ଦୁଷ୍ମନ୍ତ ମୃତ୍ୟୁ ମାମଲା; ହାଇକୋର୍ଟରେ ଦାଖଲ ହେଲା ପିଟିସନ

ଏହି ମାମଲାର ଜଣେ ଅବସରପ୍ରାପ୍ତ ବିଚାରପତି ତତ୍ତ୍ୱାବଧାନରେ ଏସଆଇଟି ଗଠନ କରାଯାଇ ତଦନ୍ତ କରାଯାଉ କିମ୍ବା କୌଣସି ସେଣ୍ଟ୍ରାଲ୍ ଏଜେନ୍ସି ଦ୍ୱାରା ତଦନ୍ତ କରିବା ପାଇଁ ନିର୍ଦ୍ଦେଶ ଦେବାକୁ ପିଟିସନରେ ଆବେଦନ କରାଯାଇଛି ।

8 ତାରିଖରେ ଜଗତସିଂହପୁର କୁଜଙ୍ଗର ଦୁଷ୍ମନ୍ତ ଦାସ ଭୁବନେଶ୍ୱର ବିଧାନସଭା ଆଗରେ ହାତ କାଟିବା ସହ ବିଷ ପିଇ ଦେଇଥିଲେ । ପରେ ତାଙ୍କର ସନ୍ଦେହଜନକ ଭାବେ ମୃତ୍ୟୁ ହୋଇଥିଲା । କଟକର ଏସସିବିରେ ତାଙ୍କ ଚିକିତ୍ସାରେ ଅବହେଳା କରାଯାଇଥିଲା, ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ ତାଙ୍କ ଟ୍ରିଟମେଣ୍ଟ ହୋଇନଥିବା ଦୁଷ୍ମନ୍ତ ଅଭିଯୋଗ ଆଣିଥିଲେ । ବାରମ୍ବାର ତାଙ୍କୁ ଏ ହସପିଟାଲରୁ ସେ ହସପିଟାଲକୁ ରେଫର କରାଯାଇଥିଲା ।

ଚିକିତ୍ସା ଅବହେଳାର ସାଂଘାତିକ ଅଭିଯୋଗ ଆଣିଥିଲେ ଦୁଷ୍ମନ୍ତ । ସେପଟେ ଘଟଣାରେ ମଙ୍ଗଳବାଗ ଥାନାରେ ଦୀପ୍ତିରଂଜନ ସାହୁ ନାମକ ଯୁବକ ହାଜର ହୋଇଛନ୍ତି । ଧାରା ୧୬୧ ଅନୁଯାୟୀ ତାଙ୍କ ବୟାନ ରେକର୍ଡ ହୋଇଛି । ତେବେ ଦୀପ୍ତି ନିଜ ପ୍ରତିକ୍ରିୟାରେ କହିଛନ୍ତି, ଏସସିବିରେ ଚିକିତ୍ସାଧୀନ ଥିବାବେଳେ ନିୟମିତ ମତେ ଫୋନ କରୁଥିଲେ ଦୁଷ୍ମନ୍ତ । ସହଯୋଗ ଲୋଡିଥିଲେ । ମତେ ତାଙ୍କର ଚିକିତ୍ସା ସମ୍ପର୍କିତ କାଗଜପତ୍ର ବି ପଠାଇଥିଲେ । ବ୍ୟକ୍ତିଗତ ଭାବରେ କେବେ ଦେଖା ହୋଇନାହିଁ ବୋଲି ସେ କହିଛନ୍ତି ।