ଗ୍ରାହକଙ୍କୁ କ୍ଷମା ମାଗିଲେ ସିଇଓ ଏଚ୍‌ଡିଏଫ୍‌ସି ବ୍ୟାଙ୍କ

ସତ୍ୟଶିଖା (ମୁମ୍ବାଇ) ୦୪/୧୨/୨୦୨୦ : ଦେଶର ଅନ୍ୟତମ ବୃହତ ଘରୋଇ କ୍ଷେତ୍ରର ବ୍ୟାଙ୍କ ଏଚ୍‌ଡିଏଫ୍‌ସି ବ୍ୟାଙ୍କ ଉପରେ ଭାରତୀୟ ରିଜର୍ଭ ବ୍ୟାଙ୍କ ଆଜି କଟକଣା ଲଗାଇବା ସମସ୍ତଙ୍କୁ ଚକିତ କରିଛି । ବିଗତ ତିନି ବର୍ଷରେ ବ୍ୟାଙ୍କର ଡିଜିଟାଲ୍ ସେବା ତିନି ଥର ବ୍ୟାହତ ହେବା ବିଷୟ ବିଚାରକୁ ନେଇ ରିଜର୍ଭ ବ୍ୟାଙ୍କ ନିଜ ଆଡ଼ୁ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି । ଏଚ୍‌ଡିଏଫ୍‌ସି ବ୍ୟାଙ୍କ ନୂଆ ଡିଜିଟାଲ୍ ସେବା ଆରମ୍ଭ କରିପାରିବ ନାହିଁ ଓ ନୂଆ କ୍ରେଡିଟ୍‌ କାର୍ଡ ଜାରି କରିପାରିବ ନାହିଁ ବୋଲି ରିଜର୍ଭ ବ୍ୟାଙ୍କ କହିଛି । ସେବାରେ କାହିଁକି ବିଭ୍ରାଟ ହେଉଛି, ତାହାର କାରଣ ଖୋଜିବା ଏବଂ ଦାୟିତ୍ବବୋଧ ନ୍ୟସ୍ତ କରିବା ଲାଗି ବ୍ୟାଙ୍କର ବୋର୍ଡକୁ କୁହାଯାଇଛି । ୨୦୧୮, ୨୦୧୯ ଓ ୨୦୨୦ରେ ଏଚ୍‌ଡିଏଫ୍‌ସି ବ୍ୟାଙ୍କର ସେବାରେ ବିଭ୍ରାଟ ଦେଖାଦେଇଛି । ୨୦୧୮ ନଭେମ୍ବରରେ ବ୍ୟାଙ୍କ ପକ୍ଷରୁ ମୋବାଇଲ୍ ବ୍ୟାଙ୍କିଙ୍ଗ୍‌ ସେବା ଆରମ୍ଭ କରାଯାଇଥିଲା । ସେଥିରେ ଲଗ୍‌ ଇନ୍ କରିବାକୁ ଗ୍ରାହକମାନେ ଅସୁବିଧା ସାମ୍ନା କରିଥିଲେ । ତେଣୁ ବାଧ୍ୟ ହୋଇ ସେହି ଆପ୍‌କୁ ବ୍ୟାଙ୍କ ପ୍ରତ୍ୟାହାର କରି ପୁରୁଣା ଆପ୍‌କୁ ଚାଲୁ କରିଥିଲା ।୨୦୧୯ ଡିସେମ୍ବରରେ ଏଚ୍‌ଡିଏଫ୍‌ସି ବ୍ୟାଙ୍କର ନେଟ୍ ବ୍ୟାଙ୍କିଙ୍ଗ୍‌ ଓ ମୋବାଇଲ୍‌ ବ୍ୟାଙ୍କିଙ୍ଗ ଦୁଇ ଦିନ ପାଇଁ ବ୍ୟାହତ ହୋଇଥିଲା । ଏହା ଜଣାପଡ଼ିବା ପରେ ପ୍ରକୃତ କାରଣ କ’ଣ ତାହା ଜାଣିବା ଲାଗି ରିଜର୍ଭ ବ୍ୟାଙ୍କ ନିଜ ଆଡ଼ୁ ଏକ ଟିମ୍ ପଠାଇଥିଲା । ଚଳିତ ବର୍ଷ ନଭେମ୍ବର ୨୧ରେ କଂପାନିର ଡାଟା ସେଣ୍ଟର୍‌ରେ ବିଦ୍ୟୁତ ବିଭ୍ରାଟ ଦେଖାଦେବାରୁ ବ୍ୟାଙ୍କର ନେଟ୍‌ ବ୍ୟାଙ୍କିଙ୍ଗ୍‌ ଓ ପେମେଣ୍ଟ୍‌ ସିଷ୍ଟମ ଅଚଳ ହୋଇପଡ଼ିଥିଲା । ବିଭିନ୍ନ ପ୍ରକାର ସେବାକୁ ନେଇ ବ୍ୟାଙ୍କ ଯେଉଁ ବ୍ୟବସ୍ଥା ଗ୍ରହଣ କରିଛି ସେଥିରେ ରିଜର୍ଭ ବ୍ୟାଙ୍କ ସନ୍ତୁଷ୍ଟ ନହେବା ପର୍ଯ୍ୟନ୍ତ ଏହି କଟକଣା ରହିବ । ଆଜି ଭାରତୀୟ ଷ୍ଟେଟ୍‌ ବ୍ୟାଙ୍କର ୟୋନୋ ଆପ୍‌ ବ୍ୟବହାର କରିବାରେ ମଧ୍ୟ ଗ୍ରାହକମାନେ ଅସୁବିଧା‌ ସାମ୍ନା କରିଥିଲେ । ବ୍ୟାଙ୍କର ସିଷ୍ଟମ୍ ଅଚଳ ରହିବା ଯୋଗୁଁ ୟୋନୋକୁ ବ୍ୟବହାର କରିବାରେ ସମସ୍ୟା ଦେଖାଦେଇଥିଲା । ସୋସିଆଲ ମିଡିଆରେ ଏହାକୁ ନେଇ ଗ୍ରାହକମାନେ ଅସନ୍ତୋଷ ବ୍ୟକ୍ତ କରିଥିଲେ ।

ଗ୍ରାହକଙ୍କୁ କ୍ଷମା ମାଗିଲେ ସିଇଓ
ରିଜର୍ଭ ବ୍ୟାଙ୍କ ପକ୍ଷରୁ କଟକଣା ଲଗାଯିବା ପରେ ଗ୍ରାହକମାନଙ୍କୁ ଏଚ୍‌ଡିଏଫ୍‌ସି ବ୍ୟାଙ୍କର ସିଇଓ ଶଶିଧର ଜଗଦ୍ଦିଶନ କ୍ଷମା ପ୍ରାର୍ଥନା କରିଛନ୍ତି । ଏହାକୁ ନେଇ ଚିନ୍ତା କରିବାର କୌଣସି କାରଣ ନାହିଁ । ସମସ୍ୟାର ସମାଧାନ ଲାଗି ଆମେ ଯୁଦ୍ଧକାଳୀନ ଭିତ୍ତିରେ କାର୍ଯ୍ୟ କରୁଛୁ ବୋଲି ସେ ପ୍ରତିଶ୍ରୁତି ଦେଇଛନ୍ତି ।ସେ କହିଛନ୍ତି ଯେ ଏଚ୍‌ଡିଏଫ୍‌ସି ବ୍ୟାଙ୍କ ଠାରୁ ଉଚ୍ଚ ମାନର ସେବା ଓ ଅନୁଭୂତି ପାଇବାକୁ ଗ୍ରାହକମାନେ ସର୍ବଦା ଆଶା କରନ୍ତି । କିନ୍ତୁ କେତେକ କ୍ଷେତ୍ରରେ ଆମେ ସେମାନଙ୍କ ସେହି ଆଶାର ସ୍ତର ପର୍ଯ୍ୟନ୍ତ ପହଞ୍ଚିପାରିନାହୁଁ । ସେଥିପାଇଁ ଆମେ କ୍ଷମା ପ୍ରାର୍ଥନା କରୁଛୁ । ୨୦୧୮ ନଭେମ୍ବର ଓ ୨୦୧୯ ଡିସେମ୍ବରରେ ବିଭ୍ରାଟ ଦେଖାଦେଇଥିଲା । ଏହା ପରେ ଆମର ଆଇଟି ବ୍ୟବସ୍ଥାକୁ ସୁଦୃଢ଼ କରିବା ଲାଗି ଆମେ ବାହାର ବିଶେଷଜ୍ଞଙ୍କ ସହାୟତା ନେଇଥିଲୁ ଏବଂ ‌ତାଙ୍କ ପରାମର୍ଶକୁ କାର୍ଯ୍ୟକାରୀ କରୁଥିଲୁ । ସେହି ଭିତରେ ହଠାତ୍‌ ଚଳିତ ବର୍ଷ ନଭେମ୍ବର ୨୧ରେ ଆଉ ଏକ ବିଭ୍ରାଟ ଦେଖାଦେଇଥିଲା ଯାହାର କାରଣ ହେଉଛି ଡାଟା ସେଣ୍ଟର୍‌ରେ ବିଦ୍ୟୁତ ବିଭ୍ରାଟ । ଯେଉଁ ସବୁ ସ୍ଥାନରେ ଉନ୍ନତିର ଆବଶ୍ୟକତା ରହିଛି ସେଥିପାଇଁ ଆମେ ବିଶେଷଜ୍ଞ ଓ ନିୟାମକ ସଂସ୍ଥା ସହ ମିଶି କାର୍ଯ୍ୟ କରିବୁ । ଆମର ସମସ୍ତ ଡିଜିଟାଲ୍ ଚ୍ୟାନେଲ୍‌ର ଅନୁଭୂତିକୁ ସହଜ କରିବା ଲାଗି ଆମେ କୌଣସି ପ୍ରୟାସ ଛାଡ଼ିବୁ ନାହିଁ ବୋଲି ସେ କହିଛନ୍ତି ।