ସତ୍ୟଶିଖା(ନୂଆଦିଲ୍ଲୀ) ୨୯.୧୨.୨୦୨୧: ଭାରତରେ 700 ପାର୍ କଲା ଓମିକ୍ରନ ଆକ୍ରାନ୍ତଙ୍କ ସଂଖ୍ୟା । ପ୍ରତିଦିନ ଓମିକ୍ରନ ଆକ୍ରାନ୍ତ ଚିହ୍ନଟ ହେଉଥିବା ବେଳେ ଦେଶରେ ଆକ୍ରାନ୍ତଙ୍କ ସଂଖ୍ୟା ଏବେ ୭୧୭ରେ ପହଞ୍ଚିଛି । ମହାରାଷ୍ଟ୍ର ଏବଂ ଦିଲ୍ଲୀରେ ଏବେ ଓମିକ୍ରନ ଆକ୍ରାନ୍ତଙ୍କ ସଂଖ୍ୟା ଅଧିକ ଥିବା ଜଣାପଡ଼ିଛି । ମହାରାଷ୍ଟ୍ରରେ ୧୬୭ ଓମିକ୍ରନ ଆକ୍ରାନ୍ତ ଥିବା ବେଳେ ଦିଲ୍ଲୀରେ ୧୬୫ଜଣ ଓମିକ୍ରନ ଆକ୍ରାନ୍ତ ରହିଛନ୍ତି । ମୋଟ 717ଜଣଙ୍କ ମଧ୍ୟରୁ ବର୍ତ୍ତମାନ ସୁଦ୍ଧା ୧୮୬ଜଣ ସୁସ୍ଥ ହୋଇ ଘରକୁ ଫେରିଛନ୍ତି ।
ଓମିକ୍ରନ୍ ମାମଲାରେ ବୃଦ୍ଧି ଘଟିବାରୁ ଦିଲ୍ଲୀରେ ସୋମବାରଠାରୁ ନାଇଟ କର୍ଫ୍ୟୁ ଲାଗୁ ହୋଇଛି । ସୋମବାର ଦିନ ଦିଲ୍ଲୀରେ ୩୩୧ଟି କରୋନା ସଂକ୍ରମିତ ଚିହ୍ନଟ ହେବା ପରେ ଏହି ନିଷ୍ପତ୍ତି ନିଆଯାଇଛି। ଏହା ସହ ମହାରାଷ୍ଟ୍ରରେ ମଧ୍ୟ ରାତି ୯ଟାରୁ ସକାଳ ୬ଟା ପର୍ଯ୍ୟନ୍ତ ନାଇଟ କର୍ଫ୍ୟୁ ଲାଗୁ ହୋଇଛି। ଦିଲ୍ଲୀ ଓ ମହାରାଷ୍ଟ୍ର ବ୍ୟତୀତ ଓମିକ୍ରନ ସଂକ୍ରମଣକୁ ନଜରରେ ରଖି କେରଳ ଏବଂ ଉତ୍ତରାଖଣ୍ଡରେ ନାଇଟ କର୍ଫ୍ୟୁ ଲାଗୁ ହୋଇଛି।
ଆଗକୁ ନୂଆବର୍ଷ ଆସୁଥିବା ବେଳେ ଭିଡ଼ ହେବାର ଆଶଙ୍କା କରି ସଂକ୍ରମଣକୁ ରୋକିବାକୁ କେରଳ ଏବଂ ଉତ୍ତରାଖଣ୍ଡ ସରକାର ନାଇଟ କର୍ଫ୍ୟୁ କଟକଣା ଲାଗୁ କରିଛନ୍ତି । କେରଳରେ ଡିସେମ୍ବର ୩୦ରୁ ଜାନୁଆରି ୨ପର୍ଯ୍ୟନ୍ତ ରାତି ୧୦ଟାରୁ ସକାଳ ୫ଟା ଯାଏଁ ନାଇଟ କର୍ଫ୍ୟୁ ହେବା ସହ ଉତ୍ତରାଖଣ୍ଡରେ ମଧ୍ୟ ନାଇଟ କର୍ଫ୍ୟୁ ଲାଗୁ ହୋଇଥିବା ଜଣାପଡିଛି ।
