ହାଇଦ୍ରାବାଦ: ଏକ ବଡ଼ ବିମାନ ଦୁର୍ଘଟଣାରୁ ବର୍ତ୍ତି ଯାଇଛି ଏୟାର ଏସିଆ। ଆଜି ମଝି ଆକାଶରେ ଉଡ଼ୁଥିବା ଏୟାର ଏସିଆର ଏକ ବିମାନର ଗୋଟିଏ ଇଞ୍ଜିନ ହଠାତ୍ ବନ୍ଦ ହୋଇଯାଇଥିଲା। ତେବେ ପାଇଲଟ ଜଣଙ୍କ ଉପସ୍ଥିତି ବୁଦ୍ଧି ଖଟାଇ ହାଇଦ୍ରାବାଦର ରାଜୀବ ଗାନ୍ଧି ଅନ୍ତର୍ଜାତୀୟ ବିମାନ ବନ୍ଦରେ ଏହାକୁ ଅବତରଣ କରାଇଛନ୍ତି। ଏଥିରେ ୭୬ ଜଣ ଯାତ୍ରୀ ରହିଥିଲେ।
ସୂଚନା ଅନୁଯାୟୀ, ଏୟାର ଏସିଆ ଫ୍ଲାଇଟ ଆଇ୫୧୫୪୩ ଜୟପୁରରୁ ହାଇଦ୍ରାବାଦ ଆସୁଥିଲା। ତେବେ ଏହା ଅବତରଣ ପୂର୍ବରୁ ଯାନ୍ତ୍ରିକ ତ୍ରୁଟିର ସମ୍ମୁଖୀନ ହୋଇଥିଲା।
ଆହୁରି ପଢ଼ନ୍ତୁ
ତେବେ ମଧ୍ୟାହ୍ନ ପ୍ରାୟ ୧.୨୫ରେ ବିମାନଟି ସୁରକ୍ଷିତ ଭାବେ ଅବତରଣ କରିଥିବା ସୂଚନା ମିଳିଛି। ତେଲ ଲିକ୍ ଯୋଗୁ ହିଁ ବିମାନର ଗୋଟିଏ ଇଞ୍ଜିନ ଅଚଳ ହୋଇଯାଇଥିବା କୁହାଯାଉଛି। ବିମାନଟି ମଝି ଆକାଶରେ ଉଡ଼ୁଥିବା ବେଳେ ଏଭଳି ସ୍ଥିତି ଉପୁଜିଥିଲା।
ପାଇଲଟ ଜଣଙ୍କ ଏ ସମ୍ପର୍କରେ କଣ୍ଟ୍ରୋଲରୁମକୁ ସୂଚନା ଦେବା ପରେ ପୂରା ଏୟାରପୋର୍ଟରେ ଜରୁରୀ ଆଲର୍ଟ ଜାରି କରାଯାଇଥିଲା। ଇଞ୍ଜିନ ବନ୍ଦ ହୋଇଥିଲେ ହେଁ ପାଇଲଟ ଜଣଙ୍କ ବେଶ ସତର୍କତାର ସହ ବିମାନଟିକୁ ସଫଳତାର ସହ ଅବତରଣ କରାଇବାକୁ ସକ୍ଷମ ହୋଇଛନ୍ତି।
