ମୁମ୍ବାଇ: ମହାରାଷ୍ଟ୍ରରେ କରୋନା ସଂକ୍ରମଣ ଦ୍ରୁତଗତିରେ ବଢ଼ୁଥିବାରୁ ଏଠାରେ ପୁଣିଥରେ ଫୁଲ ଲକଡାଉନ ଲାଗୁ ହେବ ବୋଲି ଚର୍ଚ୍ଚା ଜୋର ଧରିଛି। ଏପରି କି ଆଜି ସକାଳୁ ସୋଶାଲ ମିଡିଆରେ ଲକଡାଉନ ଲାଗୁ ହେବା ସମ୍ପର୍କରେ ଖବର ଘୁରିବୁଲିବାରେ ଲାଗିଛି। ତେବେ ଖବରକୁ ନେଇ ଚାରିଆଡ଼େ ଚଳପ୍ରଚଳ ଅଧିକ ବଢ଼ିଯିବାରୁ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ଟ୍ୱିଟ କରି ସମସ୍ତଙ୍କୁ ପ୍ରକୃତ ତଥ୍ୟ ଦେଇଛନ୍ତି।
ସେ କହିଛନ୍ତି, ମହାରାଷ୍ଟ୍ରରେ ଏବେ କୌଣସି ପ୍ରକାରର ଲକଡାଉନ ଲାଗୁ କରାଯାଇ ନାହିଁ। କିନ୍ତୁ ଲୋକମାନେ ଯଥା ସମ୍ଭବ ଭିଡ଼ଠାରୁ ନିଜକୁ ଦୂରେଇ ରଖନ୍ତୁ। ଲୋକମାନେ ସୁରକ୍ଷିତ ରଖିବା ପାଇଁ ସରକାରଙ୍କ ଦ୍ୱାରା ପ୍ରଦତ୍ତ ଗାଇଡଲାଇନ ପାଳନ କରନ୍ତୁ ବୋଲି ସେ ନିବେଦନ କରିଛନ୍ତି।
ଆହୁରି ପଢ଼ନ୍ତୁ
ଜୁନ୍ ୧ରୁ ମହାରାଷ୍ଟ୍ରରେ ଲାଗୁ କଟକଣା କୋହଳ କରାଯାଇଛି। ନନ୍ କଣ୍ଟେନମେଣ୍ଟ ଜୋନରେ ଲୋକମାନେ ସକାଳ ୫ରୁ ସନ୍ଧ୍ୟା ୭ଟା ଯାଏ ବାହାରେ ବୁଲିବାର ଅନୁମତି ପାଇଥିବା ବେଳେ ଦୋକାନ ଗୁଡ଼ିକ ସକାଳ ୯ଟାରୁ ସନ୍ଧ୍ୟା ୫ ଯାଏ ଖୋଲୁଛି। ହେଲେ ସଂକ୍ରମଣ ବଢ଼ୁଥିବାରୁ ସବୁ କୋହଳ ନିୟମକୁ ପୁଣିଥରେ ସରକାର ପ୍ରତ୍ୟାହାର କରିବାକୁ ଯୋଜନା କରୁଛନ୍ତି ବୋଲି ସୋଶାଲ ମିଡିଆରେ ଭାଇରାଲ ହେବାରେ ଲାଗିଥିଲା। ଏହାପରେ ଉଦ୍ଧବ ଠାକରେ ଟ୍ୱିଟ କରି ପ୍ରକୃତ ତଥ୍ୟ ଦେଇଛନ୍ତି।
ବିଧାୟକ ଆଦିତ୍ୟ ଠାକରେ କହିଛନ୍ତି, ଲୋକମାନେ ଲକଡାଉନ ସମ୍ପର୍କିତ ଫେକ ନ୍ୟୁଜରେ ବିଶ୍ୱାସ କରନ୍ତୁ ନାହିଁ। ବର୍ତ୍ତମାନ ସବୁ କିଛି ଆରମ୍ଭ କରିବା ମିଶନ ଜାରି ରହିଛି। ମୁଖ୍ୟମନ୍ତ୍ରୀ ଉଦ୍ଧବ ଠାକରେଜୀ ସମସ୍ତଙ୍କୁ ସାମାଜିକ ଦୂରତା ପାଳନ କରିବାକୁ ନିବେଦନ କରିଛନ୍ତି। ଲୋକଙ୍କ ସୁରକ୍ଷା ହିଁ ଆମ ପାଇଁ ଗୁରୁତ୍ୱପୂର୍ଣ୍ଣ ଥିଲା ଓ ଆଗକୁ ମଧ୍ୟ ରହିବ ବୋଲି ସେ କହିଛନ୍ତି।
