ସତ୍ୟଶିଖା( ନୂଆଦିଲ୍ଲୀ )୨୪.୦୯ . ୨୦୨୨: ଅମିତାଭ ବଚ୍ଚନଙ୍କୁ ୭୯ ବର୍ଷରେ ବି ଫୁରସତ୍ ମିଳୁନାହିଁ । ଗୋଟିଏ ଚଳଚ୍ଚିତ୍ର ସୁଟିଂ ନ ସରୁଣୁ ଅନ୍ୟ ଗୋଟିଏରେ ସୁଯୋଗ ମିଳିଯାଉଛି । ସେ ମଧ୍ୟ ମନଖୁସିରେ କାମ କରିଚାଲିଛନ୍ତି । ବିଗ୍ ବିଙ୍କ କହିବା କଥା ହେଲା, ଯେଉଁ ପ୍ରଶଂସକଙ୍କ ପାଇଁ ଆଜି ସେ ଏତେ ଲୋକ ପ୍ରିୟତା ପାଇଛନ୍ତି, ସେମାନଙ୍କୁ ଶେଷ ପର୍ଯ୍ୟନ୍ତ ମନୋରଞ୍ଜନ କରିବେ ନିଶ୍ଚୟ । ନିକଟରେ କେବିସି କାର୍ଯ୍ୟକ୍ରମରେ ଜଣେ ବ୍ୟକ୍ତିଙ୍କ ସହ ଅମିତାଭ ଘର-ପରିବାର ବିଷୟରେ କଥା ହେଉଥିଲେ । ଘରେ ସବୁଠୁ ନାତୁଣୀ ଆରାଧ୍ୟା ଅଧିକ ଗେହ୍ଲୀ । ଦୁହେଁ ସପ୍ତାହ ଯାକ ବ୍ୟସ୍ତ ରୁହନ୍ତି । ଆରାଧ୍ୟା ସକାଳୁ ଉଠି ବିଦ୍ୟାଳୟ ଯାଏ, ତା’ପରେ ଘରକୁ ଆସି ପାଠପଢ଼ା । ଅନ୍ୟପାଖେ ଅମିତାଭ ଦିନ ତମାମ ସୁଟିଂରେ ବ୍ୟସ୍ତ ଥାନ୍ତି । ସେ ଘରକୁ ଫେରିଲାବେଳକୁ ଆରାଧ୍ୟା ଶୋଇପଡ଼ିଥାଏ ।
କେବଳ ରବିବାର ଦିନ ଜେଜେ ନାତୁଣୀ ମଉଜ କରନ୍ତି । ଚୁଲବୁଲୀ ଆରାଧ୍ୟା ରାଗିଗଲେ, ଅମିତାଭ ଚକୋଲେଟ ଦେଇ ବୁଝାନ୍ତି । ନାତୁଣୀଙ୍କୁ ସେ ପ୍ରତି ସପ୍ତାହରେ କିଛି ନା କିଛି ଉପହାର ଦିଅନ୍ତି । ଗୋଲାପି ରଙ୍ଗ ଆରାଧ୍ୟାର ପ୍ରିୟ ସେଥିପାଇଁ ବିଗ୍ ବି ସେହି ରଙ୍ଗର ପୋଷା. ବ୍ୟାଗ ଓ କ୍ଲିପ୍ କିଣିଦିଅନ୍ତି । ଛୁଟିଦିନରେ ଆରାଧ୍ୟା ନଥିଲେ, ତାଙ୍କୁ ଭାରି ବ୍ୟସ୍ତ ଲାଗେ ବୋଲି କହିଛନ୍ତି ଅମିତାଭ । ନାତୁଣୀ ସହ ଖେଳିଖେଳି କେମିତି ସକାଳରୁ ସଞ୍ଜ ହୋଇଯାଏ, ସେ ଜାଣିପାରନ୍ତିନି ।
