ତମାନ ଏହାର ନୂଆ ଉଚ୍ଚତା ୮୮୪୮.୬୮ ମିଟର ବୋଲି ଘେଷଣା କରାଯାଇଛି । ଏଭରେଷ୍ଟ୍ ବିଶ୍ୱର ସବୁଠାରୁ ଉଚ୍ଚତମ ଶୃଙ୍ଗ ଭାବେ ଜଣାଯାଏ ।
