କଂଗ୍ରେସ ନେତା ସଂଗ୍ରାମ ଜେନାଙ୍କ ପରଲୋକ

ସତ୍ୟଶିଖା(ଭୁବନେଶ୍ୱର ) ୧୯.୦୮ .୨୦୨୧: ଯୁବ କଂଗ୍ରେସ ନେତା ସଂଗ୍ରାମ ଜେନାଙ୍କର ପରଲୋକ ହୋଇଯାଇଛି  । ଦୀର୍ଘଦିନ ଧରି ସେ ଚିକିତ୍ସିତ ହେଉଥିବାବେଳେ ଆଜି ସକାଳେ ଡାକ୍ତରଖାନାରେ ତାଙ୍କର ପରଲୋକ ଘଟିଥିବା ନେଇ ସୂଚନା ଦିଆଯାଇଛି  । ତାଙ୍କ ସାନ ଭାଇ ମନୋଜ ଜେନା ସଂଗ୍ରାମଙ୍କ ପରଲୋକ ନେଇ ସୂଚନା ପ୍ରଦାନ କରିଛନ୍ତି  ।

କରୋନାରେ ପୀଡ଼ିତ ହେବା ପରେ ସେ ଗୁରୁତର ହୋଇପଡ଼ିଥିଲେ  । ଫଳରେ ସେ ହାଇଦ୍ରାବାଦରେ ଚିକିତ୍ସିତ ହେଉଥିଲେ  । ତାଙ୍କୁ ଏକମୋ ଚିକିତ୍ସା ଦିଆଯାଉଥିଲା  । କିଛିଦିନ ତଳେ ସେ ସୁସ୍ଥ ହୋଇ ଆସୁଛନ୍ତି ବୋଲି ସୂଚନା ଦିଆଯାଇଥିଲା  । ନିକଟରେ ତାଙ୍କର ଜନ୍ମଦିନ ପାଳନ କରାଯାଇଥିଲା  । ସେତେବେଳେ ସେ ଭିିଡିଓ କଲରେ କର୍ମୀଙ୍କ ଦ୍ୱାରା ପାଳିତ ଜନ୍ମଦିନ ଉତ୍ସବ ଦେଖିଥିଲେ  । ତେଣୁ ସେ ଖୁବ ଶୀଘ୍ର ସୁସ୍ଥ ହୋଇଯିବେ ବୋଲି ସମସ୍ତେ ଆଶା ବାନ୍ଧିଥିଲେ  ।

ଛାତ୍ର ଜୀବନରୁ ସେ ରାଜନୀତି ପ୍ରତି ଆକôୃଷ୍ଟ ହୋଇ ପଡ଼ିଥିଲେ  । ତାଙ୍କ ବାପା ଜୟଦେବ ଜେନା ପୂର୍ବତନ ମନ୍ତ୍ରୀ ହୋଇଥିବାବେଳେ ଦୁଇ ଥର ପିସିସି ସଭାପତି ମଧ୍ୟ ଥିଲେ  । ଜୟଦେବ ଜେନା ରାଜ୍ୟ ରାଜନୀତିର ଏକ ପ୍ରମୁଖ ଚେହେରା ହୋଇଥିବାରୁ ବାପାଙ୍କ ପଦାନୁସରଣ କରିଥିଲେ ସଂଗ୍ରାମ  । ରାଜ୍ୟରେ ସେ ଥିଲେ ଆଗଧାଡ଼ିର ଯୁବନେତା  । ଯୁବ କଂଗ୍ରେସ ଅଧ୍ୟକ୍ଷ ଭାବେ ଦାୟିତ୍ୱ ନେବା ପରେ ସେ ନିଜର ସାଂଗଠନିକ ଦକ୍ଷତା ପ୍ରତିପାଦିତ କରିଥିଲେ  । ମୃତୁ୍ୟବେଳକୁ ତାଙ୍କୁ ମାତ୍ର ୪୪ ବର୍ଷ ବୟସ ହୋଇଥିଲା  ।

ଲୁଲୁ ମହାପାତ୍ରଙ୍କ ପରେ ରାଜ୍ୟରେ ସଂଗ୍ରାମ ଜେନା ହିଁ ଯୁବକମାନଙ୍କୁ ଏକତ୍ରିତ କରୁଥିଲେ  । ନିର୍ବାଚନ ରାଜନୀତିରେ ସେ ସଫଳ ହୋଇନଥିଲେ ମଧ୍ୟ ରାଜ୍ୟ ରାଜନୀତିରେ ତାଙ୍କର ବେଶ ପତିଆରା ରହିଥିଲା  । ପୂର୍ବତନ ପିସିସି ସଭାପତି ଜୟଦେବ ଜେନାଙ୍କର ସେ ସୁଯୋଗ୍ୟ ସନ୍ତାନ ଥିଲେ । ଆଗାମୀ ଦିନରେ ସେ ହିଁ ରାଜ୍ୟ କଂଗ୍ରେସର ନେତୃତ୍ୱ ନେବେବୋଲି ଅନେକ ଯୁବନେତା ଆଶା ବାନ୍ଧିଥିଲେ  । ତାଙ୍କ ମୃତୁ୍ୟରେ କଂଗ୍ରେସ ରାଜନୀତିରେ ଏକ ଶୂନ୍ୟସ୍ଥାନ ସୃଷ୍ଟି ହୋଇଛି  । ପିସିସି ସଭାପତି ନିରଞ୍ଜନ ପଟ୍ଟନାୟକ, କଟକ ଜିଲ୍ଲା କଂଗ୍ରେସ ସଭାପତି ମାନସ ଚୌଧୁରୀଙ୍କ ଠାରୁ ନେଇ ଅନେକ ବରିଷ୍ଠ ନେତା ଶୋକ ପ୍ରକାଶ କରିଛନ୍ତି  ।