ସତ୍ୟଶିଖା (ଭୁବନେଶ୍ୱର) ୦୯/୦୨/୨୦୨୧ : ରାଜ୍ୟରେ ସାଇବର ଅପରାଧୀଙ୍କ କାରନାମା ସବୁ ସୀମା ଟପି ଯାଇଛି । ଗତବର୍ଷ ସାଇବର ଠକ ପୂର୍ବର ସବୁ ରେକର୍ଡ ଭାଙ୍ଗିଛନ୍ତି । ୨୦୧୯ରେ ସାଇବର ଠକେଇ ମାମଲା ସଂଖ୍ୟା ୧୪୭୫ ଥିବାବେଳେ ୨୦୨୦ରେ ଏହା ୩୧ ପ୍ରତିଶତ ଏହି ମାମଲା ବୃଦ୍ଧି ପାଇ ୧୯୩୧ରେ ପହଞ୍ଚିଛି । ସୂଚନାଯୋଗ୍ୟ, ୨୦୧୮ରେ ରାଜ୍ୟରେ କେବଳ ୮୪୩ଟି ସାଇବର ମାମଲା ରୁଜୁ ହୋଇଥିଲା । ଯାହା ପୁଲିସ ପାଇଁ ଏକ ଚିନ୍ତାର ବିଷୟ ପାଲଟିଛି । ଏହା କେବଳ ପଞ୍ଜୀକୃତ ମାମଲା ହୋଇଥିବା ବେଳେ ଠକେଇ ସଂଖ୍ୟା ଏହାର ତିନି ଗୁଣା ହେବ ବୋଲି କୁହାଯାଉଛି ।
ମିଳିଥିବା ତଥ୍ୟ ଅନୁସାରେ, ଯେତେବେଳେ କରୋନା ପ୍ରକୋପ ଓ ଲକ୍ଡାଉନ୍ ଜାରି ରହିଥିଲା; ସେହି ସମୟରେ ସାଇବର ଅପରାଧ ଶୀର୍ଷରେ ପହଞ୍ଚିଥିଲା । କରୋନା ସଂକ୍ରମଣ ଆରମ୍ଭରୁ ଯେତେବେଳେ ସାନିଟାଇଜର, ପିପିଇ କିଟ୍ ଓ ଅନ୍ୟ କୋଭିଡ ସାମଗ୍ରୀର ଅଭାବ ଦେଖା ଦେଇଥିଲା, ସେତେବେଳେ ସାଇବର ଅପରାଧୀ ଅନ୍ଲାଇନ୍ରେ ଜାଲ ବିଜ୍ଞାପନ ଦେଇ ଲୁଟିବା ଆରମ୍ଭ କରି ଦେଇଥିଲେ । କୋଟିକୋଟି ଟଙ୍କା ଠକି ନେଇଥିଲେ ମଧ୍ୟ ଗୋଟିଏ ମାମଲାରେ ମଧ୍ୟ ଠକଙ୍କୁ ଠାବ କରିପାରି ନ ଥିଲା କ୍ରାଇମବ୍ରାଞ୍ଚ । କେବଳ ଆଡଭାଇଜରି ଜାରି କରିବା ସହ ଠକଙ୍କ ଜାଲରେ ନ ପଡ଼ିବା ପାଇଁ ପରାମର୍ଶ ଦେଇ ଚୁପ୍ ବସି ଯାଇଥିଲା । ବିଦେଶୀ ମଦ ଦୋକାନ ବନ୍ଦ ରହିଥିବା ବେଳେ ମଦ ହୋମ୍ ଡେଲିଭରି ନାଁରେ ଚାଲିଥିଲା ବେଧଡ଼କ ଠକେଇ। ଜଣାଶୁଣା ମଦ ଦୋକାନ ନାଁରେ ସାଇବର ଠକ କୋଟିକୋଟି ଟଙ୍କା ଲୁଟି ନେଇଥିଲେ । ସେହିପରି ରାଜଧାନୀର ନାମୀ ରେସ୍ତୋରାଁ ନାଁରେ ଅନ୍ଲାଇନ୍ରେ ଜାଲ ବିଜ୍ଞାପନ ଦେଇ ଲକ୍ଷଲକ୍ଷ ଟଙ୍କା ଉଡାଇ ନେଇଥିଲେ ଲୁଟେରା । ମୋବାଇଲ ଫୋନ୍, ଟିଭି ରିଚାର୍ଜ, କୋରିଅର, ଏଟିଏମ୍ ଓ ଡେବିଟ୍ କାର୍ଡ ଯାଞ୍ଚ ନାଁରେବି ଠକି ଚାଲିଥିଲେ ଠକ । କିନ୍ତୁ କେବଳ ଜଳକା ହୋଇ ରହିଥିଲା ପୁଲିସ ।
ସାଇବର ବିଶେଷଜ୍ଞଙ୍କ କହିବା ଅନୁସାରେ, ଲକ୍ଡାଉନ୍ ସମୟରେ ଲୋକଙ୍କର ଯିବା ଆସିବା ବନ୍ଦ ହୋଇ ଯାଇଥିଲା । ମୋବାଇଲ ଫୋନ୍ ଓ ଅନଲାଇନ ବ୍ୟାଙ୍କିଙ୍ଗ ବ୍ୟବହାର ବଢି ଯାଇଥିଲା । ଯାହା ଫଳରେ ଲୋକ ଅଧିକରୁ ଅଧିକ ଠକେଇର ଶିକାର ହୋଇଥିଲେ । ଯଦି ଠକଙ୍କ ବିରୋଧରେ ପୁଲିସ କାର୍ଯ୍ୟାନୁଷ୍ଠାନ ନେବା କଷ୍ଟକର ଥିଲା; ତାହେଲେ ବ୍ୟାପକ ସଚେତନତା କାହିଁକି ଜାରି କଲା ନାହିଁ ବୋଲି ବିଶେଷଜ୍ଞ ପ୍ରଶ୍ନ କରିଛନ୍ତି । ସଚେତନା ଅଭାବରୁ ଠକେଇ ଶୀର୍ଷରେ ପହଞ୍ଚିଥିଲା ।
ଏଣିକି ସାଇବର ଠକେଇକୁ ରୋକିବା ଲାଗି ପୁଲିସକୁ ଜାତୀୟ କ୍ରାଇମ ରେକର୍ଡ ବ୍ୟୁରୋ(ଏନସିଆରବି) ପକ୍ଷରୁ ୬ଟି ବିଭାଗରେ ୧୮ ଅନଲାଇନ୍ କୋର୍ସ ତାଲିମ ଦିଆଯିବ ବୋଲି ଜଣାପଡିଛି । ସାଇବର ଇନଭେଷ୍ଟିଗେସନ୍, ଇଣ୍ଟେଲିଜେନ୍ସ, ଫାଷ୍ଟ ରେସ୍ପଣ୍ଡର, ସାଇବର ଫରେନସିକ୍, ମ୍ୟାନେଜମେଣ୍ଟ ଓ ପ୍ରସିକ୍ୟୁସନରେ କ୍ଷେତ୍ରରେ ଏହି ତାଲିମ ଦିଆଯିବ । ଏହା ପୂର୍ବରୁ ନ୍ୟାସନାଲ ପୁଲିସ ଏକାଡେମୀ(ଏନପିଏ) ପକ୍ଷରୁ ସାଇବର ତଦନ୍ତ ଉପରେ ତାଲିମ ଦିଆଯାଇଛି ।
