ସତ୍ୟଶିଖା (ଭୁବନେଶ୍ୱର) ୧୬/୧୧/୨୦୨୦ : ଆଉ ଜଣେ ଭଣ୍ଡ ବାବାଙ୍କ କଳା କାରନାମା । ଯାହାର ପର୍ଦ୍ଦାଫାଶ କରିଛି ନ୍ୟୁଜ୍ ସେଭେନ୍ । ନିଜକୁ ଆତ୍ମଘୋଷିତ ବାବା କହୁଛନ୍ତି କିନ୍ତୁ ଇଏ ବି ନୀତି, ଆଦର୍ଶ ଓ ସଂସ୍କାରଠାରୁ ଉର୍ଦ୍ଧ୍ବରେ । ଇସ୍କନ ନାଁରେ ମନ୍ଦିର ପ୍ରତିଷ୍ଠା କରି କାରନାମା ଚଳାଇଛନ୍ତି ବାବା ବ୍ରଜବନ୍ଧୁ । ଏହି ଆତ୍ମଘୋଷିତ ବାବା କିଏ ? କ’ଣ ଚାଲିଛି ଏହି ଆଶ୍ରମରେ ତାର ଖୁଲାସା କରିଛି ନ୍ୟୁଜ୍ ସେଭେନ୍ ।
ଏହି ମନ୍ଦିର ବା ଆଶ୍ରମ ହେଉଛି ଶ୍ରୀ ଶ୍ରୀ ନିଳାଦ୍ରୀ ନାଥ ମନ୍ଦିର (ଇସ୍କନ) ନାମହଟ୍ଟ ସେଣ୍ଟର, ରାଜନଗର । ଏହି ନାମର ଠିକ୍ ତଳେ ଲେଖା ହୋଇଛି ସଂସ୍ଥାପକ, ଆଚାର୍ଯ୍ୟ ଶ୍ରୀ ଶ୍ରୀମଦ ଏସି ଭକ୍ତି ବେଦାନ୍ତ ସ୍ୱାମୀ ପ୍ରଭୁପାଦ । ଏହି ମନ୍ଦିରଟି ରହିଛି କେନ୍ଦ୍ରାପଡା ଜିଲ୍ଲା ରାଜନଗରରେ । ଆଉ ଏହି ମନ୍ଦିରର ମୁଖ୍ୟ ତଥା ମହନ୍ତ ହେଉଛନ୍ତି ବାବା ବ୍ରଜବନ୍ଧୁ ଦାସ । ବାସ୍ତବରେ ଇଏ ହେଉଛନ୍ତି ରାଜନଗର ଗଜରାଜପୁରର ବିକାଶ ମଲ୍ଲିକ, ଯିଏକି ନିଜକୁ ବ୍ରଜବନ୍ଧୁ ଦାସ ବୋଲି ପରିଚୟ ଦେଉଛନ୍ତି । ଏହି ବାବା ହୋଇଛନ୍ତି ବିକାଶରୁ ବ୍ରଜବନ୍ଧୁ । ନିଜକୁ ବୋଲାଉଛନ୍ତି ଆତ୍ମଘୋଷିତ ବାବା । ୨୦୧୩ ମସିହାରେ ଜଗନ୍ନାଥଙ୍କ ବିଗ୍ରହ ପ୍ରତିଷ୍ଠା କରି ମନ୍ଦିର ଆରମ୍ଭ କରିଥିଲେ । ଏହା ଇସ୍କନ ଅନୁମୋଦିତ ବୋଲି ପ୍ରଚାର କରିବା ସହିତ ଇସ୍କନ ମଠ ନାଁରେ ଟଙ୍କା ଆଦାୟ କରିଥିଲେ । ଇସ୍କନପ୍ରେମୀଙ୍କର ସେହି ଟଙ୍କାରେ ଠିଆ ହୋଇଛି ଏହି ମନ୍ଦିର ।
ତେବେ ମିଳିଥିବା ଚିଠିରୁ ସ୍ପଷ୍ଟ ଯେ, ଏହା ଇସ୍କନ ମନ୍ଦିର ଅନୁମୋଦିତ ନୁହେଁ । ଆଉ ଏହି ଚିଠି ହିଁ ହେଉଛି ତାର ପ୍ରମାଣ । ଏହି ମନ୍ଦିର ଇସ୍କନ ଅଧୀନରେ ନାହିଁ ବୋଲି ଇସ୍କନ ତରଫରୁ ସ୍ପଷ୍ଟ ଭାବେ ଏଥିରେ ଉଲ୍ଲେଖ ରହିଛି । ଇସ୍କନର ଅନୁମୋଦନ ପାଇଁ କରାଯାଇଥିବା ଆବେଦନକୁ ଖାରଜ କରାଯିବା ସହିତ ଏହା ଇସ୍କନର କୌଣସି ନିୟମାବଳୀ ପାଳନ କରୁନଥିବା ଏଥିରେ ଉଲ୍ଲେଖ ରହିଛି । ବାବାଙ୍କ ନାଁରେ ରହିଛି ଅନେକ କେଳେଙ୍କାରୀ । ବାବା ବ୍ରଜବନ୍ଧୁଙ୍କ ବିରୋଧରେ ସ୍ଥାନୀୟ ଲୋକଙ୍କର ମଧ୍ୟ ରହିଛି ଅଭିଯୋଗର ଲମ୍ବା ଫର୍ଦ୍ଦ ।
ବ୍ରଜବନ୍ଧୁ ନିଜକୁ ଆତ୍ମଘୋଷିତ ବାବା କହୁଛନ୍ତି । ନିଶ୍ଚିତ ଭାବେ ସେ ସଂସ୍କାର ଧର୍ମୀ ହୋଇଥିବା କଥା । କିନ୍ତୁ ଯିଏ ସଂସ୍କାର କ’ଣ ଜାଣିନାହାନ୍ତି । ନିଜ ବାପାଙ୍କୁ ମଧ୍ୟ ମନ୍ଦିର ଭିତରକୁ ଯିବାକୁ ଦେଉନାହାନ୍ତି ସେ ସଂସ୍କାରକ ବା ବାବା ହେବ କେମିତି । ଏକଥା ଖୋଦ୍ ବ୍ରଜବନ୍ଧୁଙ୍କ ବାବାଙ୍କ କଥାରୁ ଜଣାପଡିଛି ।
