ସତ୍ୟଶିଖା (ଭୁବନେଶ୍ୱର) ୩୧/୧୨/୨୦୨୦ : ଜାନୁଆରି ମାସରେ ରାଜ୍ୟସାରା ସରକାରୀ ଅଫିସ୍ ସବୁ ଶନିବାର ବନ୍ଦ ରହିବ । ପୂର୍ବ ମାସ ପରି ଜାନୁଆରିରେ ବି ଭୁବନେଶ୍ୱର-କଟକରେ ୭୫% କର୍ମଚାରୀରେ ସରକାରୀ ଅଫିସ୍ ଚାଲିବ । ସମସ୍ତ ପ୍ରଶାସନିକ ବିଭାଗ ଓ ନିର୍ଦ୍ଦେଶାଳୟ ପାଇଁ ମଧ୍ୟ ଏହା ଲାଗୁ ହୋଇଛି । ଆଜି ଏ ସମ୍ପର୍କରେ ସାଧାରଣ ପ୍ରଶାସନ ବିଭାଗ ପକ୍ଷରୁ ବିଜ୍ଞପ୍ତି ଜାରି ହୋଇଛି ।
ରାଜ୍ୟରେ କୋଭିଡ୍ ସଂକ୍ରମଣ ନିୟନ୍ତ୍ରଣରେ ଅଛି ବୋଲି ସରକାର ଦାବି କରୁଥିଲା ବେଳେ ସବୁ ଶନିବାର ସରକାରୀ ଅଫିସ୍ ଛୁଟି ପଛରେ କି ଯୁକ୍ତି ରହିଛି, ତାହାକୁ ନେଇ ଚର୍ଚ୍ଚା ଜୋର୍ ଧରିଛି । ସେହିପରି କେବଳ ଭୁବନେଶ୍ୱର-କଟକରେ ୭୫% କର୍ମଚାରୀଙ୍କୁ ନେଇ କାହିଁକି ସରକାରୀ ଅଫିସ୍ ଚାଲିବ, ତାହାର କାରଣ ବି କେହି ଜାଣି ପାରୁ ନାହାନ୍ତି ।
ସାଧାରଣ ପ୍ରଶାସନ ବିଭାଗ ପକ୍ଷରୁ ଜାରି ବିଜ୍ଞପ୍ତି ଅନୁଯାୟୀ ପୁଲିସ୍, ଅଗ୍ନିଶମ, ସ୍ଵାସ୍ଥ୍ୟ ସେବା, ପୌର ସେବା ଆଦି ଅତ୍ୟାବଶ୍ୟକ ସେବା ଯୋଗାଉଥିବା କାର୍ଯ୍ୟାଳୟଗୁଡ଼ିକ ଶତ ପ୍ରତିଶତ କର୍ମଚାରୀରେ କାର୍ଯ୍ୟ କରିବେ । ସରକାରୀ କାର୍ଯ୍ୟାଳୟଗୁଡ଼ିକରେ ଯେପରି କୋଭିଡ୍ ସଂକ୍ରମଣ ନ ବ୍ୟାପେ, ତାହାକୁ ନଜରରେ ରଖି ପୂର୍ବରୁ ଜାରି ହୋଇଥିବା ଗାଇଡ୍ଲାଇନ୍କୁ ପାଳନ କରିବା ପାଇଁ କାର୍ଯ୍ୟାଳୟର ମୁଖ୍ୟମାନେ ପଦେକ୍ଷପ ନେବେ ।
ନୂଆ ବର୍ଷରେ ସରକାରୀ କାର୍ଯ୍ୟାଳୟଗୁଡ଼ିକରେ କର୍ମଚାରୀମାନେ ନିଜ ସହକର୍ମୀ ଓ ବରିଷ୍ଠମାନଙ୍କୁ ନୂଆ ବର୍ଷରେ ଶୁଭେଚ୍ଛା ଜଣାଇବା ପାଇଁ ଭିଡ଼ ନ କରିବାକୁ ସାଧାରଣ ପ୍ରଶାସନ ବିଭାଗ ପକ୍ଷରୁ ପରାମର୍ଶ ଦିଆଯାଇଛି । କୋଭିଡ୍ ସଂକ୍ରମଣ ରୋକିବାକୁ ଶାରୀରିକ ଦୂରତା ନିୟମ ଗୁରୁତ୍ୱପୂର୍ଣ୍ଣ ହୋଇଥିବାରୁ ତାହାକୁ ପାଳନ କରିବାକୁ କର୍ମଚାରୀମାନଙ୍କୁ କୁହାଯାଇଛି । ନୂଆ ବର୍ଷର ଶୁଭେଚ୍ଛା ଜଣାଇବା ପାଇଁ ଭର୍ଚୁଆଲ୍ ମାଧ୍ୟମକୁ ଆପଣାଇବା ପାଇଁ କୁହାଯାଇଛି ।
