ଶୀତରେ ଲଦାଖ ଛାଡିବାକୁ ପ୍ରସ୍ତୁତ ନୁହେଁ ଚୀନ

ସତ୍ୟଶିଖା (ନୂଆଦିଲ୍ଲୀ) ୩୦/୧୦/୨୦୨୦ : ପୂର୍ବ ଲଦାଖରେ ଭାରତ ଓ ଚୀନ ମଧ୍ୟରେ ଚାଲିଥିବା ଉତ୍ତେଜନା ଶୀତରେ ବି ଥମିବାର ନାଁ ନେଉ ନାହିଁ । ଚୀନ ରକ୍ଷା ମନ୍ତ୍ରାଳୟ କହିଛି ଲଦାଖରେ ହାଡଭଙ୍ଗା ଶୀତରେ ଯବାନଙ୍କୁ ସୁରକ୍ଷିତ ରଖିବା ତଥା ଏହାର ମୁକାବିଲା କରିବା ପାଇଁ ଆଧୁନିକ ଉପକରଣ ସେମାନଙ୍କୁ ଉପଲବ୍ଧ କରାଯାଇଛି । ଏବେ ଚୀନ ରକ୍ଷା ମନ୍ତ୍ରାଳୟର ଏହି କଥାରୁ ଅନୁମାନ କରାଯାଉଛି ଯେ ଇଲାକରେ ମାଇନସ ୪୦ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ପହଞ୍ଚିବା ପରେ ମଧ୍ୟ ଚୀନ ତା’ ସେନାକୁ ପଛକୁ ହଟାଇବ ନାହିଁ । ଚୀନ ରକ୍ଷା ମନ୍ତ୍ରାଳୟ ପ୍ରବକ୍ତା କର୍ନଲ ବୁ କ୍ବାନ ଅନଲାଇନ୍ ବ୍ରିଫିଙ୍ଗରେ ଏଭଳି ମନ୍ତବ୍ୟ ଦେଇଛନ୍ତି ।ସେ ଦାବି କରିଛନ୍ତି ଯେ ୫ ହଜାର ମିଟର ଉଚ୍ଚ ମାଇନସ ୪୦ ଡିଗ୍ରୀ ତାପମାତ୍ରା ଯୁକ୍ତ ଇଲାକାରେ ଏହି ଆଧୁନିକ କ୍ୟାବିନ ଭିତ​ରେ ତାପାମତ୍ରା ୧୫ ଡିଗ୍ରୀ ରହିପାରିବ । ଏହି କ୍ୟାବିନ ବ୍ୟତୀତ ସେମାନଙ୍କୁ ଭିନ୍ନ ଭିନ୍ନ ସ୍ଲିପିଙ୍ଗ ବ୍ୟାଗ, ଡାଉନ ଟ୍ରେନିଂ କୋଟ ଓ କୋଲଡପ୍ରୁଫ ଜୋତା ଉପଲବ୍ଧ କରାଯାଇଛି । ଏ ସମସ୍ତ ବ୍ୟବସ୍ଥା ଥଣ୍ଡାକୁ ରୋକିବା ଉଦ୍ଦେଶ୍ୟରେ କରାଯାଇଛି । ଏହା ସହ ଡ୍ରୋନ ଜରିଆ​ରେ ଚୀନ ତା ଯବାନଙ୍କୁ ତାଜ ଫଳ ଓ ପନିପରିବା ଉପଲବ୍ଧ କରାଇବ ।ସୂଚନାଯୋଗ୍ୟ ପୂର୍ବ ଲଦାଖରେ ମେ ମାସରୁ ଆରମ୍ଭ ହୋଇଥିବା ଏ ବିବାଦ ମଧ୍ୟରେ ହଜାରେ ସୈନିକଙ୍କୁ ଚୀନ ଏଲଏସିରେ ମୁତୟନ କରିଥିଲା । ଏବେ ବି ସେମାନେ ସେମିତି ସେଠାରେ ରହିଛନ୍ତି । ଯଦିଓ ଭାରତ ଓ ଚୀନ ମଧ୍ୟରେ ବିଭିନ୍ନ ସ୍ତରରେ ଆଲୋଚନା ହେଉଥିଲେ ହେଁ ଏ ବିବାଦ କିନ୍ତୁ ଏଯାଏଁ ସମାଧାନ ହୋଇପାରି ନାହିଁ ।