ସତ୍ୟଶିଖା(ଭୁବନେଶ୍ୱର) ୧୫.୧୧.୨୦୨୧: ସରକାରଙ୍କ ପ୍ରସ୍ତାବିତ ‘ମୋ ଅଟୋ’ ଯୋଜନାକୁ ବିରୋଧ । ଏହାର ପ୍ରତିବାଦରେ ଭୁବନେଶ୍ୱରରେ ଆନ୍ଦୋଳନକୁ ଓହ୍ଲାଇଛନ୍ତି ଅଟୋ ଚାଳକ । ଫଳରେ ପ୍ରାୟ ୨ ଲକ୍ଷ ଅଟୋ ଚଳାଚଳ ଆଜି ବନ୍ଦ ରହିଛି । ‘ମୋ ବସ’ ଭଳି କଟକ-ଭୁବନେଶ୍ୱରରେ ମୋ ଅଟୋ ସେବା ଆରମ୍ଭ କରିବାକୁ ଯାଉଛନ୍ତି ସରକାର । ଏଭଳି ପ୍ରସ୍ତାବ ଆସିବା ପରେ ଭୟଭୀତ ହୋଇପଡ଼ିଛନ୍ତି ଅଟୋ ଉପରେ ନିର୍ଭର କରି ଚଳୁଥିବା ଲୋକେ । ପ୍ରସ୍ତାବିତ ମୋ ଅଟୋ ଯୋଜନାରେ ଇ-ଅଟୋ ଚଳାଚଳ ପାଇଁ ସରକାର ଯୋଜନା କରୁଛନ୍ତି ।
ଏଭଳି ହେଲେ ସରକାରୀ ଯୋଜନା ସହ ଘରୋଇ ଅଟୋ ଚାଳକ ପ୍ରତିଯୋଗୀତା କରିପାରିବେ ନାହିଁ ବୋଲି ଆଶଙ୍କା କରୁଛନ୍ତି । ତେଣୁ ଆନ୍ଦୋଳନ ଜରିଆରେ ସରକାରଙ୍କ ପ୍ରସ୍ତାବକୁ ବିରୋଧ କରୁଛନ୍ତି । ଯେଉଁମାନେ ବନ୍ଦକୁ ନମାନି ରାସ୍ତାକୁ ଓହ୍ଲାଇଛନ୍ତି ହାତରେ ଠେଙ୍ଗା, ବାଡ଼ି ଧରି ସେହି ଅଟୋ ଚାଳକଙ୍କୁ ରାସ୍ତାରେ ଅଟକାଉଛନ୍ତି । ଆଜି ଭୁବନେଶ୍ୱରରେ ଅଟୋକୁ ଅଟକାଇ ଗୁରୁତ୍ୱପୂର୍ଣ୍ଣ କାର୍ଯ୍ୟରେ ଯାଉଥିବା କିଛି ଯାତ୍ରୀଙ୍କୁ ଅଟୋରୁ ଓହ୍ଲାଇ ଦେଇଥିଲେ । ଯାହାକୁ ନେଇ ଯାତ୍ରୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା ।
