ତାମିଲନାଡୁ ବିଧାନସଭା ପାଇଁ ବିଜେପିର ନିର୍ବାଚନ ଇସ୍ତାହାର ଘୋଷଣା

 ସତ୍ୟଶିଖା,(ଚେନ୍ନାଇ) ୨୩.୦୩ .୨୦୨୧ :  ଭାରତୀୟ ଜନତା ପାର୍ଟି(ବିଜେପି) ସୋମବାର ଆଗାମୀ ତାମିଲନାଡୁ ବିଧାନସଭା ନିର୍ବାଚନ ପାଇଁ ନିଜର ନିର୍ବାଚନ ଇସ୍ତାହାର ଘୋଷଣା କରିଛି। ପାର୍ଟି ୫୦ ଲକ୍ଷ ନିଯୁକ୍ତି ସହ ରାସନର ହୋମ ଡେଲିଭରୀ କରିବାକୁ ପ୍ରତିଶ୍ରୁତି ଦେଇଛି। ପ୍ରତିଶ୍ରୁତିରେ ଗୋହତ୍ୟା ବିରୋଧୀ ଅଧିନିୟମ ଲାଗୁ କରିବା ମଧ୍ୟ ସାମିଲ। ବିଜେପି ନିଜର ନିର୍ବାଚନୀ ଇସ୍ତାହାରରେ କହିଛି ଯେ, ଗୋମାଂସ ପାଇଁ କେରଳ ଓ ଅନ୍ୟ ରାଜ୍ୟର ଗୋଚାଲାଣ ଉପରେ କଟକଣା ଲାଗୁ କରାଯିବ।

କେନ୍ଦ୍ର ମନ୍ତ୍ରୀ ନୀତିନ ଗଡକରୀ ନିର୍ବାଚନ ଇସ୍ତାହାର ଜାରି କରି କହିଛନ୍ତି ଯେ, ତାମିଲନାଡୁରେ ଏନଡିଏକୁ ବହୁମତ ମିଳିବ। ଆମର ନୂତନ ସରକାର ଗଠନ ହେବ ଏବଂ ତାମିଲନାଡୁରେ ଏକ  ପ୍ରଗତିଶୀଳ ରାଜ୍ୟ ଭାବେ ବିକଶିତ ହେବ।

ବିଜେପି ଅଖିଳ ଭାରତୀୟ ଆନ୍ନା ଦ୍ରାବିଡ ମୁନେତ୍ର କଡଗମ(ଏଆଇଏଡିଏମକେ) ସହ ମିଶି ନିର୍ବାଚନ ଲଢୁଛି। ଏନଡିଏ ପୁଣି ଥରେ କ୍ଷମତାସୀନ ହେବାକୁ ଅଣ୍ଟା ଭିଡିଛି। ଅନ୍ୟପଟେ ଏମକେ ଷ୍ଟାଲିନଙ୍କ ନେତୃତ୍ଵାଧୀନ ଦ୍ରାବିଡ ମୁନେତ୍ର କଡଗମ(ଡିଏମକେ) ଏଆଇଏଡିଏମକେ ସରକାରକୁ ହଟାଇବା ପାଇଁ ଯଥା ସମ୍ଭବ ପ୍ରୟାସ ଚଳାଇଛି। ଡିଏମକେ ଓ କଂଗ୍ରେସ ମିଶି ନିର୍ବାଚନ ଲଢୁଛନ୍ତି।

ତାମିଲନାଡୁର ୨୩୪ ବିଧାନସଭା ଆସନ ପାଇଁ ନିର୍ବାଚନ ଏପ୍ରିଲ ୬ରେ ହେବାକୁ ଯାଉଛି। ଫଳାଫଳ ମେ ୨ରେ ଘୋଷଣା କରାଯିବ। ତାମିଲନାଡର ୧୫ମ ବିଧାନସଭାର କାର୍ଯ୍ୟକାଳ ୨୦୨୧ ମେ ୨ରେ ସମାପ୍ତ ହେବ। ୨୦୧୬ ବିଧାନସଭା ନିର୍ବାଚନରେ ଏଆଇଏଡିଏମକେ ୧୩୪ ଆସନରେ ବିଜୟୀ ହୋଇଥିବା ବେଳେ ଡିଏମକେ ୮୦ ଏବଂ କଂଗ୍ରେସ ମାତ୍ର ୮ଟି ଆସନରେ ଜିତିବାକୁ ସକ୍ଷମ  ହୋଇଥିଲା। ଏଠାରେ ବିଜେପି ଖାତା ମଧ୍ୟ ଖୋଲି ପାରିନଥିଲା।