ସତ୍ୟଶିଖା(ନୂଆଦିଲ୍ଲୀ) ୦୪ .୦୫.୨୦୨୧: ଉତ୍ତରପ୍ରଦେଶରେ ପଞ୍ଚାୟତ ନିର୍ବାଚନ ପରେ ଗ୍ରାମାଞ୍ଚଳରେ ଦ୍ରୁତଗତିରେ କଂରୋନା ସଂକ୍ରମଣ ବ୍ୟାପିବାରେ ଲାଗିଛି। ନିର୍ବାଚନ ପାଇଁ ଆବଶ୍ୟକ ସତର୍କତା ଅମଲମ୍ବନ କରାଯାଇଥିଲେ ହେଁ ମହାମାରୀ ସଂକ୍ରମଣକୁ ରୋକିବାରେ ପ୍ରଶାସନ ବିଫଳ ହୋଇଛି। ପୂର୍ବରୁ ନିର୍ବାଚନ କାର୍ଯ୍ୟରେ ଯୋଗଦେଇଥିବା ୫୭୭ ଶିକ୍ଷକ କରୋନାରେ ପ୍ରାଣ ହରାଇଥିବାବେଳେ ଏବେ ବିଭିନ୍ନ ଅଞ୍ଚଳରେ ପ୍ରାର୍ଥୀଙ୍କ ପାଇଁ ବିପଦ ସୃଷ୍ଟି ହୋଇଛି। ଅନେକ ସ୍ଥାନରେ ପ୍ରାର୍ଥୀଙ୍କ ମୃତ୍ୟୁ ଘଟିଥିବା ଜଣାପଡ଼ିଛି।
ସୂଚନା ଅନୁସାରେ, ମେନ୍ପୁରି, ଦେଓରିଆ, କନୌଜ, ପ୍ରତାପଗଡ଼ ଏବଂ ବାରାବାଙ୍କୀ ଜିଲାର ଅନେକ ପ୍ରାର୍ଥୀ ନିର୍ବାଚନରେ ବିଜୟ ହୋଇଛନ୍ତି, କିନ୍ତୁ ସେମାନେ ନିଜର ବିଜୟ ଖୁସି ଅନୁଭବ କରିବାକୁ ଏବେ ଜୀବିତ ନାହାନ୍ତି। ଅର୍ଥାତ ନିର୍ବାଚନ ପରେ ସେହି ଜିଲାର ଅନେକ ପ୍ରାର୍ଥୀ ପ୍ରାଣ ହରାଇ ସାରିଛନ୍ତି। ମେନ୍ପୁରି ଜିଲାର କୁରାବଳୀ ବ୍ଲକ ଅନ୍ତର୍ଗତ ନାଗଲା ଉସର ପଞ୍ଚାୟତର ପିଙ୍କି ଦେବୀ ନିର୍ବାଚନରେ ବିଜୟୀ ହୋଇଥିଲେ ହେଁ ୩ ଦିନ ତଳେ ତାଙ୍କର କରୋନାରେ ମୃତ୍ୟୁ ଘଟିଛି।
