ସତ୍ୟଶିଖା( ନୂଆଦିଲ୍ଳୀ) ୨୬.୧୧.୨୦୨୧: ଦେଶରେ ପେଟ୍ରୋଲ ଏବଂ ଡିଜେଲର ମୂଲ୍ୟ ବୃଦ୍ଧି ପାଉଥିବା ବେଳେ ବର୍ତ୍ତମାନ ବିଦ୍ୟୁତ୍ ମୂଲ୍ୟରେ ମଧ୍ୟ ବୃଦ୍ଧି ଘଟିପାରେ । ବାସ୍ତବରେ କେନ୍ଦ୍ର ସରକାରଙ୍କ ତରଫରୁ ଦେଶରେ ଏକ ନୂତନ ବିଦ୍ୟୁତ୍ ବିଲ୍ ଡ୍ରାଫ୍ଟ ପ୍ରସ୍ତୁତ କରାଯାଇଛି । ଏହି ମାସରୁ ଆରମ୍ଭ ହେବାକୁ ଥିବା ଶୀତ ଅଧିବେଶନରେ ସରକାର ସଂସଦରେ ଏହି ବିଲ୍ ଆଗତ କରିପାରନ୍ତି ବୋଲି କଳ୍ପନାଜଳ୍ପନା କରାଯାଉଛି । ଏହି ଆଇନ ଲାଗୁ ହେବା ପରେ ସାରା ଦେଶରେ କୋଟି କୋଟି ଲୋକଙ୍କ ପକେଟ ଉପରେ ସିଧାସଳଖ ପ୍ରଭାବ ପଡ଼ିବ ।
ବାସ୍ତବରେ ଶସ୍ତା ବିଦ୍ୟୁତ ଯୋଗାଣ ପାଇଁ କେନ୍ଦ୍ର ସରକାର ସବସିଡି ପ୍ରଦାନ କରୁଛନ୍ତି । ସରକାର ବର୍ତ୍ତମାନ ଏହି ସବସିଡି ବନ୍ଦ କରିବାକୁ ଯାଉଛନ୍ତି । ଏହା ପରେ ପାୱାର କମ୍ପାନୀଗୁଡିକ ଗ୍ରାହକଙ୍କଠାରୁ ସମ୍ପୂର୍ଣ୍ଣ ଚାର୍ଜ ଆଦାୟ କରିବା ଆରମ୍ଭ କରିବେ । ଏହି ବିଲ୍ ପାରିତ ହେବା ପରେ କୌଣସି ରାଜ୍ୟ ସରକାର ମାଗଣାରେ ବିଦ୍ୟୁତ୍ ଯୋଗାଇ ପାରିବେ ନାହିଁ । ଏହା ମଧ୍ୟ ହୋଇପାରେ ଯେ କେନ୍ଦ୍ର ସରକାର ଏଲପିଜି ସବସିଡି ପରି ଗ୍ରାହକଙ୍କ ଆକାଉଣ୍ଟକୁ ସିଧାସଳଖ ଟଙ୍କା ଟ୍ରାନ୍ସଫର କରିବ । ନୂତନ ବିଦ୍ୟୁତ୍ ଆଇନ ଲାଗୁ ହେବା ପରେ ପେଟ୍ରୋଲ ଭଳି ବିଦ୍ୟୁତର ମୂଲ୍ୟ ମଧ୍ୟ ଶୀଘ୍ର ବଢ଼ିପାରେ । କାରଣ ଇନପୁଟ୍ ମୂଲ୍ୟ ଆଧାରରେ ଗ୍ରାହକଙ୍କଠାରୁ ବିଲ୍ ସଂଗ୍ରହ କରିବାକୁ ପାୱାର୍ କମ୍ପାନୀଗୁଡିକ ମୁକ୍ତ ହେବେ । କହିରଖୁଛୁ ଯେ ବର୍ତ୍ତମାନ ଗ୍ରାହକଙ୍କ ଠାରୁ ଚାର୍ଜ ହୋଇଥିବା ବିଲ୍ ତୁଳନାରେ ବିଦ୍ୟୁତ୍ କମ୍ପାନୀଗୁଡିକର ଉତ୍ପାଦନ ମୂଲ୍ୟ ୟୁନିଟ୍ ପିଛା ୦.୪୭ ଟଙ୍କା ଅଧିକ । ସରକାର ସବସିଡି ଦେଇ କମ୍ପାନୀଗୁଡିକର ଏହି କ୍ଷତି ପୂରଣ କରନ୍ତି । ଆଜିକାଲି ବିଦ୍ୟୁତ୍ ବିତରଣ କମ୍ପାନୀଗୁଡିକ ବହୁ କ୍ଷତିରେ ଚାଲିଛନ୍ତି । ବର୍ତ୍ତମାନ କମ୍ପାନୀଗୁଡିକରେ ୫୦ ହଜାର କୋଟିରୁ ଅଧିକ ଟଙ୍କା କ୍ଷତି ହୋଇଛି । ଏହା ସହିତ କମ୍ପାନୀଗୁଡିକ ଡିସକମ୍ ଉପରେ ୯୫ ହଜାର କୋଟି ଋଣ କରିଛନ୍ତି ।
