ସତ୍ୟଶିଖା (ଭୁବନେଶ୍ୱର) ୨୦/୦୧/୨୦୨୧ : ଛୋଟ ପିଲାଙ୍କ ଠାରୁ ଆରମ୍ଭ କରି ବୟସ୍କଙ୍କ ପର୍ଯ୍ୟନ୍ତ ସମାଜର ବିଭିନ୍ନ ବର୍ଗ ଦ୍ୱାରା ଗ୍ରହଣୀୟ ହୋଇଛି ବ୍ୟାକ୍ପ୍ୟାକ୍ । ବାଇକ୍ ଚାଳକଙ୍କ ଠାରୁ ଆରମ୍ଭ କରି ଆଇଟି କଂପାନିଗୁଡ଼ିକରେ କାର୍ଯ୍ୟ କରୁଥିବା ପ୍ରଫେସନାଲ୍ଙ୍କ ପର୍ଯ୍ୟନ୍ତ ଅନେକ ବର୍ଗର ଲୋକମାନେ ଏହାକୁ ବ୍ୟବହାର କରୁଛନ୍ତି । ଉଭୟ ପୁରୁଷ ଓ ମହିଳାଙ୍କ ଦ୍ୱାରା ଏହା ସମାନ ଭାବେ ଗ୍ରହଣୀୟ ହୋଇଛି । ଷ୍ଟାଇଲ୍ ଦୃଷ୍ଟିରୁ ବ୍ୟାକ୍ପ୍ୟାକ୍ ବେଶ ଆକର୍ଷଣୀୟ ହୋଇଥିବା ବେଳେ ବ୍ୟକ୍ତିତ୍ବ ବିକାଶରେ ମଧ୍ୟ ସହାୟକ ହେଉଛି । କର୍ମକ୍ଷେତ୍ରରେ ଥିବା ଲୋକମାନଙ୍କୁ ଅନେକ ସ୍ଥାନ ଯାତ୍ରା କରିବାକୁ ପଡ଼ୁଥିବାରୁ ମୋବାଇଲ୍, ଚାର୍ଜର, ବ୍ୟାଟେରି, ଲାପ୍ଟପ୍, ଟାବ୍, ପାୱାର ବ୍ୟାଙ୍କ ଆଦିକୁ ସେମାନେ ସବୁ ବେଳେ ନିଜ ପାଖରେ ରଖିବାକୁ ପସନ୍ଦ କରୁଛନ୍ତି ।
ଏହି ସବୁ ଜିନିଷ ନେବା ଲାଗି ପେସାରେ ସକ୍ରିୟ ଥିବା ଲୋକମାନେ ବ୍ୟାକ୍ପ୍ୟାକ୍ ବ୍ୟବହାର କରିବାକୁ ଭୁଲନ୍ତି ନାହିଁ । ଜିନ୍, ଟି-ସାର୍ଟ ପିନ୍ଧୁଥିବା ଯୁବପିଢ଼ିଙ୍କ ଠାରୁ ଆରମ୍ଭ କରି ଫର୍ମାଲ୍ ଓ କାଜୁଆଲ୍ ପୋଷାକ ପରିଧାନ କରୁଥିବା କର୍ପୋରେଟ୍ ଜଗତର ଲୋକମାନେ ମଧ୍ୟ ଏହାକୁ ବ୍ୟବହାର କରୁଥିବା ଦେଖିବାକୁ ମିଳୁଛି । ଲୋକମାନଙ୍କ ଦ୍ୱାରା ବ୍ୟାକ୍ପ୍ୟାକ୍ ଗ୍ରହଣୀୟ ହେବା ପରେ ଏଗୁଡ଼ିକୁ ତିଆରି କରୁଥିବା ସଂସ୍ଥାଗୁଡ଼ିକ ଯୁବବର୍ଗ ଓ ବିଭିନ୍ନ ବୟସ ବର୍ଗର ପୁରୁଷ ଓ ମହିଳାଙ୍କ ରୁଚିକୁ ନଜରରେ ରଖି ଷ୍ଟାଇଲିସ୍ ବ୍ୟାକ୍ପ୍ୟାକ୍ ତିଆରି କରୁଛନ୍ତି । ବ୍ୟାକ୍ପ୍ୟାକ୍ ଏବେ ଷ୍ଟାଇଲ୍ ନୁହେଁ ଏକ ବଡ଼ ଆବଶ୍ୟକତା ଭାବେ ଉଭା ହୋଇଛି । ବ୍ୟାଗ୍ ଓ ବ୍ୟାକ୍ପ୍ୟାକ୍ ବଜାର ଉଭୟ ସଂଗଠିତ ଓ ଅଣ-ସଂଗଠିତ କ୍ଷେତ୍ର ନିୟନ୍ତ୍ରଣରେ ରହିଛି । ସ୍ଥାନୀୟ ବଜାର ଠାରୁ ଆରମ୍ଭ କରି ବଡ଼ ବଡ଼ ମଲ୍ ଓ ସ୍ଵତନ୍ତ୍ର ଷ୍ଟୋର୍ରେ ବ୍ୟାକ୍ପ୍ୟାକ୍ ବିକ୍ରି ହେଉଛି । ବଜାରରେ ବ୍ୟାକ୍ପ୍ୟାକ୍, ବ୍ୟାଗ୍, ଲାପ୍ଟପ୍ ବ୍ୟାଗ୍, ସ୍କୁଲ୍ ବ୍ୟାଗ୍, ମେସେଞ୍ଜର ଓ ସ୍ଲିଙ୍ଗ୍ ବ୍ୟାଗ୍, ଜିମ୍ ବ୍ୟାଗ୍, ବ୍ରିଫ୍କେସ୍, ବେବି ଓ ଡାଇପର୍ ବ୍ୟାଗ୍ ଓ ୱେଷ୍ଟ୍ ବ୍ୟାଗ୍ ଭଳି ବିଭିନ୍ନ ପ୍ରକାର ବ୍ୟାଗ୍ ବିକ୍ରି ହେଉଛି । ଟ୍ରେଣ୍ଡି ଓ ଷ୍ଟାଇଲିସ୍ ହୋଇଥିବାରୁ ବ୍ୟାକ୍ପ୍ୟାକ୍ର ଗ୍ରହଣୀୟତା ଅଧିକ ରହିଛି ।
