ସତ୍ୟଶିଖା (ଭୁବନେଶ୍ୱର) ୦୬/୦୧/୨୦୨୧ : ପଲିଥିନ୍ କାରବାରରେ ରୋକ୍ ଲଗାଇବା କ୍ଷେତ୍ରରେ ଭୁବନେଶ୍ୱର ମହାନଗର ନିଗମ (ବିଏମ୍ସି)କୁ ବଡ଼ ସଫଳତା ମିଳିଛି । ଭଗବାନପୁର ଅଞ୍ଚଳରେ ଥିବା ଏକ ପଲିଥିନ୍ କାରଖାନାରେ ବେଆଇନ ପଲିଥିନ୍ ଦ୍ରବ୍ୟ ପ୍ରସ୍ତୁତ ହେଉଥିବା ବେଳେ ତାହାକୁ ଜବତ କରାଯାଇଛି । ଡିଏନ୍ ରେଗାଲିଆ ମଲ୍ ପଛ ପାର୍ଶ୍ବରେ ଥିବା ଏହି କାରଖାନାକୁ ବିଏମ୍ସି ଦକ୍ଷିଣ-ପଶ୍ଚିମ ଜୋନ୍ର ଏନ୍ଫୋର୍ସମେଣ୍ଟ ସ୍କ୍ୱାଡ୍ ହଠାତ୍ ପରିଦର୍ଶନ କରିବାକୁ ଗଲା ବେଳେ ଅନେକ ପରିମାଣର ବେଆଇନ ପଲିଥିନ୍ କ୍ୟାରିବ୍ୟାଗ୍ ଦେଖିବାକୁ ପାଇଥିଲା । ବିଏମ୍ସି ଟିମ୍ ଓ ସାଙ୍ଗରେ ଯାଇଥିବା ପୁଲିସ୍ ଫୋର୍ସଙ୍କୁ ଦେଖି ସମ୍ପୃକ୍ତ କାରଖାନା ଅଧିକାରୀ ଓ କର୍ମଚାରୀମାନେ ସେଗୁଡ଼ିକୁ ଫିଙ୍ଗି ଦେବାକୁ ଚେଷ୍ଟା କରିଥିଲେ । କିନ୍ତୁ ଏନ୍ଫୋର୍ସମେଣ୍ଟ ଟିମ୍ ସେଗୁଡ଼ିକୁ ଜବତ କରିଥିଲା । ୬୯ଟି ୨୫ କେଜି ବିଶିଷ୍ଟ ପଲିଥିନ୍ କ୍ୟାରିବ୍ୟାଗ୍ ବସ୍ତା ଜବତ କରାଯାଇଛି । ପରବର୍ତୀ ସମୟରେ ଦକ୍ଷିଣ-ପଶ୍ଚିମ ଜୋନ୍ର ଜୋନାଲ୍ ଡେପୁଟି କମିସନର୍ ରବି ନାରାୟଣ ଜେଠୀ ସମ୍ପୃକ୍ତ କାରଖାନାକୁ ଯାଇ ବେଆଇନ ସାମଗ୍ରୀଗୁଡ଼ିକୁ ଦେଖିବା ପରେ ନମୁନା ପରୀକ୍ଷା ପାଇଁ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡକୁ ଖବର ଦେଇଥିଲେ । ଖବର ପାଇ ପ୍ରଦୂଷଣ ନିୟନ୍ତ୍ରଣ ବୋର୍ଡର ପରିବେଶ ବିଜ୍ଞାନୀ ରେବତୀ ମିଶ୍ରଙ୍କ ସହ ତାଙ୍କ ଲ୍ୟାବ୍ ଆନାଲିଷ୍ଟମାନେ ଆସି ବେଆଇନ ପଲିଥିନ୍ ସାମଗ୍ରୀଗୁଡ଼ିକୁ ଚିହ୍ନଟ କରିଥିଲେ ।
ଏହାପରେ ବିଏମ୍ସି ଡେପୁଟି କମିସନର (ସାନିଟେସନ୍) ଶୁଭେନ୍ଦୁ କୁମାର ସାହୁଙ୍କ ନିର୍ଦ୍ଦେଶରେ ବିଏମ୍ସି ଏସ୍ବିଏ ସେଲ୍ର ଏନ୍ଭିରନ୍ମେଣ୍ଟ ଏକ୍ସପର୍ଟ କୀର୍ତ୍ତିମାନ ଷଡ଼ଙ୍ଗୀ ଓ ସୁନିଲ କୁମାର ସାମଲ ଉକ୍ତ କାରଖାନାକୁ ଯାଇ ବେଆଇନ ସାମଗ୍ରୀଗୁଡ଼ିକର ସମୀକ୍ଷା କରିବା ସହ ଏହାର ବିବରଣୀ ବିଏମ୍ସିକୁ ହସ୍ତାନ୍ତର କରିଛନ୍ତି । ଏହି କାରଖାନାରୁ ମୋଟ ୬୯ଟି ୨୫ କେଜି ବିଶିଷ୍ଟ ପଲିଥିନ୍ କ୍ୟାରିବ୍ୟାଗ୍ ବସ୍ତାକୁ ଜବତ କରାଯାଇଛି । କାରଖାନା ମାଲିକଙ୍କୁ ୧୦ ହଜାର ଟଙ୍କା ଜରିମାନା ହୋଇଛି । ଏଥିସହ ଭବିଷ୍ୟତରେ ଏପରି ସାମଗ୍ରୀର ଉତ୍ପାଦନ ନ କରିବାକୁ ଉକ୍ତ କାରଖାନାକୁ କଡ଼ା ଚେତାବନୀ ଦିଆଯାଇଛି । ଭୁବନେଶ୍ୱରକୁ ପଲିଥିନ୍ ଓ ଏକକ ବ୍ୟବହାରଯୁକ୍ତ ପ୍ଲାଷ୍ଟିକ୍ ଦୂରେଇ ରଖି ଏକ ପରିବେଶ ଉପଯୋଗୀ ସହର ଭାବେ ଗଢ଼ି ତୋଳିବାରେ ବିଏମ୍ସିର ଏହି ପ୍ରୟାସ ଜାରି ରହିବ ବୋଲି କର୍ତ୍ତୃପକ୍ଷ ସୂଚନା ଦେଇଛନ୍ତି ।
ସୂଚନାଯୋଗ୍ୟ ଯେ ପୂର୍ବବର୍ଷ ମଧ୍ୟ ଏହି କାରଖାନା ଉପରେ ଚଢ଼ଉ କରାଯାଇଥିଲା । ତେବେ ଏବେ କିପରି କଟକଣା ମାନି କାରଖାନା ଚାଲୁଛି, ତାହା ପରଖିବା ପାଇଁ ଦକ୍ଷିଣ-ପଶ୍ଚିମ ଜୋନ୍ର ଏନ୍ଫୋର୍ସମେଣ୍ଟ ଟିମ୍, ପୁଲିସ ଓ ସେଣ୍ଟ୍ରାଲ ଏନ୍ଫୋର୍ସମେଣ୍ଟ ଟିମ୍ ଆଜି ସେଠାକୁ ଯାଇଥିଲେ ।
