ସତ୍ୟଶିଖା( ଭୁବନେଶ୍ୱର )୨୬.୧୦.୨୦୨୨:
-୨୪ ଘଣ୍ଟିଆ ସୁରକ୍ଷା ବ୍ୟବସ୍ଥା
– ଷ୍ଟ୍ରଙ୍ଗରୁମ୍ର ସିସିଟିଭି କ୍ୟାମେରାରେ ରହିବ ଇଭିଏମ୍
– ୪ କମ୍ପାନି ସେଣ୍ଟ୍ରାଲ ଆର୍ମଡ୍ ଫୋର୍ସ, ୨୦ ପ୍ଲାଟୁନ ଫୋର୍ସ, ୪୬ ମୋବାଇଲ ପାଟ୍ରୋଲିଂ ପାର୍ଟି, ୩ ଫ୍ଲାଇଂ ସ୍କ୍ୱାଡ୍ ନିୟୋଜିତ
କଟକ: ଆସନ୍ତା ନଭେମ୍ବର ୩ ତାରିଖରେ ହେବାକୁ ଯାଉଛି ଭଦ୍ରକ ଜିଲ୍ଲା ଧାମନଗର ଉପନିର୍ବାଚନ । ଏଥିନିମନ୍ତେ ପ୍ରସ୍ତୁତି ନେଇ ପୁଲିସ ମହାନିର୍ଦ୍ଦେଶକ ସୁନୀଲ କୁମାର ବଂଶଲ ସମୀକ୍ଷା କରିଛନ୍ତି । ମୁକ୍ତ, ସ୍ୱଚ୍ଛ, ଅବାଧ ନିର୍ବାଚନ ଉପରେ ଡିଜିପି ବଂଶଲ ଗୁରୁତ୍ୱାରୋପ କରିଛନ୍ତି । ଆଦର୍ଶ ନିର୍ବାଚନ ଆଚରଣ ବିଧି କଡ଼ାକଡ଼ି ପାଳନ କରାଯିବା ସହ ଭିଆଇପି ଓ ଭିଭିଆଇପିଙ୍କ ପରିଦର୍ଶନ ବେଳେ ପୁଲିସ ବ୍ୟବସ୍ଥାକୁ ସକ୍ରିୟ କରାଯିବ । ଉପନିର୍ବାଚନରେ ପୁଲିସ ପକ୍ଷରୁ ୪ କମ୍ପାନି ସେଣ୍ଟ୍ରାଲ ଆର୍ମଡ୍ ଫୋର୍ସ, ୨୦ ପ୍ଲାଟୁନ୍ ଏପିଆର ଫୋର୍ସ, ୪୬ ମୋବାଇଲ ପାଟ୍ରୋଲିଂ ପାର୍ଟି, ୩ ଫ୍ଲାଇଂ ସ୍କ୍ୱାଡ୍ ଓ ୩ ଷ୍ଟାଟିଷ୍ଟିକାଲ ସରଭେଲାନ୍ସ ଟିମ୍ ନିୟୋଜିତ କରାଯାଇଛି ।
ଇଭିଏମ୍କୁ ୨୪ ଘଣ୍ଟିଆ ସୁରକ୍ଷା ବଳୟରେ ରଖାଯିବା ପାଇଁ ସୁରକ୍ଷା ବ୍ୟବସ୍ଥା କରାଯିବା ସହ ଷ୍ଟ୍ରଙ୍ଗରୁମ୍ରେ ସିସିଟିଭି କ୍ୟାମେରା ଲଗାଯିବାର ବ୍ୟବସ୍ଥା ହୋଇଛି । ଏଥି ସହ ୧୧୦ ଓ ୧୦୭ ଧାରାରେ ବିଶୃଙ୍ଖଳା ସୃଷ୍ଟିକାରୀଙ୍କୁ ବାନ୍ଧିବା, ବେଆଇନ ଅସ୍ତ୍ରଶସ୍ତ୍ର, ମଦ ଜବତ ଓ ଜାମିନବିହୀନ ଗିରଫ ପରୱାନା ଜାରି ହୋଇଥିବା ବ୍ୟକ୍ତିଙ୍କୁ ଧରିବା ଉପରେ ଆଜି ଡିଜିପି ଗୁରୁତ୍ୱ ଦେଇଛନ୍ତି । ଅତିରିକ୍ତ ଡିଜିପି (ଆଇନଶୃଙ୍ଖଳା) ଆର.କେ. ଶର୍ମା ପୁଲିସ ସମଗ୍ର ନିର୍ବାଚନମଣ୍ଡଳୀରେ କର୍ମଚାରୀ ଓ ଅଧିକାରୀ ନିୟୋଜନର ରୂପରେଖ, ମୋବାଇଲ ଓ ଫ୍ଲାଇଂ ସ୍କ୍ୱାଡ୍ ବ୍ୟବସ୍ଥା ଉପରେ ଆଲୋକପାତ କରିଥିଲେ । ଗୁଇନ୍ଦା ନିର୍ଦ୍ଦେଶକ ସଞ୍ଜୀବ ପଣ୍ଡା ଉପନିର୍ବାଚନର ଆଇନ ଶୃଙ୍ଖଳା ପରିସ୍ଥିତିକୁ ଆଇଜିପି ଓ ଏସ୍ପି ଟିକିନିକି ତଦାରଖ କରିବାକୁ କହିଥିଲେ ।
ଉପନିର୍ବାଚନ ପରିପ୍ରେକ୍ଷୀରେ ସମଗ୍ର ନିର୍ବାଚନ ମଣ୍ଡଳୀରେ ନିଶା କାରବାର ରୋକିବାକୁ ପୁଲିସ ପ୍ରୟାସ ଜାରି ରଖିଛି । ନିର୍ବାଚନ ପ୍ରକ୍ରିୟା ଆରମ୍ଭ ଦିନରୁ ଅଦ୍ୟାବଧି ୧୦୩୫ ଲିଟର ମଦ ଜବତ ସହ ୮୩ଟି ଅବକାରୀ ମାମଲା ରୁଜୁ କରାଯାଇଛି । ଏଥିସହ ୧୬୪ଟି ପଡ଼ି ରହିଥିବା ୱାରେଣ୍ଟ ମାମଲାକୁ ତ୍ୱରାନ୍ୱିତ କରାଯାଇଛି । ଭିଡିଓ କନ୍ଫରେନ୍ସି ଜରିଆରେ ହୋଇଥିବା ଏହି ସମୀକ୍ଷା ବୈଠକରେ ଅନ୍ୟମାନଙ୍କ ମଧ୍ୟରେ ଆଇଜି (ମୁଖ୍ୟାଳୟ) ଏସ୍. ଦେବଦତ୍ତ ସିଂହ, ଆଇଜି (ପର୍ସୋନେଲ୍) ପ୍ରବୀଣ କୁମାର, ଭଦ୍ରକ ଏସ୍ପି ଚରଣ ସିଂହ ମୀନା ଓ ଆଇଜି (ପୂର୍ବାଞ୍ଚଳ) ହିମାଂଶୁ ଲାଲ ପ୍ରମୁଖ ବରିଷ୍ଠ ପୁଲିସ ଅଧିକାରୀମାନେ ଯୋଗ ଦେଇଥିଲେ ।
