ସତ୍ୟଶିଖା(ଭୁବନେଶ୍ୱର) ୦୭ .୧୨.୨୦୨୧: ସମଗ୍ର ବିଶ୍ୱରେ ଏବେ ଓମିକ୍ରନ ଆତଙ୍କ ଜାରି ରହିଛି । ଏହିକ୍ରମରେ ଭୁବନେଶ୍ୱରରେ ବିଦେଶ ଫେରନ୍ତାଙ୍କ ଉପରେ ତୀକ୍ଷ୍ଣ ନଜର ରଖିବାକୁ ଭୁବନେଶ୍ୱର ମହାନଗର ନିଗମ (ବିଏମ୍ସି) ପକ୍ଷରୁ ନିର୍ଦ୍ଦେଶନାମା ଜାରି ହୋଇଛି । ରାଜ୍ୟ ସ୍ୱାସ୍ଥ୍ୟ ବିଭାଗ ପକ୍ଷରୁ ଏନେଇ ସ୍ୱତନ୍ତ୍ର ଗାଇଡ୍ଲାଇନ୍ ଜାରି ହୋଇଥିବାବେଳେ ଏଯାବତ୍ ଭୁବନେଶ୍ୱରକୁ ୮୦ ଜଣ ପ୍ରବାସୀ ଫେରିଛନ୍ତି । ବିଏମ୍ସି ପକ୍ଷରୁ ସମସ୍ତ ବିଦେଶ ଫେରନ୍ତାଙ୍କ ସହ ଯୋଗାଯୋଗ କରାଯାଉଥିବାବେଳେ ଜୋନ୍ ସ୍ତରରେ ଏହାର ପରିଚାଳନା ହେଉଛି । ଏନେଇ ବିଏମ୍ସି କର୍ତ୍ତୃପକ୍ଷଙ୍କ ମଧ୍ୟରେ ପ୍ରାରମ୍ଭିକ ଆଲୋଚନା ହୋଇଥିବାବେଳେ ଭୁବନେଶ୍ୱରରେ ମୋଟ ୬୮ ରାପିଡ୍ ରେସ୍ପନ୍ସ ଟିମ୍ (ଆର୍ଆର୍ଟି) ଏହାର ପରିଚାଳନା କାର୍ଯ୍ୟରେ ନିୟୋଜିତ ହୋଇଛନ୍ତି । ଭୁବନେଶ୍ୱରରେ ମୋଟ ୩ ଜୋନ୍ ଥିବାବେଳେ ପ୍ରତି ଜୋନ୍ରେ ୧୬ଟି ଲେଖା ଟିମ୍ ରହିଛି ଓ ବିଏମ୍ସି ମୁଖ୍ୟାଳୟରେ ୨୦ ଆର୍ଆର୍ଟି ଦଳ ରିଜର୍ଭ ରହିଛି ।
ସେମାନେ ଦୈନିକ ବିଦେଶରୁ ଫେରିଥିବା ଯାତ୍ରୀଙ୍କ ସ୍ୱାସ୍ଥ୍ୟାବସ୍ଥା ତଦାରଖ କରୁଛନ୍ତି । ଏଥିସହ ସେମାନଙ୍କ ସଙ୍ଗରୋଧ ବ୍ୟବସ୍ଥା ଯାଞ୍ଚ କରୁଛନ୍ତି । ସଙ୍ଗରୋଧର ସପ୍ତାହ ପରେ ସେମାନଙ୍କ ନମୁନା ପରୀକ୍ଷଣ ହେବା ସହ ଏହା ଜିନୋମ୍ ସିକ୍ୟୁଏନ୍ସିଂ ପାଇଁ ପଠାଯିବ ବୋଲି ବିଏମ୍ସି ଉପ-ଆୟୁକ୍ତ ଶୁଭେନ୍ଦୁ ସାହୁ କହିଛନ୍ତି । ରାଜଧାନୀରେ ଏବେ ସଂକ୍ରମଣ ନିୟନ୍ତ୍ରଣାଧୀନ ରହିଛି । ଦୈନିକ ସଂକ୍ରମିତଙ୍କ ସଂଖ୍ୟା ୧୦୦ ମଧ୍ୟରେ ଥିବାବେଳେ କୋଭିଡ୍ କଟକଣାକୁ କଡ଼ାକଡ଼ି ଭାବେ ପାଳନ କରାଯାଉଛି । ସ୍ଥିତି ଅନୁସାରେ ଭୁବନେଶ୍ୱରରେ କଟକଣାକୁ ଆହୁରି କଡ଼ାକଡ଼ି କରାଯିବା ସହ ଆବଶ୍ୟକ ପଡ଼ିଲେ ମାର୍କେଟ ଅଞ୍ଚଳରେ ସର୍ଭେଲାନ୍ସ ବଢ଼ିବ ବୋଲି ବିଏମ୍ସି ପକ୍ଷରୁ କୁହାଯାଇଛି ।
