ଦେଶରେ ଚିନ୍ତା ବଢାଇଲାଣି XE ଭ୍ୟାରିଆଣ୍ଟ , ସ୍ୱାସ୍ଥ୍ୟ ମନ୍ତ୍ରଣାଳୟର ଜରୁରୀ ବୈଠକ ଜାରି
ସତ୍ୟଶିଖା( ନୂଆଦିଲ୍ଲୀ )୧୨.୦୪.୨୦୨୨ : ଦେଶରେ କରୋନା ମହାମାରୀର ନୂଆ ଭ୍ୟାରିଆଣ୍ଟ ତଥା ଏକ୍ସଇ ଭ୍ୟାରିଆଣ୍ଟ ଚିହ୍ନଟ ହେବା ପରେ ଏବେ ସଂକ୍ରମଣ ଭୟ ଦ୍ୱିଗୁଣିତ ହୋଇଛି । ଚତୁର୍ଥ ଲହରକୁ ନେଇ ଲୋକଙ୍କ ମନରେ ସେତେଟା ଭୟ ନଥିବା ବେଳେ ଏବେ ପୁଣି ଭୟ ବଢାଇଛି ଏହି ଏକ୍ସଇ ଭ୍ୟାରିଆଣ୍ଟ ।
ତେବେ ଆଜି ଏହି ପ୍ରସଙ୍ଗରେ ଦେଶରେ କରୋନା ସ୍ଥିତି ଓ ଏକ୍ସଇ ଭ୍ୟାରିଆଣ୍ଟକୁ ନେଇ ବସିଛି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର ଜରୁରୀ ବୈଠକ । କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମନସୁଖ୍ ମାଣ୍ଡଭିୟଙ୍କ ଅଧ୍ୟକ୍ଷତାରେ ଏହି ବୈଠକ ବସିଥିବା ବେଳେ ଏଥିରେ ବହୁ ବରିଷ୍ଟ ଅଧିକାରୀ ଓ ବିଶେଷଜ୍ଞମାନେ ସାମିଲ ହୋଇଛନ୍ତି ।
ଏହି ବୈଠକରେ ଓମିକ୍ରନ୍ ଓ ଏକ୍ସଇ ଦୁଇଟି ଯାକ ଭ୍ୟାରିଆଣ୍ଟ ଉପରେ ଆଲୋଚନା କରାଯାଇଥିବା ବେଳେ ଦେଶରେ କିପରି ନୂଆ ଭ୍ୟାରିଆଣ୍ଟର ସଂକ୍ରମଣକୁ ରୋକା ଯାଇ ପାରିବ ସେ ଦିଗରେ ଆଲୋଚନା କରାଯାଇଛି ।
ଗୋଟିଏ ପଟେ ଦେଶରେ ତୃତୀୟ ଲହରର ପ୍ରଭାବ ସମ୍ପୂର୍ଣ୍ଣ ଭାବରେ ହ୍ରାସ ପାଇ ଆସୁଥିବା ବେଳେ ଏକ୍ସଇ ଭ୍ୟାରିଆଣ୍ଟ ବିଶେଷଜ୍ଞମାନଙ୍କୁ ଚିନ୍ତାରେ ପକାଇଛି । ଏପଟେ ସବୁଠାରୁ ବଡ଼ ଆଶ୍ୱସ୍ଥିକର ଖବର ହେଉଛି ଯେ ଏହି ଏକ୍ସଇ ଭ୍ୟାରିଆଣ୍ଟ ସେତେ ମାତ୍ରାରେ ସଂକ୍ରାମକ ନୁହେଁ ଏବଂ ଓମିକ୍ରନ୍ ଠାରୁ ଏହାର ପ୍ରଭାବ କମ୍ ରହିବ ବୋଲି ବିଶେଷଜ୍ଞମାନେ ମତ ପ୍ରକାଶ କରି ଏକ୍ସଇ ପାଇଁ ଭୟବୀତ ନହୋଇ ସତର୍କ ହେବାକୁ ପରାମର୍ଶ ଦେଇଛନ୍ତି ।
