ସତ୍ୟଶିଖା( ଝାରସୁଗୁଡ଼ା )୦୫.୦୫.୨୦୨୨ : ବ୍ରଜରାନଗର ଉପନିର୍ବାଚନ ପାଇଁ ଆରମ୍ଭ ହୋଇଗଲାଣି ନାମାଙ୍କନ ଦାଖଲ ପ୍ରକ୍ରିୟା । ୧୧ ତାରିଖ ପର୍ୟ୍ୟନ୍ତ ନାମାଙ୍କନ ଦାଖଲ ପ୍ରକ୍ରିୟାର ଶେଷ ପ୍ରକ୍ରିୟା ଥିବା ବେଳେ କୋଭିଡ୍କୁ ଦୃଷ୍ଟିରେ ରଖି ମୋଟ୍ ୨୭୯ ଟି ବୁଥ୍ରେ ମତଦାନ ପାଇଁ ବ୍ୟବସ୍ଥା କରାଯାଇଛି । ଆସନ୍ତା ୩୧ରେ ଭୋଟ୍ ଗ୍ରହଣ ହେବାକୁ ଥିବା ବେଳେ ପ୍ରତି ବୁଥରେ ସର୍ବାଧିକ ୧୨୫୦ ଭୋଟର୍ ସେମାନଙ୍କ ମତାଧିକାର ସାବ୍ୟସ୍ତ କରିବେ । ତେବେ ମତଦାନ ସମୟରେ ରାଜ୍ୟ ସରକାରଙ୍କ ପକ୍ଷରୁ ଜାରି କରାଯାଇଥିବା କୋଭିଡ୍ କଟକଣା ପାଳନ କରାଯିବ ବୋଲି କୁହାଯାଇଛି । ଏସ୍ଆର୍ସି ଓ ସ୍ୱାସ୍ଥ୍ୟ ବିଭାଗ ତରଫରୁ ଜାରି ହେଉଥିବା କୋଭିଡ ନିର୍ଦ୍ଦେଶାବଳୀକୁ ଭୋଟରଙ୍କଠାରୁ ଆରମ୍ଭ କରି ନିର୍ବାଚନ କାର୍ୟ୍ୟରେ ନିୟୋଜିତ ସମସ୍ତ କର୍ମଚାରୀ ଏହାକୁ କଡ଼ାକଡ଼ି ଭାବେ ପାଳନ କରିବା ପାଇଁ ନିର୍ଦ୍ଦେଶ ରହିଛି ବୋଲି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ସୁଶୀଲ କୁମାର ଲୋହାନି ସୂଚନା ଦେଇଛନ୍ତି ।
ତେବେ ବ୍ରଜରାଜନଗର ନିର୍ବାଚନମଣ୍ଡଳୀର ମୋଟ ଭୋଟର ସଂଖ୍ୟା ୨ ଲକ୍ଷ ୧୪ ହଜାର ୭୪୫ ଥିବା ବେଳେ ସେଥିରୁ ପୁରୁଷ ଭୋଟର ସଂଖ୍ୟା ୧ ଲକ୍ଷ ୯ ହଜାର ୯୯୮, ମହିଳା ଭୋଟର ସଂଖ୍ୟା ୧ଲକ୍ଷ ୪ ହଜାର ୭୩୯ ଏବଂ ତୃତୀୟ ଲିଙ୍ଗ ଭୋଟର ସଂଖ୍ୟା ୧୭ ବୋଲି ଜଣାପଡ଼ିଛି । ନିର୍ବାଚନ ପାଇଁ ଇସିଆଇଏଲ ହାଇଦ୍ରାବାଦ କେନ୍ଦ୍ରରୁ ଭିଭିପାଟ ଓ ଇଭିଏମ ଅଣାଯାଇଥିବା ବେଳେ ଏହାର ପ୍ରଥମ ପର୍ୟ୍ୟାୟ ଯାଞ୍ଚ ସରିଛି । ଉପନିର୍ବାଚନରେ ଅଂଶଗ୍ରହଣ କରୁଥିବା ପ୍ରାର୍ଥୀମାନେ ଅପରାଧ ପୃଷ୍ଠଭୂମିର ଥିଲେ ପ୍ରଚାର ସମୟସୀମା ଭିତରେ ତିନି ଥର ଖବରକାଗଜ ଓ ଟିଭି ମାଧ୍ୟମରେ ପ୍ରଚାର କରିବେ । ରାଜନୈତିକ ଦଳଗୁଡ଼ିକ ମଧ୍ୟ ଅପରାଧ ପୃଷ୍ଠଭୂମି ଥିବା ପ୍ରାର୍ଥୀଙ୍କ ବିବରଣୀ ନିର୍ବାଚନ ପ୍ରଚାର ସମୟରେ ଗଣମାଧ୍ୟମରେ ଜନସାଧାରଣଙ୍କୁ ଅବଗତ କରାଇବେ । ଉପନିର୍ବାଚନ ନେଇ ମୁଖ୍ୟ ନିର୍ବାଚନ ଅଧିକାରୀ ଶ୍ରୀ ଲୋହାନୀ ବୁଧବାର ଝାରସୁଗୁଡ଼ା ଜିଲ୍ଲାପାଳ ସରୋଜ କୁମାର ସାମଲଙ୍କ ସହ ଆଲୋଚନା କରି ପ୍ରସ୍ତୁତି ସମୀକ୍ଷା କରିବା ସହ ଉପରୋକ୍ତ ନିର୍ଦ୍ଦେଶାବଳୀ ଜାରି କରିଛନ୍ତି ।
