ସତ୍ୟଶିଖା( ପୁରୀ )୨୧.୦୯ .୨୦୨୧: ଶ୍ରୀମନ୍ଦିର ଦର୍ଶନ ନେଇ ପ୍ରଶାସନ ପକ୍ଷରୁ ଜାରି ହୋଇଛି ଏସ୍ଓପି । ଭକ୍ତମାନେ କେବଳ ସିଂହଦ୍ୱାର ଦେଇ ପ୍ରବେଶ କରିବା ସହ ଉତ୍ତର ଦ୍ୱାର ଦେଇ ପ୍ରସ୍ଥାନ କରିବେ । କିନ୍ତୁ ପ୍ରଶାସନର ଏହି କଟକଣା ବଡ଼ ଅସୁବିଧାରେ ପକାଇଛି ପୁରୀ ସହରବାସୀଙ୍କୁ । ବାହାର ଭକ୍ତଙ୍କ ଭଳି ସହରବାସୀଙ୍କୁ ବି ଧାଡ଼ିରେ ଯିବାକୁ ପଡୁଛି । ପ୍ରତିଦିନ ମହାପ୍ରଭୁଙ୍କ ଦର୍ଶନ ଓ ମହାପ୍ରସାଦ ଆଣିବାରେ ବହୁ ବିଳମ୍ବ ହେଉଛି। ସେହିପରି ପୁରୀର ଅନେକ ଲୋକ ଡବଲ ଡୋଜ ଟିକା ନେଇଥିଲେ ବି ସବୁଦିନ ଆର୍ଟିପିସିଆର୍ ଟେଷ୍ଟ୍ ନେଗେଟିଭ ରିପୋର୍ଟ ନେଇ ମହାପ୍ରଭୁଙ୍କ ଦର୍ଶନ କରିବା ସମ୍ଭବ ହେଉନାହିଁ । ଏହାକୁ ନେଇ ସହରବାସୀଙ୍କ ମନରେ ବଢ଼ିବାରେ ଲାଗିଛି ଅସନ୍ତୋଷ । ପୁରୀବାସୀଙ୍କ ପାଇଁ କେବଳ ଶ୍ରୀମନ୍ଦିର ସମସ୍ତ ଦ୍ୱାରରେ ସ୍ଥାନୀୟ ପରିଚୟ ପତ୍ର ଦେଖାଇ ପ୍ରବେଶ ଓ ପ୍ରସ୍ଥାନ ଅନୁମତି ଦେବାକୁ ଦାବି କରିଛନ୍ତି ପୁରୀବାସୀ । ଶ୍ରୀମନ୍ଦିରର ସୁରକ୍ଷା ଓ ପୁରୀକୁ ବିଶ୍ୱ ଐତିହ୍ୟ ସହରରେ ପରିଣତ କରିବା ପାଇଁ ପୁରୀବାସୀ କରିଥିବା ତ୍ୟାଗର ତୁଳନା ନାହିଁ । କିନ୍ତୁ କୋଭିଡ୍ ପାଇଁ ପ୍ରଶାସନ ପକ୍ଷରୁ ଜାରି ହୋଇଥିବା ଏସ୍ଓପି ଏବେ ପୁରୀବାସୀଙ୍କୁ ଅଡୁଆରେ ପକାଇଛି । ଏଣୁ ଏହା ଉପରେ ପୁନର୍ବିଚାର କରିବା ପାଇଁ ମତ ରଖିଛନ୍ତି ମଠାଧୀଶମାନେ । ସେପଟେ କୋଭିଡ୍ ପରିସ୍ଥିତି ଯୋଗୁ ଏହି ନିୟମ ସମସ୍ତଙ୍କ ପାଇଁ ଲାଗୁ ହୋଇଛି । ତେବେ ବିଭିନ୍ନ ସ୍ତରରେ ଆଲୋଚନା ପରେ ଏ ନେଇ କିଛି ନିଷ୍ପତ୍ତି ଆଗାମୀ ଦିନରେ ନିଆଯିବ ବୋଲି କହିଛନ୍ତି ପୁରୀ ଜିଲ୍ଲାପାଳ । ବିନା ଭକ୍ତରେ ରଥଯାତ୍ରା ଆୟୋଜନ ହେଉ କି ପୁରୀକୁ ବିଶ୍ୱ ଐତିହ୍ୟ ସହର ନେଇ ସରକାରଙ୍କ ପକ୍ଷରୁ ହେଉଥିବା କାର୍ଯ୍ୟ, ସବୁ କ୍ଷେତ୍ରରେ ସବୁବେଳେ ସରକାର ଓ ସ୍ଥାନୀୟ ପ୍ରଶାସନକୁ ସହଯୋଗ କରିଆସିଛନ୍ତି ପୁରୀବାସୀ । ଏଣୁ ପୁରୀବାସୀଙ୍କ ଦାବିକୁ ପ୍ରଶାସନ ଆଗାମୀ ଦିନରେ ପୂରଣ କିଭଳି କରୁଛି ତାକୁ ଏବେ ପୁରୀବାସୀଙ୍କ ଅପେକ୍ଷା ।
