ସାଇବର ସେଲ୍‌କୁ ପୂରିଲା ମାସେ: ରାଜ୍ୟରୁ କୋଟିଏ ୪୦ ଲକ୍ଷ, ଭୁବନେଶ୍ବରରୁ ୫୨ଲକ୍ଷ ଲୁଟିଛନ୍ତି

ସତ୍ୟଶିଖା (ଭୁବନେଶ୍ୱର) ୧୦/୦୨/୨୦୨୧ : ଭୁବନେଶ୍ୱରରେ ବୃଦ୍ଧି ପାଇଥିବା ସାଇବର ଅପରାଧକୁ ଆଖି ଆଗରେ ରଖି କମିସନରେଟ୍‌ ପୁଲିସ ପକ୍ଷରୁ ଖୋଲା ଯାଇଥିବା ସାଇବର ସେଲ୍‌କୁ ମାସେ ପୂରିଛି । ଏହି ମାସେ ମଧ୍ୟରେ ସାଇବର ସେଲ୍‌କୁ ଆସିଥିବା ୧୨୦୭ଟି ଫୋନ୍‌ କଲ୍‌ରୁ କେବଳ ଭୁବନେଶ୍ୱରରୁ ଆସିଛି ୩୬୮ଟି କଲ୍‌ । ଆଉ ମାସକ ମଧ୍ୟରେ ସାଇବର ଠକମାନେ ରାଜ୍ୟରୁ କୋଟିଏ ୪୦ ଲକ୍ଷ ୫୪ ହଜାର ୯୪୪ ଟଙ୍କା ଲୁଟି ନେଇଥିବା ବେଳ‌େ ଭୁବନେଶ୍ୱରରୁ ଲୁଟିଛନ୍ତି ୫୨ ଲକ୍ଷ ୧୬ ହଜାର ୪୮୩ ଟଙ୍କା । ଏହା କେବଳ ସାଇବର ସେଲ୍‌ରେ ପଞ୍ଜୀକୃତ ହୋଇଥିବା ଅପରାଧର ପରିସଂଖ୍ୟାନ । ଆହୁରି ଅନେକ ଲୋକଲଜ୍ଜା ଭୟରେ ଅଭିଯୋଗ କରିବାକୁ ଆସିନାହାନ୍ତି । ଏ ସବୁକୁ ହିସାବକୁ ନେଲେ ଠକେଇ ପରିମାଣ ଦୁଇ କୋଟି ଟପିବ ବୋଲି ଅନୁମାନ କରାଯାଉଛି ।