ସୁପ୍ରିମକୋର୍ଟରେ ପକ୍ଷ ରଖିଲେ ଆରବିଆଇ, କହିଲେ- ‘ଲୋନ ମୋରାଟୋରିୟମ ଅବଧି ବଢାଇବା ଆଉ ସମ୍ଭବ ନୁହେଁ’ l

ସତ୍ୟଶିଖା (ନୂଆଦିଲ୍ଲୀ) ୧୦.୧୦.୨୦୨୦ : ଭାରତୀୟ ରିଜର୍ଭ ବ୍ୟାଙ୍କ(ଆରବିଆଇ) ଲୋନ ମୋରାଟୋରିୟମ ମାମଲାରେ ସୁପ୍ରିମକୋର୍ଟରେ ନୂତନ ସତ୍ୟପାଠ ଦାଖଲ କରିଛି । ଏଥିରେ ଆରବିଆଇ ନିଜର ପକ୍ଷ ରଖି କହିଛି କରୋନା ଭାଇରସ୍ ମହାମାରୀରେ  ପ୍ରଭାବିତ  କ୍ଷେତ୍ରକୁ ଅଧିକ ରିଲିଫ୍ ଦେବା ସମ୍ଭବ ନୁହେଁ । ବ୍ୟାଙ୍କ ଏହା ମଧ୍ୟ କହିଛି ଲୋନ ମୋରେଟୋରିୟମକୁ ଛଅ ମାସରୁ ଅଧିକ ସମୟ ବଢାଇବା ସମ୍ଭବ ନୁହେଁ । ଛଅ ମାସରୁ ଅଧିକ ଲମ୍ବା ମୋରାଟୋରିୟମ ଲୋନ ନେଇଥିବା ବ୍ୟକ୍ତିଙ୍କ କ୍ରେଡିଟ୍ ସ୍କୋରକୁ ପ୍ରଭାବିତ କରିପାରେ । ଏହାର ପରିଣାମସ୍ଵରୂପ ସମଗ୍ର ଋଣ ଅନୁଶାସନକୁ ସମାପ୍ତ କରାଯାଇପାରେ । ଏମିତି ହେଲେ ଅର୍ଥବ୍ୟବସ୍ଥାରେ ଋଣ ନିର୍ମାଣର ପ୍ରକ୍ରିୟା ଉପରେ ଗୁରୁତର ପ୍ରଭାବ ପଡିବ । ଏଥିରେ ଛୋଟ ଛୋଟ ଋଣ ନେଇଥିବା ଲୋକଙ୍କ ଉପରେ ନକରାତ୍ମକ ପ୍ରଭାବ ପଡିବ । କାରଣ କ୍ରେଡିଟ୍‌ ସ୍କୋର ଆଧାରରେ ହିଁ ଋଣ ଦେଉଥିବା ସଂସ୍ଥା ସେମାନଙ୍କୁ ପରବର୍ତ୍ତୀ ସମୟରେ ଋଣ ଦେବେ ।ଲୋନ ମୋରାଟୋରିୟମ ମାମଲାରେ ସୁପ୍ରିମକୋର୍ଟରେ ଆଗାମୀ ଶୁଣାଣି ଅକ୍ଟୋବର ୧୩ରେ ହେବ । ସୁପ୍ରିମକୋର୍ଟ ଗତ ସୋମବାର କହିଛନ୍ତି ସୁଧ ଉପରେ ସୁଧ ଛାଡକୁ ନେଇ କେନ୍ଦ୍ର ଦ୍ଵାରା ଦାଖଲ ସତ୍ୟପାଠ ସନ୍ତୋଷଜନକ ନୁହେଁ । କୋର୍ଟ ପୁଣି ଥରେ କେନ୍ଦ୍ର ସରକାର ଓ ଭାରତୀୟ ରିଜର୍ଭ ବ୍ୟାଙ୍କକୁ ନୂତନ ସତ୍ୟପାଠ ଦାଖଲ କରିବାକୁ ସର୍ବୋଚ୍ଚ ନ୍ୟାୟାଳୟ କହିଛନ୍ତି । ପ୍ରଥମ ଦାଖଲ ସତ୍ୟପାଠରେ କେନ୍ଦ୍ର ସରକାର ୨ କୋଟି ଟଙ୍କା ପର୍ଯ୍ୟନ୍ତ ଋଣ ଉପରେ ସୁଧ ଛାଡ କରିବ ବୋଲି କହିଥିଲା । ଏହାର ବୋଝ ନିଜେ କେନ୍ଦ୍ର ସରକାର ବହନ କରିବେ । ଏଥିରେ ସରକାରଙ୍କ ଉପରେ ଅତିରିକ୍ତ ୫୦୦୦ ରୁ ୭୦୦୦ କୋଟି ଟଙ୍କା ବୋଝଭାର ପଡିବ ।  ସର୍ବୋଚ୍ଚ ନ୍ୟାୟାଳୟ ମାର୍ଚ୍ଚ ଓ ଅଗଷ୍ଟ ୩୧ ମଧ୍ୟରେ ମାସିକିଆ କିସ୍ତି ପୈଠ ଉପରେ ସୁଧ ଛାଡ କରିବା ଦାବିରେ ଦାଖଲ ଆବେଦନ ଉପରେ ଶୁଣାଣି କରିଛି । କୋଭିଡ୍-୧୯ ମହାମାରୀ କାରଣରୁ ଘୋଷିତ ଲକ୍‌ଡାଉନ୍‌କୁ ଆଖି ଆଗରେ ରଖି ଆରବିଆଇ ମୋନେଟୋରିୟମ ଘୋଷଣା କରିଥିଲା ।