ସତ୍ୟଶିଖା (ଭୁବନେଶ୍ୱର) ୦୮/୦୧/୨୦୨୧ : ଗୋଟିଏ ପଟେ ସାଇବର ଠକଙ୍କ ଉତ୍ପାତ ଶେଷ ସୀମାରେ ପହଞ୍ଚି ଥିବା ବେଳେ ଅନ୍ୟପଟରେ ସହାୟତା କେନ୍ଦ୍ର ଖୋଲିଛି କମିସନରେଟ ପୁଲିସ । ଠକାମିର ଶିକାର ହେଉଥିବା ବ୍ୟକ୍ତି ଏହି କେନ୍ଦ୍ରର ସହୟତା ନେଇପାରିବେ । ସେହିପରି ବାରମ୍ବାର ଅଜଣା କଲ, ଏସଏମଏସ ଆସୁଥିବା ସିମକାର୍ଡକୁ ମଧ୍ୟ ବ୍ଲକ୍(ବନ୍ଦ) କରିବାକୁ ପଦକ୍ଷେପ ନିଆଯିବ । ଫଳରେ ଅନ୍ୟ କେହି ଠକାମିରୁ ରକ୍ଷା ପାଇଯିବେ । ସେହିପରି ପ୍ରଥମ ଘଣ୍ଟାଏକୁ ଗୁରୁତ୍ବପୂର୍ଣ୍ଣ ବୋଲି ବିବେଚନା କରାଯାଇଛି । ଠକାମିର ଶିକାର ହୋଇଥିବା ବ୍ୟକ୍ତି ଯଦି ତୁରନ୍ତ ସହାୟତା କେନ୍ଦ୍ରକୁ ଏ ସମ୍ପର୍କରେ ସୂଚନା ଦିଏ, ତାହେଲେ ଠକାମି ହୋଇଥିବା ଟଙ୍କା ଫେରି ପାଇବାର ସମ୍ଭାବନା ରହିଛି । ପ୍ରାଥମିକ ପର୍ଯ୍ୟାୟରେ ଏହି ସହାୟତା କେନ୍ଦ୍ରରେ ୪ଟି ସେବା ଉପଲବ୍ଧ ହେବ । ଖାଲି ସେତିକି ନୁହେଁ, ଯଦି ଥାନାକୁ ସାଇବର ଠକାମିର ଅଭିଯୋଗ ଆସିଲା, ତା’ ଉପରେ ତୁରନ୍ତ କାର୍ଯ୍ୟାନୁଷ୍ଠାନ ନେବାକୁ ଆଇଆଇସିମାନଙ୍କୁ ନିର୍ଦ୍ଦେଶ ଦିଆଯାଇଥିବା ପୁଲିସ କମିସନର ସୁଧାଂଶୁ ଷଡ଼ଙ୍ଗୀ ଆଜି ପୁଲିସ୍ ସେବା ଭବନରେ ଆୟୋଜିତ ସାମ୍ବାଦିକ ସମ୍ମିଳନୀରେ କହିଛନ୍ତି । ସହାୟତା କେନ୍ଦ୍ର ପାଇଁ ମୋବାଇଲ ନମ୍ବର(୭୪୪୦୦୦୬୭୦୯) ଜାରି କରାଯାଇଛି । ଏହି ନମ୍ବର ଜରିଆର ଲୋକମାନେ ସାଇବର ଅପରାଧ ସମ୍ପର୍କିତ ଅଭିଯୋଗ ଦେବା ସହ ସେବା ପାଇପାରିବେ । ଡିସିପିଙ୍କ କାର୍ଯ୍ୟାଳୟରେ ଥିବା ସ୍ପେସାଲ ସ୍କ୍ବାଡ୍ ଅଧୀନରେ ଏହି ଡେସ୍କ କାମ କରୁଛି । ଜଣେ ଅଭିଜ୍ଞ ସବ୍ଇନ୍ସପେକ୍ଟର ଓ ୭ ଜଣ କନଷ୍ଟେବଳ ଏହି ଡେସ୍କରେ କାମ କରିବେ । ଥାନା କାର୍ଯ୍ୟକାରୀ ହେବା ପରେ ଏହି ଡେସ୍କ ସେଠାକୁ ଉଠିଯିବ ବୋଲି ଶ୍ରୀ ଷଡ଼ଙ୍ଗୀ ସୂଚନା ଦେଇଛନ୍ତି ।
ଗୁଗୁଲ ସର୍ଚ୍ଚରେ ଆସୁଥିବା ୟୁଆରଏଲକୁ ବନ୍ଦ କରାଯିବ
