ସତ୍ୟଶିଖା ୧୨ .୦୯.୨୦୨୦ : ସାବଧାନ ! ଏଣିକି କୋଭିଡ୍ ଗାଇଡ୍ଲାଇନ୍ ଉଲ୍ଲଙ୍ଘନ କଲେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ସେ ଦୋକାନୀ ହୁଅନ୍ତୁ ବା ସାଧାରଣ ଲୋକ; ଯେଉଁଠି ନିୟମ ଉଲ୍ଲଙ୍ଘନ କରୁଥିବା ନଜରକୁ ଆସିବେ, ସେହି ସ୍ଥାନରେ ତାଙ୍କଠାରୁ ଜରିମାନା ଆଦାୟ କରାଯିବ । ପୁଲିସ୍ ସେବା ଭବନରେ ପୁଲିସ୍ କମିସନର୍ ସୁଧାଂଶୁ ଷଡ଼ଙ୍ଗୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଆଜି ଏପରି ନିଷ୍ପତ୍ତି ନିଆଯାଇଛି । ଭୁବନେଶ୍ୱର କମିସନରେଟ୍ ପୁଲିସ ଅଞ୍ଚଳରେ ଥିବା ୬ ଜୋନ୍ରେ ୨୪ଟି ସମ୍ବେଦନଶୀଳ ଜାଗା ଚିହ୍ନଟ କରାଯାଇଛି । ସେଠାରେ ତୀକ୍ଷ୍ଣ ନଜର ରଖାଯିବ । ଏହାର ପରିଚାଳନା ପାଇଁ ୩ଜଣ ଡିସିପି ଓ ୨୪ଜଣ ଅନ୍ୟ ଅଧିକାରୀଙ୍କୁ ଦାୟିତ୍ୱ ଦିଆଯାଇଛି । ୧୪ ସେକ୍ସନ୍ ଫୋର୍ସକୁ ନେଇ ଗଠିତ ଏହି ଟିମ୍ ଆଜି ଗୋଟିଏ ଦିନରେ ୭୨୪ ଜଣଙ୍କଠାରୁ ୭୮ ହଜାର ୨୨୨ଟଙ୍କା ଆଦାୟ କରିଛି । ସେଥିମଧ୍ୟରେ ୨୨୨ଜଣ ଦୋକାନୀ ଓ ୫୦୨ଜଣ ସାଧାରଣ ଲୋକ ଥିବା ଜଣାଯାଇଛି ।
“ଏଣିକି ଅମାନିଆଙ୍କୁ ନିସ୍ତାର ନାହିଁ ୨୪ ଅଫିସର୍, ୧୪ ସେକ୍ସନ ଫୋର୍ସକୁ ନେଇ ଟିମ୍ ଗଠନ”
ଜୋନ୍-୧ ଓ ୨ ଦାୟିତ୍ୱ ରେ ଡିସିପି(ସିକ୍ୟୁରିଟି) ନିର୍ମଳ ଶତପଥୀ ରହିଥିବା ବେଳେ ଜୋନ୍-୪ ଓ ୫ ଦାୟିତ୍ୱ ରେ ନବନିଯୁକ୍ତ ଟ୍ରାଫିକ୍ ଡିସିପି ସୌମ୍ୟା ମିଶ୍ର ରହିଛନ୍ତି । ଜୋନ୍ ୩ ଓ ୬ ଦାୟିତ୍ୱ ରେ ଡିସିପି(ଆର୍ମଡ୍) ବିଜୟ କୁମାର ସାହୁ ରହିଛନ୍ତି । ସକାଳୁ ରାତି ପର୍ଯ୍ୟନ୍ତ ଦଫା ଦଫାରେ ଏହି ଟିମ୍ଗୁଡ଼ିକ କାମ କରିବ। ୧ ନମ୍ବର ହାଟ, ମାର୍କେଟ୍ ବିଲ୍ଡିଂ, ସୁନ୍ଦରପଦା ହାଟ, ଭିଏସ୍ଏସ୍ ନଗର ହାଟ, ପଳାସୁଣି, ଇନ୍ଦ୍ରଧନୁ ମାର୍କେଟ୍, ପ୍ରିୟଦର୍ଶିନୀ ମାର୍କେଟ୍, ପଟିଆ ହାଟ ପ୍ରମୁଖ ଉପରେ ତୀକ୍ଷ୍ଣ ନଜର ରଖାଯିବ । ଏଠାରେ ମାସ୍କ, ସାମାଜିକ ଦୂରତା ଓ ପାନ ଛେପ ଏଣେ ତେଣେ ଫିଙ୍ଗିବା ଉପରେ କାର୍ଯ୍ୟାନୁଷ୍ଠାନ ହେବ । ଆଜି ଅପରାହ୍ଣରୁ ଏହି ଚଢ଼ଉ ଆରମ୍ଭ ହେବା ସହ ମୋଟା ଅଙ୍କର ଜରିମାନା ଆଦାୟ ହୋଇଛି । ତେବେ ଏହି ସବୁ ଜାଗା ସହ ଅଧିକାରୀମାନେ ସନ୍ଦେହ କରୁଥିବା କିମ୍ବା ଖବର ପାଇ ମଧ୍ୟ ଅନ୍ୟ ଜାଗାମାନଙ୍କରେ ଚଢ଼ଉ କରିବାକୁ କୁହାଯାଇଛି ।
