ସତ୍ୟଶିଖା ( ସମ୍ୱଲପୁର ) ୯.୦୯.୨୦୨୦ : ପୁଣି ଖାକିରେ କଳଙ୍କ । ଯୁବତୀଙ୍କୁ ପୋଲିସର ଦୁର୍ବ୍ୟବହାର । ଲିଫ୍ଟ ଦେବା ବାହାନାରେ ପିସିଆର ଭ୍ୟାନରେ ଯୁବତୀଙ୍କୁ ପୋଲିସ ଅସଦାଚରଣ କରିଥିବା ଅଭିଯୋଗ ହୋଇଛି । ଏନେଇ ବରଗଡ ଏସପିଙ୍କ ନିକଟରେ ଅଭିଯୋଗ କରିଛନ୍ତି ଯୁବତୀଙ୍କ ପରିବାର ଲୋକ । ସୂଚନାନୁସାରେ, ବରଗଡ ଖଲିଆପାଲି ଗାଁର ଜଣେ ଯୁବତୀ ରବିବାର ସଂନ୍ଧ୍ୟାରେ ନିଜ ସାଙ୍ଗ ଘରକୁ ଯାଇଥିଲେ ।
ପରେ ସେ ନିଜ ଘରକୁ ଫେରୁଥିବା ସମୟରେ ଯୁବତୀଙ୍କୁ ଡାକି ପିସିଆର ଭ୍ୟାନ ଲିଫ୍ଟ ଦେଇଥିଲେ ପୋଲିସ । ହେଲେ ତାଙ୍କୁ ଘରେ ଛାଡିବା ବଦଳରେ ବରଗଡ ସହରର ବିଭିନ୍ନ ଛକ ବୁଲାଇଥିଲେ । ଏପରିକି ଯୁବତୀଙ୍କୁ ପିସିଆର ଭ୍ୟାନ ଭିତରେ ଦୁର୍ବ୍ୟବହାର କରିଥିଲେ ପୋଲିସ । ପିସିଆର ଭ୍ୟାନରେ ୭ ଜଣ ପୋଲିସ କର୍ମଚାରୀ ରହିଥିବାବେଳେ ଜଣେ ମହିଳା କର୍ମଚାରୀ ମଧ୍ୟ ଥିଲେ । ଏପରିକି ନାନା ପ୍ରକାର ଧମକ ଦେବା ସହ ଟଙ୍କା ମାଗିଥିଲେ । ଏନେଇ ଉକ୍ତ ଯୁବତୀଙ୍କ ପରିବାର ଲୋକ ବରଗଡ ଏସପିଙ୍କ ପାଖରେ ଅଭିଯୋଗ କରିବା ସହ ନ୍ୟାୟ ପାଇଁ ନିବେଦନ କରିଛନ୍ତି ।