ଵାସିଂ ମେସିନ୍ ହେଉ କିମ୍ବା ଆକ୍ବାଗାର୍ଡର ମରାମତି। କୋରିଅର କିମ୍ବା ଅନ୍ୟ କୌଣସି ସେବା ସମ୍ପର୍କରେ ଜାଣିବା ଲାଗି ଲୋକ ଏବେ ଗୁଗୁଲ ସର୍ଚ୍ଚ ଉପରେ ନିର୍ଭର କରୁଛନ୍ତି । ଏହି ସମୟରେ ସମ୍ପୃକ୍ତ ସେବାର ହେଲ୍ପ ଡେସ୍କ ନମ୍ବର ଆସୁଛି । କିନ୍ତୁ ସେହି ହେଲ୍ପ ଡେସ୍କରେ ଦିଆ ଯାଇଥିବା ଫୋନ୍ ନମ୍ବର ଅସଲି ନା ନକଲି ତାହାକୁ ଲୋକ ଅଧିକ ଯାଞ୍ଚ କରନ୍ତି ନାହିଁ । ସାଇବର ଠକ ବିଜ୍ଞାପନକୁ ଇଣ୍ଟରନେଟରେ ଛାଡ଼ି ଦିଅନ୍ତି । ଫଳରେ ଠକ ସେବା ଯୋଗାଇବାର ଲୋଭ ଦେଖାଇ ପ୍ରଥମେ ବ୍ୟବହାରକାରୀଙ୍କୁ ୧୦ ଟଙ୍କା ମାଗିଥାଏ । ସେହି ସମୟରେ ସେ ନିଜର ଏଟିଏମ୍ କାର୍ଡ ନମ୍ବର, ବ୍ୟାଙ୍କ ଆକାଉଣ୍ଟ ନମ୍ବର ଭଳି ଅନେକ ତଥ୍ୟ ଦେଇଥାଏ । ଯାହାର ଫାଇଦା ଉଠାଇ ଠକ ଆକାଉଣ୍ଟରୁ ଟଙ୍କା ଲୁଟିନିଏ । ଏଥିରୁ ରକ୍ଷା ପାଇବା ଲାଗି ଗୁଗୁଲ ସର୍ଚ୍ଚରେ ଯେଉଁ ନମ୍ବର ମିଳୁଛି ତାହାର ସତ୍ୟାସତ୍ୟ ଜାଣିବା ପାଇଁ କମ୍ପାନିର ୱେବସାଇଟରୁ ଯାଞ୍ଚ କରିବା ପାଇଁ ପୁଲିସ କମିସନର ଅନୁରୋଧ କରିଛନ୍ତି । ସେହିପରି ଠକ ଗୁଗୁଲ୍ ସର୍ଚ୍ଚରେ ଯେଉଁ ୟୁଆରଏଲ୍ ଦେଉଛନ୍ତି ତାହାକୁ ବ୍ଲକ୍ କରିବା ପାଇଁ ବ୍ୟବସ୍ଥା କରାଯିବ ।
ବ୍ଲକ୍ ହେବ ଠକଙ୍କ ସିମ୍କାର୍ଡ
ସାଇବର ଠକ ବିଶେଷ କରି ଲୋକମାନଙ୍କୁ ଫୋନ୍ କଲ୍ କରି ବ୍ୟାଙ୍କ ତଥ୍ୟ, ଓଟିପି ଆଦି ନେଇ ଆକାଉଣ୍ଟରୁ ଟଙ୍କା ଲୁଟି ନିଅନ୍ତି । କେତେକ ନିର୍ଦ୍ଦିଷ୍ଟ ରାଜ୍ୟରୁ ଏହି ଫୋନ କଲ୍ ଆସୁଥିବା ବେଳେ କିଛି ଲୋକ ଏହି ନମ୍ବର ସମ୍ପର୍କରେ ଜାଣିଥାନ୍ତି । କେତେକ ଏହାକୁ ରିସିଭ୍ କରନ୍ତି ଓ ଆଉ କେତେକ ଠକଙ୍କ କଲ ଆସୁଥିବା ଜାଣିପାରି କାଟି ଦିଅନ୍ତି । ଠକ ବ୍ୟାଙ୍କ ଆକାଉଣ୍ଟରୁ ଟଙ୍କା ଲୁଟିବାରେ ସଫଳ ହେବା ପର୍ଯ୍ୟନ୍ତ ଏକାଧିକ ଲୋକଙ୍କୁ କଲ୍ କରିଥାଏ । ଯେଉଁଠି ସଫଳ ହୋଇଥାଏ ତା ପରେ ସିମ୍ କାର୍ଡ ବାହାର କରି ଫିଙ୍ଗିଦିଏ । କିନ୍ତୁ ଯେଉଁମାନେ ଠକଙ୍କ ଫୋନ କଲ ଆସୁଥିବା