

ସତ୍ୟଶିଖା (ଭୁବନେଶ୍ୱର) ୧୦/୧୧/୨୦୨୦ : ବାଲେଶ୍ୱର ଓ ତିର୍ତ୍ତୋଲ ଉପ ନିର୍ବାଚନ ଭୋଟ୍ ଗଣତି ଚାଲିଛି । ବାଲେଶ୍ୱର ସଦର ବିଧାନସଭା ଆସନରେ ଷଷ୍ଠ ରାଉଣ୍ଡ ଭୋଟ୍ ଗଣତି ଶେଷ ହୋଇଛି । ବାଲେଶ୍ୱର ବିଧାନସଭା ଆସନରେ ଏବେ ସୁଦ୍ଧା ବିଜେଡି ପ୍ରାର୍ଥୀ ସ୍ଵରୂପ ଦାସ ଆଗୁଆ ରହିଛନ୍ତି । ମୋଟ୍ ୨୫ଟି ରାଉଣ୍ଡରେ ଭୋଟ୍ ଗଣତି ହେବାକୁ ଥିବା ବେଳେ ବାଲେଶ୍ୱରରେ ଷଷ୍ଠ ରାଉଣ୍ଡ ଭୋଟ୍ ଗଣତି ଶେଷ ହୋଇଛି ।
ଷଷ୍ଠ ରାଉଣ୍ଡ ଭୋଟ୍ ଗଣତି ପରେ ବାଲେଶ୍ୱର ସଦର ବିଧାନସଭା ଆସନରେ ବିଜେଡି ପ୍ରାର୍ଥୀ ସ୍ଵରୂପ ଦାସ ୨୩୯୬ ଖଣ୍ଡ ଭୋଟ୍ ରେ ଆଗୁଆ ରହିଛନ୍ତି । ବିଜେଡି ପ୍ରାର୍ଥୀ ସ୍ଵରୂପ ଦାସଙ୍କୁ ୨୧୯୧୧, ବିଜେପି ପ୍ରାର୍ଥୀ ମାନସ ଦତ୍ତଙ୍କୁ ୧୯୫୧୫ ଓ କଂଗ୍ରେସ ପ୍ରାର୍ଥୀ ମମତା କୁଣ୍ଡୁଙ୍କୁ ୫୨୩ ଖଣ୍ଡ ଭୋଟ୍ ମିଳିଛି ।
ରାଜ୍ୟରେ ଗତ ୩ ତାରିଖ ଦିନ ବାଲେଶ୍ୱର ସଦର ଓ ତିର୍ତ୍ତୋଲ ଆସନରେ ଉପନିର୍ବାଚନ ଅନୁଷ୍ଠିତ ହୋଇଥିଲା । ଆଜି ନିର୍ବାଚନ ହୋଇଥିବା ଆସନରେ ଭୋଟ୍ ଗଣତି ଜାରି ରହିଛି । ଏଥିପାଇଁ ନିର୍ବାଚନ କମିଶନଙ୍କ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ବାଲେଶ୍ୱର ଜିଲ୍ଲାପାଳଙ୍କ ଅଫିସ ଓ ଜଗତସିଂହପୁରର ଏସଭିଏମ୍ କଲେଜରେ ଭୋଟ୍ ଗଣତି ଚାଲିଛି । କୋଭିଡ଼ ସ୍ଥିତିକୁ ଦେଖି ଗୋଟିଏ ରୁମ୍ରେ ୧୪ଟି ଟେବୁଲ୍ ବଦଳରେ ୭ଟି ଟେବୁଲର ବ୍ୟବସ୍ଥା କରାଯାଇଛି । ୩ଟି ଭୋଟ୍ ଗଣତି ହଲ୍ ଗଣତି ଚାଲିଛି ।
ଗଣତି ପାଇଁ ୬୭ ଆରଓ ଓ ଏଆରଓ ନିଯୁକ୍ତ ହୋଇଛନ୍ତି । ବାଲେଶ୍ଵର ପାଇଁ ୩ ଏଆରଓ ଓ ତିର୍ତ୍ତୋଲ ପାଇଁ ୨ ଏଆରଓ ନିଯୁକ୍ତି ହୋଇଛନ୍ତି । ଫଳାଫଳ ବାହାରିବା ପାଇଁ କ୍ୟାମେରା ଓ ଟିଭି ରଖାଯାଇଛି । ଭୋଟ୍ ଗଣନା ସରିବା ପରେ ୫ଟି V.V.P.A.Tରେ ମଧ୍ୟ ଗଣନା ହେବ । ଭୋଟ୍ ଗଣତିକୁ ଦୃଷ୍ଟିରେ ରଖି ତ୍ରିସ୍ତରୀୟ ସୁରକ୍ଷା ବ୍ୟବସ୍ଥା କରାଯାଇଛି ।