ସତ୍ୟଶିଖା (ନୂଆଦିଲ୍ଲୀ) ୧୮/୧୧/୨୦୨୦ : ସାର୍ବଜନିକ ଛଠ୍ ପୂଜାକୁ ନେଇ ଦିଲ୍ଲୀରେ ଜାରି ହୋଇଥିବା ପ୍ରତିବନ୍ଧକକୁ ନେଇ ରାଜନୀତି ସରଗରମ ରହିଛି । ବିଜେପି ଏହି ମାମଲାରେ କେଜ୍ରିୱାଲ ସରକାରଙ୍କୁ ବିରୋଧ କରିଛି । ବିଜେପି ସାଂସଦ ତଥା ଦିଲ୍ଲୀର ପୂର୍ବତନ ବିଜେପି ଅଧ୍ୟକ୍ଷ ମନୋଜ ତିୱାରୀ କେଜ୍ରିୱାଲଙ୍କୁ ନମକ ହାରାମ କହିଛନ୍ତି । ମଙ୍ଗଳବାର ଦିନ ମଧ୍ୟ ପୂର୍ବାଂଚଳ ପ୍ରକୋଷ୍ଠର ବିଜେପି କାର୍ଯ୍ୟକର୍ତ୍ତା କେଜ୍ରିୱାଲଙ୍କ ଘର ବାହାରେ ବିରୋଧ ପ୍ରଦର୍ଶନ କରିଥିଲେ । ମନୋଜ ତିୱାରୀ ବୁଧବାର ଦିନ ନିଜର ଅଫିସିଆଲ ଟ୍ୱିଟର ଆକାଉଣ୍ଟରେ ଟ୍ୱିଟ୍ କରିଛନ୍ତି ଯେ, ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ନମକ ହାରାମି । କୋଭିଡ୍ ପାଳନ କରି ଆପଣ ଛଠ୍ ପୂଜା କରିବାକୁ ଦେଉନାହାନ୍ତି କିନ୍ତୁ ମଦ ଦୋକାନ ଓ ବାର ଖୋଲିବାକୁ ଅନୁମତି ଦେଉଛନ୍ତି ।
ଅପରପକ୍ଷରେ ଉତ୍ତର ଦିଲ୍ଲୀ ନଗର ନିଗମ ମେୟର ଜୟ ପ୍ରକାଶ ବୁଧବାର ଦିନ ସାର୍ବଜନିକ ସ୍ଥଳରେ ଛଠ ପୂଜାକୁ ନେଇ ପ୍ରତିବନ୍ଧକ ଲଗାଯାଇଥିବା ନେଇ ଉପରାଜ୍ୟପାଳ ଅନିଲ ବୈଜଳ ଓ କେଜ୍ରିୱାଲଙ୍କୁ ପତ୍ର ଲେଖିବେ ଏବଂ ନିଜ ନିଷ୍ପତ୍ତି ଉପରେ ପୁନର୍ବିଚାର କରିବାକୁ ଅନୁରୋଧ କରିବେ । ଦିଲ୍ଲୀରେ ପାଖାପାଖି ୧୨୦୦ ଛଠ ଘାଟ ରହିଛି । କେନ୍ଦ୍ର ସରକାରଙ୍କ ନିର୍ଦ୍ଦେଶ ପରେ ଦିଲ୍ଲୀ ସରକାର କରୋନା ସଂକ୍ରମଣ ନିୟନ୍ତ୍ରଣ କରିବାକୁ ନଦୀ ତଟ, ମନ୍ଦିର, ଘାଟ ଓ ଅନ୍ୟାନ୍ୟ ସାର୍ବଜନିକ ସ୍ଥଳରେ ଛଠ ପୂଜା ପାଇଁ ପ୍ରତିବନ୍ଧକ ଲଗାଇଥିଲେ ।
ନିର୍ଦ୍ଦେଶ କଡାକଡି ଭାବେ ପାଳନ କରିବାକୁ ସରକାର ସମସ୍ତ ଅଞ୍ଚଳର ଅଧିକାରୀଙ୍କୁ ଆଦେଶ ଦେଇଥିଲେ । ହଠାତ ସଂକ୍ରମଣ ସଂଖ୍ୟା ବୃଦ୍ଧି ପାଇବାରୁ ଏହିଭଳି ପଦକ୍ଷେପ ନିଆଯାଇଛି । ଏହି ନିଷ୍ପତ୍ତିକୁ ନେଇ ବିଜେପି ଓ ଆପ ମଧ୍ୟର ଯୁକ୍ତିତର୍କ ଆରମ୍ଭ ହୋଇଛି । ସାର୍ବଜନିକ ସ୍ଥଳରେ ଛଠ ପୂଜା ନ କରିବାକୁ ନେଇ ବିଜେପି ବିରୋଧ କରିଛି । ଆପ୍ କହିଛି ଯେ ଦିଲ୍ଲୀ ସରକାର ଏହି ପ୍ରସଙ୍ଗରେ କେନ୍ଦ୍ର ସରକାରଙ୍କ ଗାଇଡଲାଇନ ପାଳନ କରୁଛି । ଆପର ବରିଷ୍ଠ ନେତା ଦୁର୍ଗେଶ ପାଠକ ମଙ୍ଗଳବାର ଦିନ କହିଛନ୍ତି ଯେ ବିଜେପି ଶାସିତ କେନ୍ଦ୍ର ସରକାର ଛଠ୍ ପୂଜା ଉତ୍ସବ ରୋକିବାକୁ ଗାଇଡଲାଇନ ଜାରି କରିଥିଲେ । କିନ୍ତୁ ବିଜେପି ଏହାକୁ ନେଇ ରାଜନୀତି କରୁଛି ଏବଂ କେଜ୍ରିୱାଲଙ୍କ ଉପରେ ଆରୋପ ଲଗାଉଛି ।
