ସତ୍ୟଶିଖା ( ନୂଆଦିଲ୍ଲୀ ) ୧୭ .୦୮.୨୦୨୦ : NEET-JEE ପରୀକ୍ଷାକୁ ଗ୍ରୀନ ସିଗନାଲ । ପରୀକ୍ଷା କରିବା ବିରୋଧରେ ଦାଖଲ ହୋଇଥିବା ଆବେଦନକୁ ଖାରଜ କଲେ ସୁପ୍ରିମକୋର୍ଟ । ଏହା ସହିତ ପରୀକ୍ଷା ନେଇ କେନ୍ଦ୍ର ସରକାରଙ୍କ ଯୋଜନାକୁ ଗ୍ରୀନ ସିଗନାଲ ଦେଇଛନ୍ତି ସୁପ୍ରିମକୋର୍ଟ । ଜଷ୍ଟିସ ଅରୁଣ ମିଶ୍ରଙ୍କ ଖଣ୍ଡପୀଠ ମେଡିକାଲ ପ୍ରବେଶିକା ପରୀକ୍ଷା NEET ଏବଂ ଇଞ୍ଜିନିୟରିଂ ପ୍ରବେଶିକା ପରୀକ୍ଷା JEE ମେନ୍ସକୁ ସ୍ଥଗିତ ରଖିବାକୁ ହୋଇଥିବା ଆବେଦନକୁ ଖାରଜ କରିଦେଇଛନ୍ତି । ଏହି ଆବେଦନକୁ ଖାରଜ କରିବା ସହ କୋର୍ଟ ପ୍ରଶ୍ନ କରିଛନ୍ତି ଯେ ଦେଶର ସବୁକିଛି ବନ୍ଦ କରାଯିବା ଉଚିତ କି ? ଏପରି ଗୋଟିଏ ମୂଲ୍ୟବାନ ବର୍ଷକୁ ନଷ୍ଟ କରିବା ଉଚିତ୍ ହେବକି ? କୋଭିଡ -19 ସଂକ୍ରମଣର ବୃଦ୍ଧି ହେତୁ ସେପ୍ଟେମ୍ବରରେ ପ୍ରସ୍ତାବିତ JEE ମେନ୍ସ ଏବଂ NEET UG ପରୀକ୍ଷାକୁ ସ୍ଥଗିତ ରଖିବାକୁ ଏକ ପିଟିଶନରେ ଆବେଦନ କରାଯାଇଥିଲା । ଜଷ୍ଟିସ ଅରୁଣ ମିଶ୍ରଙ୍କ ଖଣ୍ଡପୀଠ ଏହି ମାମଲାର ଶୁଣାଣି କରିଛନ୍ତି । JEE ପରୀକ୍ଷା ପାଇଁ ସେପ୍ଟେମ୍ବର 1 ରୁ ସେପ୍ଟେମ୍ବର 6 ପର୍ଯ୍ୟନ୍ତ ତାରିଖ ଚୂଡାନ୍ତ ହୋଇଛି । ସେହିପରି 13 ସେପ୍ଟେମ୍ବରରେ NEET ପରୀକ୍ଷା ହେବାର ଯୋଜନା ରହିଛି । 11 ଟି ରାଜ୍ୟର ଛାତ୍ର ଏହି ପରୀକ୍ଷା ସ୍ଥଗିତ ରଖିବାକୁ ଅନୁରୋଧ କରି ସୁପ୍ରିମକୋର୍ଟରେ ପିଟିସନ ଦାଖଲ କରିଥିଲେ । କରୋନା ମହାମାରୀକୁ ଦର୍ଶାଇ ଜାତୀୟ ପରୀକ୍ଷା ଏଜେନ୍ସି (ଏନଟିଏ) ର ଜୁଲାଇ 3 ନୋଟିସକୁ ବାତିଲ କରିବାକୁ ଏହି ଆବେଦନ କରାଯାଇଥିଲା ।
ଗତ ମାସରୁ ପରୀକ୍ଷା ସ୍ଥଗିତ ରଖିବାକୁ ଦାବି ହୋଇଆସୁଛି । ଜୁଲାଇ ପ୍ରଥମ ସପ୍ତାହରେ, ସାରା ଦେଶରେ ଛାତ୍ରମାନେ NTA ସହିତ ସୋସିଆଲ ମିଡିଆରେ ପ୍ରଚାର କରିଥିଲେ । ଛାତ୍ରମାନେ ଯୁକ୍ତି କରିଥିଲେ ଯେ ଏଭଳି କଠିନ ସମୟରେ, ଯଦି ଏପରି ପରୀକ୍ଷା କରାଯାଏ ତେବେ ସେମାନଙ୍କର ସ୍ୱାସ୍ଥ୍ୟ ଉପରେ ଖରାପ ପ୍ରଭାବ ପଡ଼ିବ । ଏଥିପାଇଁ କିଏ ଉତ୍ତରଦାୟୀ ରହିବ ବୋଲି ସେମାନେ ପ୍ରଶ୍ନ କରିଥିଲେ ।
ତେବେ NEET, 2020 ପାଇଁ ମୋଟ 15,93,452 ଲକ୍ଷ ପ୍ରାର୍ଥୀ ଆବେଦନ କରିଛନ୍ତି । 2019 ରେ, ପ୍ରଥମ ଥର ପାଇଁ 15 ଲକ୍ଷରୁ ଅଧିକ ପ୍ରାର୍ଥୀ ପରୀକ୍ଷା ପାଇଁ ପଞ୍ଜିକୃତ ହୋଇଥିଲେ । NEET 2020 ପାଇଁ ଜାମ୍ମୁ କାଶ୍ମୀରରୁ ମୋଟ 33,357 ପ୍ରାର୍ଥୀ ଆବେଦନ କରିଛନ୍ତି । ପୂର୍ବରୁ NTA ଏହା ସ୍ପଷ୍ଟ କରିସାରିଛି ଯେ ସାମାଜିକ ଦୂରତା ନିୟମ ଅନୁସରଣ କରି NEET ପରୀକ୍ଷା କରାଯିବ । ତେଣୁ ପରୀକ୍ଷା କେନ୍ଦ୍ର ସଂଖ୍ୟା ଦ୍ୱିଗୁଣିତ ହେଉଛି । ଛାତ୍ରମାନଙ୍କ ସ୍ୱାସ୍ଥ୍ୟକୁ ଦୃଷ୍ଟିରେ ରଖି ଏବଂ କୋଭିଡ୍ 19 ମହାମାରୀର ସମସ୍ତ ପ୍ରୋଟୋକଲ୍ ଅନୁସରଣ କରି ଏହି ପରୀକ୍ଷା ପରିଚାଳନା କରାଯିବ ।
