ସତ୍ୟଶିଖା( କଟକ )୧୮.୧୦.୨୦୨୨: ସବ୍ଇନ୍ସପେକ୍ଟର ର୍ୟାଙ୍କର ମିଳିତ ପୁଲିସ୍ ସେବା ପରୀକ୍ଷା (ସିପିଏସ୍ଇ)-୨୦୧୯ ଆସନ୍ତା ୩୦ ଏବଂ ୩୧ରେ ଦୁଇ ଦିନ ଧରି ହେବ । ସଦ୍ୟ ସମାପ୍ତ ସିପିଏସ୍ଇ-୨୦୧୮ରେ ଅନ୍ଲାଇନ୍ ପରୀକ୍ଷାରେ ବିଭ୍ରାଟ ହେବାରୁ ସିପିଏସ୍ଇ-୨୦୧୯ର ଇଂଲିଶ ଏବଂ ଓଡ଼ିଆ ପରୀକ୍ଷା ଓଏମ୍ଆର୍ ସିଟ୍ରେ କରାଯିବ ବୋଲି ସୂଚନା ମିଳିଛି । ପରୀକ୍ଷା ପାଇଁ ଆବେଦନ କରିଥିବା ପ୍ରାର୍ଥୀଙ୍କୁ ଆଡମିଟ୍ କାର୍ଡ ମିଳିନଥିଲେ ମଧ୍ୟ ପ୍ରାର୍ଥୀଙ୍କ ଫୋନ୍ ନମ୍ବରରେ ଆସନ୍ତା ୩୦ ଏବଂ ୩୧ରେ ପରୀକ୍ଷା ହେବ ବୋଲି ଓଡ଼ିଶା ପୁଲିସ୍ ରିକ୍ରୁଟ୍ମେଣ୍ଟ୍ ସଂସ୍ଥା ପକ୍ଷରୁ ମେସେଜ୍ ପଠାଯାଇଛି । ଖୁବଶୀଘ୍ର ପ୍ରାର୍ଥୀମାନେ ରିକ୍ରୁଟ୍ମେଣ୍ଟ୍ ବୋର୍ଡ ୱେବସାଇଟ୍ରେ ଆଡମିଟ୍ କାର୍ଡ ପାଇବେ ବୋଲି ଜଣେ ବରିଷ୍ଠ ଅଧିକାରୀ କହିଛନ୍ତି ।
ସୂଚନାଯୋଗ୍ୟ, ପୁଲିସ୍, ଅଗ୍ନିଶମ ସେବା ସଂସ୍ଥା ଓ ଜେଲ୍ ସଂସ୍ଥାରେ ଏସ୍ଆଇ ର୍ୟାଙ୍କ୍ରେ ନିଯୁକ୍ତି ଲାଗି ୨୦୧୯ ଡିସେମ୍ବରରେ ବିଜ୍ଞପ୍ତି ପ୍ରକାଶ ପାଇଥିଲା । ସମୁଦାୟ ୧୦୪ଟି ପଦ ଲାଗି ହେବାକୁ ଥିବା ଏହି ପରୀକ୍ଷାରେ ପୁଲିସ୍ ଏସ୍ଆଇ ପାହ୍ୟାରେ ୪୭ଟି ପଦ, ଅଗ୍ନିଶମ ସେବା ସଂସ୍ଥାରେ ଷ୍ଟେସନ୍ ଅଫିସର ଲାଗି ୧୩ଟି ଓ ଆସିଷ୍ଟାଣ୍ଟ୍ ଜେଲର୍ ଲାଗି ୪୪ଟି ପଦ ଥିବା ସୂଚନା ମିଳିଛି । ଏହି ପରୀକ୍ଷା ଲାଗି ରାଜ୍ୟର ୨୮ ହଜାରୁ ଅଧିକ ପ୍ରାର୍ଥୀ ଅନ୍ଲାଇନ୍ରେ ଆବେଦନ କରିଛନ୍ତି ।
ପରୀକ୍ଷା ଲାଗି ରାଜ୍ୟରେ ୩୦ଟି ଯାକ ଜିଲ୍ଲା ମୁଖ୍ୟାଳୟରେ ସେଣ୍ଟର୍ କରାଯିବାର ବ୍ୟବସ୍ଥା ରହିଛି । କେଉଁ ଜିଲ୍ଲାରେ କେଉଁ ଅନୁଷ୍ଠାନକୁ ସେଣ୍ଟର ଭାବେ ଚୟନ କରାଯିବ ସେ ବାବଦରେ ଏସ୍ପିମାନଙ୍କୁ ଦାୟିତ୍ୱ ଦିଆଯାଇଛି । ପରୀକ୍ଷା କେନ୍ଦ୍ର ଚୟନ ଖୁବଶୀଘ୍ର ଶେଷ କରି ଉକ୍ତ ରିପୋର୍ଟ ରିକ୍ରୁଟମେଣ୍ଟ୍ ବୋର୍ଡକୁ ପଠାଇବା ପାଇଁ ସଂସ୍ଥା ପକ୍ଷରୁ ନିର୍ଦ୍ଦେଶ ଦିଆଯାଇଛି । ଏଥର ପ୍ରାର୍ଥୀମାନେ ନିଜ ଜିଲ୍ଲାରେ ହିଁ ପରୀକ୍ଷା ଦେବେ । ଏଥିଲାଗି ରିକ୍ରୁଟମେଣ୍ଟ୍ ବୋର୍ଡ ପକ୍ଷରୁ ପ୍ରାର୍ଥୀଙ୍କୁ ପସନ୍ଦର ସେଣ୍ଟର ଚୟନ ଲାଗି ୪ଦିନ ପାଇଁ ସମୟ ସୁଯୋଗ ଦିଆଯାଇଥିଲା । ଉକ୍ତ ସମୟ ସୀମା ମଧ୍ୟରେ ପ୍ରାର୍ଥୀମାନେ ପରୀକ୍ଷା ପାଇଁ ସେମାନଙ୍କ ପସନ୍ଦ ଜିଲ୍ଲା ଦେଇଥିଲେ ବୋଲି ଜଣାଯାଇଛି ।