ଜାଣିପାରନ୍ତି ସେମାନେ ତୁରନ୍ତ ସାଇବର ସହାୟତା ଡେସ୍କ ନମ୍ବର(୭୪୪୦୦୦୬୭୦୯)କୁ କଲ୍ କରି ସେହି ନମ୍ବର ସମ୍ପର୍କରେ ସୂଚନା ଦେବାକୁ ପୁଲିସ କମିସନର ଅନୁରୋଧ କରିଛନ୍ତି । ଠକର ନମ୍ବରକୁ ସବୁଦିନ ପାଇଁ ବ୍ଲକ(ବନ୍ଦ) କରାଯାଇ ପାରିବ । ଫଳରେ ଅନ୍ୟ ଜଣେ ଠକାମିରୁ ବର୍ତ୍ତିପାରିବ ।
ପ୍ରଥମ ଘଣ୍ଟାଏ ଗୁରୁତ୍ବପୂର୍ଣ୍ଣ
ଠକେଇର ପରବର୍ତ୍ତୀ ଘଣ୍ଟାଏ ବେଶ୍ ଗୁରୁତ୍ବପୂର୍ଣ୍ଣ ବୋଲି କହିଛନ୍ତି ପୁଲିସ କମିସନର । ଠକାମିର ଶିକାର ହୋଇଥିବା ବ୍ୟକ୍ତି ସାଇବର ସହାୟତା ଡେସ୍କକୁ ଫୋନ୍ କରି ଜଣାଇଲେ ଟଙ୍କା ଠକ ଆକାଉଣ୍ଟକୁ ଯିବା ପରେ ସେଠାରୁ କୁଆଡ଼େ କଲା ସେ ସମ୍ପର୍କରେ ଜାଣିହେବ । ଏହାକୁ ଟ୍ରାକ୍ କରାଯିବା ପରେ ଶେଷ ସମୟରେ ଯେଉଁ ଆକାଉଣ୍ଟରେ ଟଙ୍କା ଥିବ ତାହାକୁ ଅଚଳ କରି ଦିଆଯିବ । ସବୁ ଦିନ ପାଇଁ ଯେମିତି ଅଚଳ କରାଯିବ ସେ ନେଇ ବ୍ୟବସ୍ଥା କରାଯିବ । ଠକେଇ ଟଙ୍କା ଫେରସ୍ତ ପାଇଁ ସବୁ ପ୍ରକାର ଉଦ୍ୟମ କରାଯିବ ।
ଫୋନ କରି ହଇରାଣ କରୁଥିବା ନମ୍ବର ବନ୍ଦ କରାଯିବ
ମହିଳା, ଯୁବତୀ, ଶିଶୁମାନଙ୍କୁ ଅଜଣା ନମ୍ବରରୁ ଫୋନ୍ କରି ହଇରାଣ କରୁଥିବା ଦେଖାଯାଉଛି । ବିଶେଷ କରି ରାଜ୍ୟ ବାହାରୁ ଏଭଳି ନମ୍ବରରୁ କଲ୍ ଆସୁଛି । ଏଭଳି ଅସୁବିଧାର ସମ୍ମୁଖୀନ ହେଲେ ତୁରନ୍ତ ସହାୟତା କେନ୍ଦ୍ରକୁ ଫୋନ କରି ଜଣାଇବା ପାଇଁ ପୁଲିସ କମିସନର କହିଛନ୍ତି । ଏହା ପରେ ସେହି ନମ୍ବରକୁ ବନ୍ଦ କରି ଦିଆଯିବ ।
ବରିଷ୍ଠ ନାଗରିକ, ମହିଳାଙ୍କ ଘରେ ପହଞ୍ଚିବ ସୁବିଧା
ବରିଷ୍ଠ ନାଗରିକ, ମହିଳାମାନଙ୍କୁ ଥାନାକୁ ଦୌଡ଼ିବାକୁ ପଡ଼ିବ ନାହିଁ । ଯଦି ସେମାନେ ସାଇବର ସହାୟତା କେନ୍ଦ୍ରକୁ ଫୋନ କରି ଜଣାଇବେ ତାହେଲେ ସ୍ଥାନୀୟ ଥାନାକୁ ଅବଗତ କରାଯିବ । ସ୍ଥାନୀୟ ଥାନାର କର୍ମଚାରୀ ସେମାନଙ୍କ ଘରକୁ ଯାଇ ଅଭିଯୋଗ ଆଣିପାରିବେ । ଫୋନ ମାଧ୍ୟମରେ ମଧ୍ୟ ଅଭିଯୋଗ ଗ୍ରହଣ କରାଯାଇ ପାରିବ ।
