ସତ୍ୟଶିଖା ୨୧.୦୯.୨୦୨୦ : ଅଧିନାୟକ ଭାବେ ବିରାଟ କୋହଲି ଭାରତୀୟ କ୍ରିକେଟ୍ ପାଇଁ ଅନେକ ଅନନ୍ୟ ଓ ବିରଳ ସଫଳତା ଅର୍ଜନ କରିଛନ୍ତି । ହେଲେ ଗୋଟିଏ ବି ଆଇପିଏଲ୍ ଟ୍ରଫି ଜିତିବାର ସୌଭାଗ୍ୟ ତାଙ୍କ ଭାଗ୍ୟରେ ଆଜି ପର୍ଯ୍ୟନ୍ତ ଜୁଟିନାହିଁ । ୨୦୧୧ ମସିହାଠାରୁ ରୟାଲ ଚାଲେଞ୍ଜର୍ସ ଦଳର ନେତୃତ୍ୱ ନେଇ ଅସୁଥିବା କୋହଲି ଏପର୍ଯ୍ୟନ୍ତ ନିଜକୁ ଆଇପିଏଲ୍ ଟ୍ରଫି ଜିତିଥିବା ଅଧିନାୟକଙ୍କ ମଧ୍ୟରେ ନିଜକୁ ସାମିଲ କରି ପାରିନାହାନ୍ତି । ୟୁଏଇରେ ସଂପ୍ରତି ଖେଳାଯାଉଥିବା ଆଇପିଏଲ୍ର ତ୍ରୟୋଦଶ ସଂସ୍କରଣରେ ତାଙ୍କର ଏହି ଦୀର୍ଘ ଦିନର ଆଶା ପୂରଣ ହେବ ବୋଲି ପ୍ରଶଂସକ ଆଶା ରଖିଛନ୍ତି । କୋହଲିଙ୍କ ଏହି ବହୁ ପ୍ରତୀକ୍ଷିତ ‘ପ୍ରଥମ ଆଇପିଏଲ୍ ଟ୍ରଫି’ ବିଜୟ ଅଭିଯାନ ଆଜିଠାରୁ ଆରମ୍ଭ ହେବ । ତାଙ୍କ ନେତୃତ୍ୱlଧୀନ ରୟାଲ୍ ଚାଲେଞ୍ଜର୍ସ ବାଙ୍ଗାଲୋର (ଆରସିବି) ଦଳ ଆଜି ସନରାଇଜର୍ସ ହାଇଦ୍ରାବାଦକୁ ଭେଟିବ । ଚଳିତ ସଂସ୍କରଣରେ ଉଭୟ ଦଳର ଏହା ପ୍ରଥମ ମ୍ୟାଚ୍ ହେବ । କୋହଲିଙ୍କ ପାଖରେ ତାରକା ଖେଳାଳିଙ୍କ ଅଭାବ ନଥିଲେ ମଧ୍ୟ ସ୍ଥିର ପ୍ରଦର୍ଶନ ଦେଇ ଆସୁଥିବା ସନଇାଇଜର୍ସ ହାଇଦ୍ରାବାଦ ବି କୌଣସି ଗୁଣରେ କମ୍ ନୁହେଁ ।
ଆରସିବି ପାଖରେ ମଧ୍ୟ ୟୁଜବେନ୍ଦ୍ର ଚହଲ, ୱାସିଂଟନ ସୁନ୍ଦର, ପବନ ନେଗି, ଆଦାମ ଜାମ୍ପା ଓ ମୋଇନ ଅଲ୍ଲୀଙ୍କ ଭଳି ସ୍ପିନର ଓ ଅଲରାଉଣ୍ଡର ଅଛନ୍ତି । ଶେଷ ଓଭର ବୋଲିଂ କରିବାରେ ଥିବା ଦୁର୍ବଳତା ଦୂର କରିବା ଲାଗି ଆରସିବି ମଧ୍ୟ ଏଥର ଦକ୍ଷିଣ ଆଫ୍ରିକୀୟ ଅଲରାଉଣ୍ଡର କ୍ରିସ୍ ମୋରିସ୍ଙ୍କୁ ନିଜ ଦଳରେ ସାମିଲ କରିଛି । ବ୍ୟାଟିଂରେ ଆରସିବି ପାଖରେ କୋହଲିଙ୍କ ସହ ଏବି ଡି’ଭିଲିୟର୍ସ, ପାର୍ଥିବ ପଟେଲ, ଶିଭମ ଦୁବେ ଓ ଫିଞ୍ଚଙ୍କ ଭଳି ଖେଳାଳି ଅଛନ୍ତି । ସନରାଇଜର୍ସ ଇଂଲଣ୍ଡର ବିଶ୍ୱକପ୍ ବିଜୟୀ ପ୍ରଶିକ୍ଷକ ଟ୍ରେଭର୍ ବେଲିସଙ୍କୁ ନିଜର ପ୍ରଶିକ୍ଷକ ନିଯୁକ୍ତ କରିଛି । ଆରସିବି ସାଇମନ କାଟିଚଙ୍କ ଉପରେ ପୁନର୍ବାର ଆସ୍ଥା ପ୍ରକଟ କରିଛି ।