ସତ୍ୟଶିଖା (ନୂଆଦିଲ୍ଲୀ) ୨୪ /୧୨/୨୦୨୦ : ବୁଧବାର ଦିନ ସୁପ୍ରିମ୍ କୋର୍ଟର ପ୍ରଧାନ ବିଚାରପତି ଯାତ୍ରା କରୁଥିବା ଏୟାର୍ ଇଣ୍ଡିଆର ଏକ ବିମାନ ଉଡ଼ାଣ ଆରମ୍ଭ କରିବାର କେତେ ମିନିଟ୍ ପରେ ବୈଷୟିକ କାରଣରୁ ପୁଣି କୋଲ୍କାତା ବିମାନ ବନ୍ଦରକୁ ଫେରିଆସି ଜରୁରୀ ଅବତରଣ କରିଥିଲା । ବୁଧବାର ଦିନ ଭାରତର ପ୍ରଧାନ ବିଚାରପତି ଶରଦ ଅରବିନ୍ଦ ବୋବଡ଼େ ତ୍ରିପୁରା ହାଇକୋର୍ଟରେ ଏକ ଉତ୍ସବରେ ଯୋଗ ଦେଇ କୋଲକାତାରୁ ହାଇଦ୍ରାବାଦ ଅଭିମୁଖେ ଯାତ୍ରା କରୁଥିଲେ । ଜରୁରୀ ଅବତରଣ କରିଥିବା ବିମାନରେ ପ୍ରଧାନ ବିଚାରପତି ଅଛନ୍ତି ଏବଂ ଆଜି ସେ ହାଇଦ୍ରାବାଦ ଯିବେ ବୋଲି କୋଲ୍କାତା ବିମାନ ବନ୍ଦର ନିର୍ଦେଶକ ଗଣମାଧ୍ୟମକୁ ସୁନିଶ୍ଚିତ କରି କହିଥିଲେ । ସେ କହିଥିଲେ, ଗତକାଲି ଉଡ଼ାଣ ଆରମ୍ଭ କରିବା ପରେ ପରେ ଏୟାର୍ ଇଣ୍ଡିଆର କୋଲ୍କାତା-ହାଇଦ୍ରାବାଦ ବିମାନଟି ଫେରି ଆସିଥିଲା । ବୈଷୟିକ କାରଣରୁ ବିମାନଟି ଜରୁରୀ ଅବତରଣ କରିଥିବା କଥା ଘୋଷଣା କରାଯାଇଥିଲା । ସେ ଆଜି ହାଇଦ୍ରାବାଦ ଅଭିମୁଖେ ଯାତ୍ରା କରିବେ । ବୁଧବାର ଦିନ ଭାରତର ପ୍ରଧାନ ବିଚାରପତି ପଶ୍ଚିମବଙ୍ଗର ପଡ଼ୋଶୀ ରାଜ୍ୟ ତ୍ରିପୁରା ହାଇକୋର୍ଟରେ ‘ଇ-ସେବାକେନ୍ଦ୍ର’ ଉଦ୍ଘାଟନ କରିଥିଲେ ।
