ସତ୍ୟଶିକ୍ଷା ୨୬.୦୯.୨୦୨୦ : ମହାମାରୀ କୋଭିଡ୍-୧୯ର ପ୍ରାଦୁର୍ଭାବ ଚଳିତବର୍ଷ ପ୍ରତ୍ୟେକ ଆନ୍ତର୍ଜାତିକ ବିଦ୍ୟାର୍ଥୀର ବିଦେଶରେ ପଢ଼ିବା ଯୋଜନାକୁ ସ୍ଥଗିତ କରିଦେଇଛି । ତଥାପି ଏଥିପାଇଁ ଅନେକ ଆହ୍ୱାନ ରହିଥିବା ସତ୍ୱେ ୯୧ ପ୍ରତିଶତ ଭାରତୀୟ ଛାତ୍ରଛାତ୍ରୀ ସେମାନଙ୍କୁ ଯେତେଶୀଘ୍ର ଅନୁମତି ମିଳିଯିବ, ସେମାନେ ବିଦେଶରେ ପଢ଼ିବା ପାଇଁ ଚାହିଁ ବସିଛନ୍ତି । ତେବେ କେବଳ ଗୋଟିଏ ପ୍ରଶ୍ନର ଉତ୍ତରକୁ ସେମାନେ ଅପେକ୍ଷା କରିଛନ୍ତି, ବିଦେଶ ଯାତ୍ରା କଟକଣା କେବେ ହଟିବ ଆଉ ସାମ୍ପ୍ରତିକ ସ୍ଥିତିରେ ସେମାନେ କେଉଁ ପାଠ୍ୟକ୍ରମରେ ନିଜକୁ ସାମିଲ କରିବେ ।
ପୂର୍ବରୁ ଆମେରିକା, ଯୁକେ, କାନାଡ଼ା ଏବଂ ଅଷ୍ଟ୍ରେଲିଆ ଆଦି ଦେଶ ଭାରତୀୟ ବିଦ୍ୟର୍ଥୀଙ୍କର ପ୍ରଥମ ପସନ୍ଦ ରହିଥିଲା । ସମ୍ପ୍ରତି ବିଶ୍ୱବ୍ୟାପୀ ଛାଇଯାଇଥିବା କରୋନାଭୂତାଣୁର କରାଳ ଛାୟା ପରିପ୍ରେକ୍ଷୀରେ ଛାତ୍ରଛାତ୍ରୀମାନେ ନିଜର ପସନ୍ଦର ପୁନର୍ବିଚାର କରି ନିଉଜିଲାଣ୍ଡ, ଜର୍ମାନୀ ଏବଂ ଏପରିକି ଆୟାର୍ଲାଣ୍ଡ ଆଦି ଦେଶକୁ ବାଛୁଥିବା ଦେଖାଯାଇଛି ବୋଲି ଆଇସ୍କୁଲ୍କନେକ୍ଟ ଇନ୍କୋର ପ୍ରତିଷ୍ଠାତା ସିଇଓ ଆଶିଷ ଫର୍ଣ୍ଣାଣ୍ଡୋ କହିଛନ୍ତି । ଅବଶ୍ୟ ବିଗତ ଏକ ଦଶନ୍ଧି ହେଲା ଛାତ୍ରଛାତ୍ରୀମାନଙ୍କର ପସନ୍ଦର ଦେଶ ବଦଳିବାରେ ଲାଗିଛି ।
ଏହାର ପ୍ରମୁଖ କାରଣ ହେଲା, ଅନ୍ୟ ଦେଶମାନେ ଅଧିକ ସଂଖ୍ୟକ ବିକଳ୍ପ ପାଠ୍ୟକ୍ରମ ଉପଲବ୍ଧ କରାଇବା ସହିତ ନାମଲେଖା ପ୍ରକ୍ରିୟାର ସରଳୀକରଣ କରିବା । ସମ୍ପ୍ରତି ଜର୍ମାନୀ, ଆୟର୍ଲାଣ୍ଡ, ଦକ୍ଷିଣକୋରିଆ ଓ ସିଙ୍ଗାପୁର ଆଦି ଦେଶ ତାହାର ଜ୍ୱଳନ୍ତ ଉଦାହରଣ ବୋଲି ଫର୍ଣ୍ଣାଣ୍ଡୋ ସୂଚନା ଦେଇଛନ୍ତି । ମହାମାରୀ ପୂର୍ବରୁ ଛାତ୍ରଛାତ୍ରୀମାନେ ନିଜର ବିଦେଶ ପଢ଼ା ପାଇଁ ସହଜ ନାମଲେଖା ପ୍ରକ୍ରିୟା, ଶିକ୍ଷାଦାନର ଗୁଣବତ୍ତା, ଆପ୍ରବାସନ ନୀତି ଏବଂ ପାଠପଢ଼ା ଓ ରହଣି ଖର୍ଚ୍ଚ ଆଦିକୁ ଗୁରୁତ୍ୱ ଦେଉଥିଲେ । ତେବେ ଏଣିକି ସ୍ୱାସ୍ଥ୍ୟ ନିରାପତ୍ତା ଏବଂ ସର୍ବନିମ୍ନ ବିପଦକୁ ଅନ୍ୟତମ ଉପାଦାନ ଭାବେ ବିଚାରୁଛନ୍ତି । ସମ୍ପ୍ରତି ନିଉଜିଲାଣ୍ଡ୍, ଅଷ୍ଟ୍ରେଲିଆ ଏବଂ ଜର୍ମାନୀ ଆଦି ଦେଶ କୋଭିଡ୍ ଦ୍ୱାରା ଅପେକ୍ଷାକୃତ କମ୍ ପ୍ରଭାବିତ ହୋଇଥିବାରୁ ସେହି ଦେଶ ପ୍ରତି ଛାତ୍ରଛାତ୍ରୀମାନଙ୍କର ଦୁର୍ବଳତା ବଢ଼ିଥିବା ସ୍ପଷ୍ଟ ହୋଇଛି ।
