ୱାଲ୍ଟ ଡିଜନୀ ୱାର୍ଲଡରେ ଚାଲିଛି କର୍ମଚାରୀ ଛଟେଇ : କରୋନା ପାଇଁ
ସତ୍ୟଶିଖା (ଓର୍ଲାଣ୍ଡୋ) ୩୧/୧୦/୨୦୨୦ : କରୋନା ଭାଇରସ ମହାମାରୀ ଆମେରିକାକୁ ଗୁରୁତର ପ୍ରଭାବିତ କରିଛି । ବାଣିଜ୍ୟ, ବ୍ୟବସାୟ ହ୍ରାସ ହୋଇଥିବା ବେଳେ ସବୁ କ୍ଷେତ୍ରରେ ଛଟେଇ ହେଉଛି । ଏହି କ୍ରମରେ ଏଣ୍ଟରଟୈନମେଣ୍ଟ କମ୍ପାନୀ ୱାଲ୍ଟ ଡିଜନୀରେ କର୍ମଚାରୀ ଛଟେଇ ଆରମ୍ଭ ହୋଇଛି । କମ୍ପାନୀ ୧୧ ହଜାର କର୍ମଚାରୀଙ୍କୁ ଛଟେଇ କରିବେ ବୋଲି ଘୋଷଣା କରିଛନ୍ତି । ଏହି ଛଟେଇ ଚଳିତବର୍ଷ ଶେଷ ପର୍ଯ୍ୟନ୍ତ ଜାରି ରହିବ ବୋଲି କମ୍ପାନୀ ସୂତ୍ରରୁ ସୂଚନା ମିଳିଛି । କମ୍ପାନୀଙ୍କ ଏହି ନିଷ୍ପତ୍ତି ପରେ ଫ୍ଲୋରିଡାସ୍ଥିତ କମ୍ପାନୀରୁ ଛଟେଇ କର୍ମଚାରୀଙ୍କ ସଂଖ୍ୟା ୧୮ ହଜାରରେ ପହଞ୍ଚିଯିବ ବୋଲି ଏକ ଆକଳନ କରାଯାଇଛି ।
କର୍ମଚାରୀଙ୍କ ଛଟେଇ ନେଇ ଡିଜନୀ ୱାର୍ଲଡ ସ୍ଥାନୀୟ ରାଜନେତାଙ୍କୁ ପତ୍ର ମାଧ୍ୟମରେ ଜଣାଇଛନ୍ତି । କମ୍ପାନୀଙ୍କ ସୂଚନା ଅନୁସାରେ ଛଟେଇ ହେବାକୁଥିବା ୧୧ହଜାର ୩୫୦ ୟୁନିୟନ ୱାର୍କରଙ୍କ ମଧ୍ୟରୁ ଅଧିକାଂଶ ପାର୍ଟ ଟାଇମ୍ ୱାର୍କର । ଏହା ପୂର୍ବରୁ କମ୍ପାନୀ ଛଟେଇ କରିଥିବା ୬ ହଜାର ୪ଶହ ନନ୍ ୟୁନିୟନ ୱାର୍କରଙ୍କ ସମ୍ପର୍କରେ ମଧ୍ୟ ପତ୍ର ଲେଖି ଜଣାଇ ଥିଲେ ।
ଆକ୍ଟର୍ସ ଇକ୍ୱଟି ଆସୋସିଏସନ ଅନୁସାରେ କମ୍ପାନୀ ଚଳିତ ସପ୍ତାହ ପ୍ରାରମ୍ଭରେ ୭୨୦ ଡିଜନୀ ୱାର୍ଲଟ ୱାର୍କର୍ସ ଓ ସିଙ୍ଗରଙ୍କୁ ଛଟେଇ କରିଛନ୍ତି । କରୋନା ଭାଇରସ ମହାମାରୀ ଲାଗି ଫ୍ଲୋରିଡା ରିଜର୍ଟରେ ଅନେକ ଦିନରୁ ଲାଇଭ ଏଣ୍ଟରଟୈନମେଣ୍ଟ ସୋ ବନ୍ଦ ହୋଇଯାଇଛି । ଏଣୁ ଏହି କଳାକାରମାନଙ୍କର କୌଣସି କାମ ନଥିଲା । କର୍ମଚାରୀ ଛଟେଇ ଲାଗି ଡିଜନୀ ୱାର୍ଲଡ ଗତମାସରେ ନିଷ୍ପତ୍ତି ନେଇଥିଲେ ।
କମ୍ପାନୀ ମୋଟ ୨୮ ହଜାର କର୍ମଚାରୀଙ୍କୁ ଚାକିରୀରୁ ଛଟେଇ କରିବେ ବୋଲି ଜଣାପଡିଛି । ଏହି କ୍ରମରେ ଛଟେଇ ଏବେ ଆରମ୍ଭ ହୋଇଛି । ଦେଶରେ କରୋନା ଭାଇରସ ସଂକ୍ରମଣ ପରେ ୱାଲ୍ଟ ଡିଜନୀର ସମସ୍ତ ଆମ୍ୟୁଜମେଣ୍ଟ ପାର୍କ ବନ୍ଦ ରହିଛି । ଏଥିରେ ଫ୍ଲୋରିଡା ପାର୍କ କିଛି ସମୟ ପୂର୍ବରୁ ଖୋଲିଥିଲା । ତେବେ କରୋନା ଜନିତ କଟକଣା ଲାଗି ତାହା ମଧ୍ୟ ଠିକରେ ଚାଲି ପାରୁନାହିଁ । ଏଣୁ କମ୍ପାନୀ କର୍ମଚାରୀ ଛଟେଇ ଭଳି କଠିନ ନିଷ୍ପତ୍ତି ନେବାକୁ ବାଧ୍ୟ ହୋଇଛନ୍ତି ।
