ସତ୍ୟଶିଖା(ଭୁବନେଶ୍ୱର ) ୩୧.୦୧.୨୦୨୨ : ଆସୁଛି ପଶ୍ଚିମା ଝଡ଼। ଏହାର ପ୍ରଭାବରେ ରାଜ୍ୟର କିଛି ଜିଲାରେ ଫେବୃଆରୀ ୩ରୁ ବର୍ଷା ଆଶଙ୍କା ରହିଛି। ପରବର୍ତ୍ତୀ ଦୁଇଦିନ ବର୍ଷା ପରିମାଣ ବୃଦ୍ଧି ପାଇବ ବୋଲି ଭୁବନେଶ୍ବର ପାଣିପାଗ ବିଜ୍ଞାନ କେନ୍ଦ୍ର ପୂର୍ବାନୁମାନ କରିଛି। ସମ୍ଭାବ୍ୟ ବର୍ଷାକୁ ନେଇ ଚାଷୀ ଆଶା ଆଶଙ୍କାରେ। ବିଶେଷକରି ପନିପରିବା, ରବି ଫସଲ ଏବଂ ମଣ୍ଡିରେ ଗଦା ହୋଇଥିବା ଧାନକୁ ନେଇ ଚିନ୍ତା ବଢ଼ିଛି। ବର୍ଷା ମାଡ଼ରେ ପନିପରିବା ଏବଂ ରବି ଫସଲ ନଷ୍ଟ ହୋଇଯିବ। ଫସଲକୁ ଚାଷୀ କିପରି ରକ୍ଷା କରିବେ ତାକୁ ନେଇ ଚିନ୍ତା ଲାଗିଲାଣି।
ରାଜ୍ୟର ବିଭିନ୍ନ ସ୍ଥାନରେ ସର୍ବନିମ୍ନ ତାପମାତ୍ରା ସ୍ବାଭାବିକରୁ ତଳକୁ ଖସିବା ଦ୍ବାରା ଶୀତ ଲହରୀ ଦେଖାଦେଇଛି। ଫୁଲବାଣୀରେ ସର୍ବନିମ୍ନ ତାପମାତ୍ରା ୬.୨ ଡିଗ୍ରୀ, କେନ୍ଦୁଝରରେ ୬.୪, ଦାରିଙ୍ଗବାଡିରେ ୭, ଝାରସୁଗୁଡାରେ ୭.୬, ସୋନପୁରରେ ୭.୯, ବୌଦ୍ଧରେ ୮.୫, କୋରାପୁଟ ଓ ଭବାନୀପାଟଣାରେ ୯, ବଲାଙ୍ଗୀରରେ ୯.୫, ହୀରାକୁଦରେ ୯.୬, ନୟାଗଡରେ ୧୦, ସମ୍ବଲପୁରରେ ୧୦.୨, ଅନୁଗୋଳରେ ୧୦.୬, ବାରିପଦାରେ ୧୦.୫, ଭୁବନେଶ୍ବରରେ ୧୧.୨ ଏବଂ କଟକରେ ୧୧.୬ ଡିଗ୍ରୀ ପାରଦ ରହିଛି। ୧୦ ସ୍ଥାନରେ ରାତି ତାପମାତ୍ରା ୧୦ ଡିଗ୍ରୀ ତଳେ ରେକର୍ଡ ହୋଇଛି। ଉପରୋକ୍ତ ଅଞ୍ଚଳ ଗୁଡିକରେ ପ୍ରବଳ ଶୀତ ଅନୁଭୂତ ହେଉଛି।
