ସତ୍ୟଶିଖା ( ଭଦ୍ରକ ) ୨୬ . ୦୮.୨୦୨୦ : ଭଣ୍ଡାରିପୋଖରୀରେ ବାଲି ମାଫିଆଙ୍କ ସହ ଡିଲ୍ କରୁଥିଲେ ନିଜେ ଥାନା ବାବୁ । ବୈତରଣୀ ନଦୀରୁ ଚୋରା ବାଲି ଉଠାଣ ଓ ପରିବହନରେ ମାଫିଆଙ୍କୁ ସହଯୋଗ କରୁଥିଲେ ନିଜେ ଭଣ୍ଡାରୀପୋଖରୀ ଆଇଆଇସି । ନିଜେ ହିଁ ମାଫିଆଙ୍କ ସହ କରୁଥିଲେ ଲକ୍ଷ ଲକ୍ଷ ଟଙ୍କାର ଡିଲ୍ ।
ପ୍ରତ୍ୟେକ ଦିନ ବୈତରଣୀ ନଦୀର ବାଲିପୋଖରୀ ନଦୀ ପଠାରୁ ବେଆଇନ ଭାବେ ଖନନ ହେଉଛି ବାଲି । ଶହ ଶହ ଟନ ଟନ ବାଲି ଚୋରାରେ ବିକ୍ରି କରି ମାଲାମାଲ ହେଉଛନ୍ତି ବାଲି ମାଫିଆ । ଫଳରେ ସରକାରଙ୍କର ଲକ୍ଷ ଲକ୍ଷ ଟଙ୍କାର ରାଜସ୍ୱ ହାନି ହେଉଛି ତା ସାଙ୍ଗକୁ ଦେଖାଦେଉଛି ଆଇନଶୃଙ୍ଖଳା ବ୍ୟବସ୍ଥା । କିନ୍ତୁ ଦୁର୍ଭାଗ୍ୟ ଦୀର୍ଘ ଦିନ ଧରି ମାଫିଆକୁ ସୁରକ୍ଷା ଦେଇ ଆସୁଥିଲା ପୋଲିସ । ଆଉ ପୋଲିସ ବଳରେ ବଳୀୟାନ ହୋଇ ବେଆଇନ ବାଲି ଉଠାଉଥିଲେ ମାଫିଆ । ଭଣ୍ଡାରୀ ପୋଖରୀ ଆଇଆଇସିଙ୍କ ସହ ବାଲି ଡିଲ୍ କରୁଥିବା ବ୍ୟକ୍ତି ଜଣକର କହିବା ହେଲା, ତାଙ୍କ ବାଲି ଟ୍ରାକ୍ଟର ଜବତ ହୋଇଥିଲା । ଆଉ ବିଡିଓଙ୍କ ସହ କଥା ହେବା ପରେ ଗାଡି ଛାଡିଥିଲେ ଆଇଆଇସି । କୌଣସି ଆର୍ଥିକ କାରବାରକୁ ସେ ଅସ୍ୱୀକାର କରିଛନ୍ତି ।
ତେବେ ଘଟଣାର ତଦନ୍ତ କରିବେ ଧାମନଗର ଏସଡିପିଓ । ଭାଇରାଲ୍ ଅଡିଓର ତଦନ୍ତ ନିର୍ଦ୍ଦେଶ ଦେଇଛନ୍ତି ଭଦ୍ରକ ଏସପି । ତଦନ୍ତ ରିପୋର୍ଟ ଆସିଲେ ଯିଏ ଦୋଷୀ ସାବ୍ୟସ୍ତ ହେବ ତାଙ୍କ ବିରୁଦ୍ଧରେ ଆଇନ ଗତ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ଏସପି । ବେଆଇନ କାର୍ଯ୍ୟକୁ ପ୍ରୋତ୍ସାହନ ଦେଉଥିଲା ନିଜେ ପୋଲିସ । ବାଲି ମାଫିଆଙ୍କୁ ସହଯୋଗ କରୁଥିଲେ ନିଜେ ଭଣ୍ଡାରିପୋଖରୀ ଆଇଆଇସି । ଏବେ ପ୍ରଶ୍ନ ଉଠୁଛି, ଏହି ଘଟଣାରେ ଆଇଆଇସିଙ୍କ ବଦଳି ଯଥେଷ୍ଟ କି ? ପୂରା ଘଟଣାରେ କେବଳ ଆଇଆଇସି ନାଁ ଆଉ କାହାର ସମ୍ପୃକ୍ତି ରହିଛି ? ଏବେସୁଦ୍ଧା କାହିଁକି କୌଣସି ବାଲି ମାଫିଆଙ୍କୁ ଗିରଫ କରିପାରିନି ଜିଲ୍ଲା ପୋଲିସ ? ବେଆଇନ ବାଲି ଚାଲାଣର ମୂଳ ପର୍ଯ୍ୟନ୍ତ ଯିବ ତ ପୋଲିସ ?
