ସତ୍ୟଶିଖା (କଟକ) ୦୨/୦୧/୨୦୨୧ : ଦୀର୍ଘ ୯ମାସ ପରେ ଖୋଲିଲା ଏସସିବି ଚକ୍ଷୁ ବିଭାଗ ଓଟି । ନୂଆବର୍ଷର ପ୍ରଥମ ଦିନରେ ଆଜି ୧୫ଟି ଅସ୍ତ୍ରୋପଚାର କରାଯାଇଛି । ଚକ୍ଷୁ ବିଭାଗ ତଥା ବର୍ହିବିଭାଗରେ କୋଭିଡ୍ ଆଇସୋଲେସନ୍ ସେଣ୍ଟର ଓ ଏବେ କୋଭିଡ୍ ହସ୍ପିଟାଲ କରାଯାଇଥିବାରୁ ଚକ୍ଷୁ ବିଭାଗ ଓଟିରେ ତାଲା ଝୁଲୁଥିଲା । ଯାହାଫଳରେ ଇଏନ୍ଟି ବିଭାଗ ଓଟିରେ ଚକ୍ଷୁ ବିଭାଗର ଛୋଟଛୋଟ ଅସ୍ତ୍ରୋପଚାର କରାଯାଉଥିଲା । କିନ୍ତୁ ମୋତିଆବିନ୍ଦୁ, ଗ୍ଲୁକୋମାଠାରୁ ଆରମ୍ଭ କରି ଅନ୍ୟସବୁ ବଡ ଅସ୍ତ୍ରୋପଚାର ବନ୍ଦ ରହିଥିଲା ।
କରୋନା ପାଇଁ ଏସ୍ସିବି ବର୍ହିବିଭାଗ ତଥା ଚକ୍ଷୁବିଭାଗ କୋଠାକୁ ଆଇସୋଲେସନ୍ ୱାର୍ଡରେ ପରିଣତ କରାଯାଇଥିଲା । ଫଳରେ ସେହି କୋଠାରେ ଥିବା ବର୍ହିବିଭାଗ, ଚକ୍ଷୁବିଭାଗକୁ ସ୍ଥାନାନ୍ତର କରାଯିବା ସହ ଚକ୍ଷୁ ବିଭାଗ ଓଟିରେ ତାଲା ପକାଇ ଦିଆଯାଇଥିଲା ।
ଯାଫଳରେ ମାର୍ଚ୍ଚ ଶେଷ ସପ୍ତାହରୁ ଏସ୍ସିବିରେ ଥିବା ପୂର୍ବଭାରତର ଏକମାତ୍ର ଆଂଚଳିକ ଚକ୍ଷୁ ପ୍ରତିଷ୍ଠାନ ଏକପ୍ରକାର ସ୍ଥାଣୁ ପାଲଟିଯାଇଥିଲା । କରୋନା ପ୍ରକୋପ କମୁଥିବାବେଳେ ଚକ୍ଷୁ ବିଭାଗ ଓଟିକୁ ଖୋଲାଯିବା ପାଇଁ ନିଷ୍ପତ୍ତି ନିଆଯାଇଥିଲା । ଫଳରେ ଏହାର ସଂପୂର୍ଣ୍ଣ ବିଶୋଧନ କରାଯିବା ସହ ଆଜି ପ୍ରଥମ ଥର ପାଇଁ ଓଟି ଆରମ୍ଭ ହୋଇଥିଲା । ପ୍ରଥମ ଦିନରେ ଲିଡ୍ ଟ୍ୟୁମର, ଟେରିଜିୟମ୍, ଇନ୍ଜୁରୀ ମରାମତିଠାରୁ ଆରମ୍ଭ କରି ବିଭିନ୍ନ ଅସ୍ତ୍ରୋପଚାର କରାଯାଇଛି । ଏଭଳି ଅସ୍ତ୍ରୋପଚାର ଏବେ ନିୟମିତ ଜାରି ରହିବ ବୋଲି ଜଣାପଡିଛି । ଏ ସଂପର୍କରେ ଚକ୍ଷୁ ବିଭାଗ ମୁଖ୍ୟ ପ୍ରଫେସର ଡାକ୍ତର ଶୁଭବ୍ରତା ପରିଡା କହିଛନ୍ତି ଯେ ଆଜି ୧୫ଟି ଅସ୍ତ୍ରୋପଚାର କରାଯାଇଥିବା ବେଳେ ସ୍ବାଭାବିକ ଭାବେ କାର୍ଯ୍ୟ ଆରମ୍ଭ ହୋଇଛି ।
