ସତ୍ୟଶିଖା( ମୁମ୍ବାଇ)୨୫.୦୪.୨୦୨୨: ମେ’ ୨୪ରୁ ୨୮ ତାରିଖ ପର୍ଯ୍ୟନ୍ତ ଲକ୍ଷ୍ନୌରେ ମହିଳା ଟି-୨୦ ଚ୍ୟାଲେଞ୍ଜ୍ ଆୟୋଜିତ ହେବ । ବିସିସିଆଇ ସଭାପତି ସୌରଭ ଗାଙ୍ଗୁଲି ଶନିବାର ସ୍ପୋର୍ଟ୍ସଷ୍ଟାର୍କୁ ଏହି ସୂଚନା ଦେଇଛନ୍ତି । ପୂର୍ବରୁ ଏହି ଟୁର୍ଣ୍ଣାମେଣ୍ଟ୍ ପୁଣେରେ ହେବାର ଥିଲା, ମାତ୍ର ଲକ୍ଷ୍ନୌର ଏକନା ଷ୍ଟାଡିୟମ୍ରେ ଏହାର ଆୟୋଜନ କରିବାକୁ ବୋର୍ଡ ନିଷ୍ପତ୍ତି ନେଇଛି ବୋଲି ସେ କହିଛନ୍ତି । ଭାରତୀୟ ଓ ବିଦେଶୀ ଖେଳାଳିଙ୍କୁ ନେଇ ଛଅଟି ଟିମ୍ ମଧ୍ୟରେ ୨୦୨୩ରେ ପୂର୍ଣ୍ଣକାଳୀନ ମହିଳା ଇଣ୍ଡିଆନ୍ ପ୍ରିମିୟର୍ ଲିଗ୍ ଆରମ୍ଭ ପାଇଁ ବିସିସିଆଇ ଚିନ୍ତା କରୁଥିବା ପ୍ରକାଶ ପାଇବାର ପ୍ରାୟ ମାସକ ପରେ ଗାଙ୍ଗୁଲି ଏହା ସ୍ପଷ୍ଟ କରିଛନ୍ତି । ସେହିପରି କୋଲ୍କାତା ଓ ଅହମ୍ମଦାବାଦ୍ରେ ଶତପ୍ରତିଶତ କ୍ଷମତାରେ ଆଇପିଏଲ୍ ପ୍ଲେଅଫ୍ ଆୟୋଜିତ ହେବ ବୋଲି ପୂର୍ବରୁ ପ୍ରକାଶ ପାଇଥିଲା ।
ମାତ୍ର ଏବେ ଦେଶରେ କୋଭିଡ୍-୧୯ ମାମଲା ବୃଦ୍ଧି ପାଉଥିବାରୁ ପ୍ଲେଅଫ୍ରେ ଦର୍ଶକ ସଂଖ୍ୟା ହ୍ରାସ ହୋଇପାରେ ବୋଲି ଅଟକଳ କରାଯାଇଥିବା ବେଳେ ଶତପ୍ରତିଶତ ଦର୍ଶକଙ୍କୁ ଅନୁମତି ମିଳିବ ବୋଲି ଗାଙ୍ଗୁଲି ସଙ୍କେତ ଦେଇଛନ୍ତି । ତେବେ ବୋର୍ଡ ପରିସ୍ଥିତି ଉପରେ ନିୟମିତ ନଜର ରଖିବ ବୋଲି ସେ କହିଛନ୍ତି । ରଣ୍ଜୀ ଟ୍ରଫିର ନକ୍ଆଉଟ୍ ପର୍ଯ୍ୟାୟ ଜୁନ୍ ୬ରୁ ଆରମ୍ଭ ହେବ ଏବଂ ବେଙ୍ଗାଲୁରୁରେ ସମସ୍ତ ମ୍ୟାଚ୍ ଆୟୋଜିତ ହେବ ବୋଲି ସେ କହିଛନ୍ତି । କ୍ୱାର୍ଟର୍ ଫାଇନାଲ୍ ମ୍ୟାଚ୍ ଜୁନ୍ ୬ରୁ ହେବାକୁ ଥିବାବେଳେ ସେମିଫାଇନାଲ୍ ଓ ଫାଇନାଲ୍ ମ୍ୟାଚ୍ ଯଥାକ୍ରମେ ଜୁନ୍ ୧୪ ଓ ୨୨ରୁ ହେବ ।
ଏହି ସମୟରେ ଅନ୍ୟ ସମସ୍ତ ସେଣ୍ଟର୍ରେ ଭାରୀ ବର୍ଷା ହେବାର ସମ୍ଭାବନା ଥିବାରୁ ଏହାକୁ ଦୃଷ୍ଟିରେ ରଖି ବିସିସିଆଇ ବାକି ମ୍ୟାଚ୍ଗୁଡ଼ିକ ବେଙ୍ଗାଲୁରୁରେ କରିବାକୁ ନିଷ୍ପତ୍ତି ନେଇଛି । ଆଇପିଲ୍ ପରେ ଜୁନ୍ରେ ଭାରତ ଗସ୍ତରେ ଆସିବାକୁ ସାଉଥ୍ ଆଫ୍ରିକା ବିପକ୍ଷ ଟି-୨୦ ସିରିଜ୍ର ଭେନ୍ୟୁ ସମ୍ପର୍କରେ ନିଷ୍ପତ୍ତି ହୋଇଛି । ଏହି ପାଞ୍ଚ ମ୍ୟାଚ୍ ବିଶିଷ୍ଟ ସିରିଜ୍ ଚେନ୍ନାଇ, ବେଙ୍ଗାଲୁରୁ, ନାଗପୁର, ରାଜକୋଟ ଓ ଦିଲ୍ଲୀରେ ଆୟୋଜିତ ହେବ ବୋଲି ବୋର୍ଡ ନିଷ୍ପତ୍ତି ନେଇଛି । ଜୁନ୍ ୯ରୁ ଚେନ୍ନାଇରେ ଏହି ସିରିଜ୍ ଆରମ୍ଭ ହୋଇ ଜୁନ୍ ୧୯ରେ ଦିଲ୍ଲୀରେ ଶେଷହେବ ।
