ପ୍ରଧାନମନ୍ତ୍ରୀ ମୋଦିଙ୍କ ସହ ଫୋନରେ କଥା ହେଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ: ନିଟ୍ ଓ ଜେଇଇ ପରୀକ୍ଷା ସ୍ଥଗିତ ରଖିବାକୁ ଅନୁରୋଧ କଲେ ମୁଖ୍ୟମନ୍ତ୍ରୀ l
ସତ୍ୟଶିଖା ( ଭୁବନେଶ୍ୱର/ ନୂଆଦିଲ୍ଲୀ ) ୨୭.୦୮.୨୦୨୦ : ପ୍ରଧାନମନ୍ତ୍ରୀ ମୋଦିଙ୍କ ସହ ଫୋନରେ କଥା ହୋଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ନିଟ୍ ଓ ଜେଇଇ ପରୀକ୍ଷା ସ୍ଥଗିତ ରଖିବାକୁ ଅନୁରୋଧ କରିଛନ୍ତି ମୁଖ୍ୟମନ୍ତ୍ରୀ । କରୋନା ଓ ରାଜ୍ୟରେ ବନ୍ୟା ସ୍ଥିତିକୁ ଦୃଷ୍ଟିରେ NEET ଏବଂ JEE କୁ ସ୍ଥଗିତ ରଖିବାକୁ ଅନୁରୋଧ କରିଛନ୍ତି ନବୀନ । ଅନେକ ଅଞ୍ଚଳରେ ବନ୍ୟା ପରିସ୍ଥିତିରେ ଥିବାରୁ ପରୀକ୍ଷା ଲାଗି ଛାତ୍ର ଛାତ୍ରୀ ଅସୁବିଧାର ସମ୍ମୁଖୀନ ହୋଇପାରନ୍ତି ବୋଲି କହିଲେ ନବୀନ । ଦୁଇ ଦିନ ପୂର୍ବେ କେନ୍ଦ୍ର ଶିକ୍ଷା ମନ୍ତ୍ରୀଙ୍କୁ ମଧ୍ୟ ମୁଖ୍ୟମନ୍ତ୍ରୀ ଚିଠି ଲେଖିଥିଲେ ।
ସୂଚନାମୁତାବକ, NEET ଓ JEE ପରୀକ୍ଷା ଘୁଞ୍ଚାଇବାକୁ ନ୍ୟାସନାଲ ଟେଷ୍ଟିଂ ଏଜେନ୍ସି କୁହାଯାଇଥିଲା । କିନ୍ତୁ ନିର୍ଦ୍ଧାରିତ ସମୟରେ NEET ଓ JEE ପରୀକ୍ଷା ହେବ ବୋଲି ସୂଚନା ମିଳିଛି । ସେପ୍ଟେମ୍ବର ୧୩ରେ ହେବ NEET, ସେପ୍ଟେମ୍ବର ୧ ଓ ୬ରେ ହେବ JEE ପରୀକ୍ଷା । ନ୍ୟାସ୍ନାଲ ଟେଷ୍ଟିଂ ଏଜେନ୍ସି ପକ୍ଷରୁ ଏନେଇ ବିଧିବଦ୍ଧ ଭାବେ ବିଜ୍ଞପ୍ତି ଜାରି ହୋଇଛି । ସାମାଜିକ ଦୂରତ୍ୱ ବଜାୟ ରଖିବା ନିମନ୍ତେ ପରୀକ୍ଷା କେନ୍ଦ୍ର ସଂଖ୍ୟା ଉଲ୍ଲେଖନୀୟ ଭାବେ ବୃଦ୍ଧି କରାଯାଇଛି । ହଲ୍ ମଧ୍ୟରେ ସାମାଜିକ ଦୂରତ୍ୱ ରକ୍ଷା କରିବା ନିମନ୍ତେ ପରୀକ୍ଷାର୍ଥୀମାନେ ଗୋଟିଏ ଗୋଟିଏ ସିଟ୍ ଛାଡ଼ି ବସିବେ । ପୂର୍ବରୁ ଗୋଟିଏ ହଲ୍ରେ ୨୪ ଜଣ ପରୀକ୍ଷାର୍ଥୀଙ୍କ ଲାଗି ସିଟ୍ ବ୍ୟବସ୍ଥା ହେଉଥିବା ବେଳେ ଏଥର ସିଟ୍ ସଂଖ୍ୟା ୧୨କୁ ହ୍ରାସ କରାଯାଇଛି । ସେହିଭଳି ପରୀକ୍ଷା କେନ୍ଦ୍ର ବାହାରେ ମଧ୍ୟ କୋଭିଡ୍-୧୯ ସୁରକ୍ଷା ଲାଗି ବ୍ୟାପକ ବନ୍ଦୋବସ୍ତ କରାଯାଇଛି ।
