ସତ୍ୟଶିଖା (ମୁମ୍ବାଇ) ୭/୧୧/୨୦୨୦ : ବଲିଉଡ ଅଭିନେତା ଅକ୍ଷୟ କୁମାରଙ୍କ ଫିଲ୍ମ ‘ଲକ୍ଷ୍ମୀ’ ଆସନ୍ତା ୯ ତାରିଖରେ ରିଲିଜ ହେବ । ଫିଲ୍ମର ଗୀତ ‘ଅବ ହାମାରୀ ବାରି’ ରିଲିଜ ହୋଇଛି । ଅକ୍ଷୟ କୁମାର ସୋସିଆଲ ମିଡ଼ିଆରେ ଏକ ଭିଡିଓ ସେୟାର କରିଛନ୍ତି । ଏହି ଭିଡିଓରେ ଅକ୍ଷୟ କୁମାର କିନ୍ନରଙ୍କୁ ସମର୍ଥନ କରିଛନ୍ତି । ଭିଡିଓରେ ଅକ୍ଷୟଙ୍କ ସହ କିଆରା ଆଡଭାନୀ ଓ ଲକ୍ଷ୍ମୀ ନାରାୟଣ ତ୍ରିପାଠୀ ମଧ୍ୟ ନଜର ଆସିଛନ୍ତି । ଏହି ଫିଲ୍ମରେ ଅକ୍ଷୟ କୁମାର ଜଣେ କିନ୍ନରଙ୍କ ଭୂମିକାରେ ଅଭିନୟ କରିଛନ୍ତି ।
ଭିଡିଓ ଜରିଆରେ ଅକ୍ଷୟ କୁମାର ଦେଶବାସୀଙ୍କୁ କିନ୍ନରଙ୍କ ପ୍ରତି ନିଜ ଦୃଷ୍ଟିକୋଣ ବଦଳାଇବାକୁ ଅପିଲ କରିଛନ୍ତି । ଭିଡିଓ ସେୟାର କରି ଅକ୍ଷୟ କୁମାର କ୍ୟାପସନରେ ଲେଖିଛନ୍ତି, ‘ଏବେ ଆମ ପାଳି, ଦୃଷ୍ଟି ନ ପଡିବ ବୋଲି ବହୁତ ଟିକା ଲଗାଇଲୁ କିନ୍ତୁ ଦୃଷ୍ଟିକୋଣ ବଦଳାଇବା ଟିକା ଲଗାଇବା ପାଳି ଆସିଛି । ଲିଙ୍ଗ ପ୍ରତି ରୂଢିବାଦ କୁ ଭାଙ୍ଗି ନାଲି ବିନ୍ଦି ସହ କିନ୍ନରଙ୍କୁ ସମର୍ଥନ କରିବା । ସମାନ ପ୍ରେମ ଓ ସମ୍ମାନ ପାଇଁ ଛିଡା ହେବା ।’
ଭିଡିଓରେ ଅକ୍ଷୟ କୁମାର କହିଛନ୍ତି, ‘ଏବେ ସୁଦ୍ଧା ଯାହା ଘଟିଛି ତାହା ଆମ ଭୁଲ । କିନ୍ତୁ ବର୍ତ୍ତମାନ ସମୟ ଆସିଛି ଆମକୁ ନିଜର ଦୃଷ୍ଟିକୋଣ ବଦଳାଇବାକୁ ହେବ । ଦୁନିଆକୁ ଖୁସି କରିବାକୁ ସବୁ ଦୁଃଖ ପିଇଯାଉ, କିନ୍ତୁ ଏବେ କିନ୍ନରଙ୍କୁ ଖୁସି ବାଣ୍ଟିବା । ଆମ ଖୁସିରେ ଏମାନେ ସବୁବେଳେ ଖୁସି ହୁଅନ୍ତି, ନାଚନ୍ତି । ଏବେ ଏମାନଙ୍କ ଖୁସିରେ ଆମେ ବି ନାଚିବା । ପିଲାଦିନୁ ଏମାନେ ଭେଦଭାବର ବୋଝ ଉଠେଇ ଆସୁଛନ୍ତି । କିନ୍ତୁ ବର୍ତ୍ତମାନ ସେମାନଙ୍କୁ ତାଙ୍କ ଅଧିକାର ଦେବା ପାଳି ଆମର । ସବୁ ଖୁସି ସମାରୋହରେ ଏମାନେ ହୃଦୟରୁ ଆଶୀର୍ବାଦ ଦେଇଛନ୍ତି । ତାଙ୍କ ମେହଫିଲ ସଜାଇବା ବର୍ତ୍ତମାନ ଆମ ଦାୟିତ୍ୱ । ସୀମାରେ ଲଢ଼ିବା ପାଇଁ ଏମାନେ ସବୁବେଳେ ପ୍ରସ୍ତୁତ, ତାଙ୍କୁ ମଉକା ଦେବା ପାଳି ବର୍ତ୍ତମାନ ଆମର । ଆମେ ବି ଭଗବାନଙ୍କ ସୃଷ୍ଟି, ଏମାନେ ବି ଭଗବାନଙ୍କ ସୃଷ୍ଟି । ତାହେଲେ ଏମାନଙ୍କୁ କାହିଁକି ଆପଣେଇବାନି । କିନ୍ନରଙ୍କୁ ଆପଣେଇବା, ସମ୍ମାନ ଦେବା ।’
