ବଦଳିଲା ନିୟମଗିରି ନିୟମ; ଡଙ୍ଗରିଆ ଭାଷାରେ ଜମୁଛି ପ୍ରଚାର

ସତ୍ୟଶିଖା(ରାୟଗଡ଼ ) ୨୯.୦୧.୨୦୨୨ : ୧୫ ବର୍ଷ ପରେ ନିୟମଗିରି ପର୍ବତାଞ୍ଚଳରେ ବଦଳିଲା ନିୟମ । ପୂର୍ବରୁ ନିର୍ବାଚନ ମଇଦାନକୁ କେବଳ ନିୟମଗିରି ସୁରକ୍ଷା ସମିତି ଦ୍ୱାରା ମନୋନୀ ହେଉଥିବା ପ୍ରାର୍ଥୀ ହିଁ ଓହ୍ଲାଉଥିଲେ। ଫଳରେ ସେ ହିଁ ହେଉଥିଲେ ଲୋକଙ୍କ ପ୍ରତିନିଧି । ହେଲେ ଏଥର ବଦଳିଛି ଚିତ୍ର ।  ନିର୍ବାଚନ ମଇଦାନକୁ ଓହ୍ଲାଇଛନ୍ତି ମାଳ ମାଳ ପ୍ରାର୍ଥୀ ।  ଭୋଟରଙ୍କୁ ଆକୃଷ୍ଟ କରିବା ପାଇଁ ଘରକୁ ଘର ବୁଲି ସେମାନେ ବି ଦେଉଛନ୍ତି ମାଳ ମାଳ ପ୍ରତିଶ୍ରୁତି।  ତେଣୁ କିଏ କେତେ ଭୋଟରଙ୍କୁ ଆକୃଷ୍ଟ କରି ପ୍ରତିଶ୍ରୁତିର ପାହାଡ଼ରେ ପୋତି ବିଜୟ ଟିକା ପିନ୍ଧିପାରିବ ତାହା ସମୟ ହିଁ କହିବ ।

ବର୍ତ୍ତମାନ ନିୟମଗିରି ଆଦିମ ଜନଜାତି ଡଙ୍ଗରିଆ କନ୍ଧ ଶିକ୍ଷିତ ହେଲେଣି । ଚଳିତ ପଞ୍ଚାୟତ ନିର୍ବାଚନରେ ନିଜ ନିଜ ମୋତ ଭୋଟ ମାଧ୍ୟମରେ ସାବ୍ୟସ୍ତ କରି ମନ ମୁତାବକ ପ୍ରାର୍ଥୀ ଚୟନ କରିବୁ ବୋଲି ସ୍ପଷ୍ଟ କରିଛନ୍ତି। ତେଣୁ ରାଜ୍ୟର ଅନ୍ୟ ଅଞ୍ଚଳ ପରି ନିୟମଗିରି ପର୍ବତାଞ୍ଚଳରେ ବି ଜମିଲାଣି  ନିର୍ବାଚନୀ ପ୍ରଚାର ।

ଭୋଟରଙ୍କୁ ଆକୃଷ୍ଟ କରିବାକୁ ଘରକୁ ଘର ବୁଲିଲେଣି  ଆଦିମ ଜନଜାତି ଡ଼ଙ୍ଗରିଆ କନ୍ଧ । କିନ୍ତୁ ହାତରେ ନାହିଁ କୌଣସି ଲିଫଲେଟ । କେବଳ ଘରେ ଘରେ ପହଞ୍ଚି  ନିଜ ଡଙ୍ଗରିଆ ଭାଷାରେ କରୁଛନ୍ତି ଭୋଟ ଭିକ୍ଷା । ଅନ୍ୟ ଅଞ୍ଚଳର ପ୍ରାର୍ଥୀଙ୍କ ପରି  ନା ଦେହରେ ଅଛି ଚାକଚକ୍ୟଭରା ପୋଷାକ ନା ବେକରେ ପଡ଼ିଛି ଫୁଲ ମାଳ। ହେଲେ ଜିତିଲେ ସବୁ ସମସ୍ୟାର ସମାଧାନ କରିଦେବେ ବୋଲି ପ୍ରତିଶ୍ରୁତି ବି ଦେବାକୁ ଭୁଲୁ ନାହାନ୍ତି।