ଜନ୍ମ ପ୍ରମାଣ ପତ୍ର ଦେବାକୁ ୨ ହଜାର ଲାଞ୍ଚ ନେଇ ଭିଜିଲାନ୍ସ ହାତରେ ଧରାପଡ଼ିଲେ ସିଏଚ୍‌ସି ସୁପରଭାଇଜର

ସତ୍ୟଶିଖା( ବ୍ରହ୍ମପୁର)୧୯.୦୪.୨୦୨୨ :ଜନ୍ମ ପ୍ରମାଣ ପତ୍ର ଦେବା ବାବଦକୁ ୨ ହଜାର ଟଙ୍କା ଲାଞ୍ଚ ନେଉଥିବା ବେଳେ ବ୍ରହ୍ମପୁର ଭିଜିଲାନ୍ସ ହାତରେ ଧରାପଡ଼ିଲେ ସିଏଚ୍‌ସି ସୁପରଭାଇଜର । ଅଭିଯୁକ୍ତ ସିଏଚ୍‌ସି ସୁପରଭାଇଜର ବାଳକୃଷ୍ଣ ପାଢ଼ୀ ଗୋଷାଣିନୂଆଗାଁର ଅଞ୍ଚଳର ହୋଇଥିବା ବେଳେ ସେ କେଲୁଆପଲ୍ଲୀ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର(ସିଏଚ୍‌ସି)ରେ ମଲ୍ଟି ପ୍ରପୋଷ ହେଲ୍ଟ ସୁପରଭାଇଜର ଭାବେ କାର୍ଯ୍ୟ କରୁଥିଲେ । ତାଙ୍କୁ ଭିଜିଲାନ୍ସ ଗିରଫ କରିଥିବା ଜଣାପଡ଼ିଛି । ସୂଚନାଯୋଗ୍ୟ ଯେ ଗୋଳନ୍ଥରା ଥାନା ଅନ୍ତର୍ଗତ ହନ୍ତୁଳା ଗ୍ରାମର କେ. ହୃଷୀକେଶ ରେଡ୍ଡୀଙ୍କ ଝିଆରିଙ୍କ ଜନ୍ମ ପ୍ରମାଣ ପତ୍ର ଦେବା ନିମନ୍ତେ ଅଭିଯୁକ୍ତ ବାଳକୃଷ୍ଣ ତାଙ୍କୁ ୫ ହଜାର ଟଙ୍କା ଲାଞ୍ଚ ମାଗିଥିଲେ ।

ହୃଷୀକେଶ ଉକ୍ତ ଟଙ୍କା ଦେବାକୁ ମନା କରିବାରୁ ପରବର୍ତ୍ତୀ ସମୟରେ ୨ ହଜାର ଟଙ୍କା ଦେବା ନିମନ୍ତେ ନିଷ୍ପତ୍ତି ହୋଇଥିଲା । ଏ ନେଇ ହୃଷୀକେଶ ବ୍ରହ୍ମପୁର ଭିଜିଲାନ୍ସ ବିଭାଗ ନିକଟରେ ଅଭିଯୋଗ କରିଥିଲେ । ଆଜି ମଧ୍ୟାହ୍ନ ସମୟରେ ସିଏଚ୍‌ସି କାର୍ଯ୍ୟାଳୟକୁ ଯାଇ ବାଳକୃଷ୍ଣ ପାଢ଼ୀଙ୍କ ଦାବି ମୁତାବକ ହୃଷୀକେଶ ତାଙ୍କୁ ଦୁଇ ହଜାର ଟଙ୍କା ଲାଞ୍ଚ ଦେଇଥିଲେ । ସେଠାରେ ପୂର୍ବରୁ ଛକି ରହିଥିବା ଭିଜିଲାନ୍ସ ଟିମ୍ ଚଢ଼ଉ କରି ବାଳକୃଷ୍ଣଙ୍କ ଠାରୁ ଉକ୍ତ ଲାଞ୍ଚ ଟଙ୍କା ଜବତ କରିଥିଲା । ପରେ ମାମଲା ନମ୍ବର ୫/୨୨ରେ ଅଭିଯୁକ୍ତଙ୍କୁ ଗିରଫ କରାଯାଇଥିବା ବ୍ରହ୍ମପୁର ଭିଜିଲାନ୍ସ ଏସ୍‌ପି ତ୍ରିଲୋଚନ ସ୍ୱାଇଁ ସୂଚନା ଦେଇଛନ୍ତି ।