ଆଦିତ୍ୟ ଦାଶଙ୍କ ମୃତ୍ୟୁ ମାମଲା

ସତ୍ୟଶିଖା (କଟକ) ୫/୧୧/୨୦୨୦ : ସମାଜସେବୀ ଆଦିତ୍ୟ ଦାଶ ମୃତ୍ୟୁ ମାମଲାରେ ଇତିମଧ୍ୟରେ ୪ମାସରୁ ଅଧିକ ସମୟ ବିତିଗଲାଣି । କିନ୍ତୁ ବର୍ତ୍ତମାନ ପର୍ଯ୍ୟନ୍ତ ଏହା ହତ୍ୟା ନା ଆତ୍ମହତ୍ୟା ତାହା ସ୍ପଷ୍ଟ ହୋଇପାରିଲାନାହିଁ । ପ୍ରଥମେ ଜିଆର୍‌ପି , ପରେ କ୍ରାଇମବ୍ରାଞ୍ଚକୁ ତଦନ୍ତ ଭାର ଗଲା । କିନ୍ତୁ ସୁଫଳ ମିଳିନାନାହିଁ । ବରଂ ତଦନ୍ତ ସିଥିଳ ପଡିଯାଇଥିବା ଅନେକ ଅଭିଯୋଗ କରିଛନ୍ତି । ସେପଟେ ଆଦିତ୍ୟ ଦାଶଙ୍କ ରହସ୍ୟମୟ ମୃତ୍ୟୁ ଘଟଣାର ସିବିଆଇ ତଦନ୍ତ ଦାବି କରି ତାଙ୍କ ବାପା ନନ୍ଦି କିଶୋର ଦାଶ, ମା’ ପଦ୍ମାଳୟା ଦାଶ ଏବଂ ସ୍ତ୍ରୀ ବିଦ୍ୟାଶ୍ରୀ ସାହୁଙ୍କ ହାଇକୋର୍ଟରେ ମାମଲା ରୁଜୁ ହୋଇଥିଲା । ତେବେ ରୁଜୁ ମାମଲାରେ ହାଇକୋର୍ଟ କ୍ରାଇମ୍‌ବ୍ରାଞ୍ଚ୍‌କୁ ଏହାର ତଦନ୍ତ ସ୍ଥିତି ସଂକ୍ରାନ୍ତ ରିପୋର୍ଟ ଦାଖଲ କରିବା ଲାଗି ନିର୍ଦ୍ଦେଶ ଦେଇଛନ୍ତି ।ଖବର ଅନୁଯାୟୀ, ଆଦିତ୍ୟ ଦାଶ ମୃତ୍ୟୁ ମାମଲାରେ ପୂର୍ବରୁ ହାଇକୋର୍ଟ କ୍ରାଇମ୍‌ବ୍ରାଞ୍ଚ୍‌କୁ ରିପୋର୍ଟ ଦାଖଲ ପାଇଁ ନିର୍ଦ୍ଦେଶ ଦେଇଥିଲେ । କିନ୍ତୁ କ୍ରାଇମ୍‌ବ୍ରାଞ୍ଚ୍‌ ରିପୋର୍ଟ ଦାଖଲ କରିନପାରି ଅଦାଲତଙ୍କଠାରୁ ସମୟ ଲୋଡ଼ିଥିଲେ । ହାଇକୋର୍ଟର ବିଚାରପତି ଜଷ୍ଟିସ୍‌ ବିଶ୍ୱଜିତ୍‌ ମହାନ୍ତି ଦୁଇ ସପ୍ତାହ ପରେ ମାମଲାର ଶୁଣାଣି ପାଇଁ ସମୟ ଧାର୍ଯ୍ୟ କରିଛନ୍ତି । ଆଦିତ୍ୟ ଅନେକ ସମାଜସେବା କାର୍ଯ୍ୟରେ ନିୟୋଜିତ ଥିଲେ । ମଦ ବିରୋଧୀ ଆନ୍ଦୋଳନରେ ସେ ସକ୍ରିୟ ଭୂମିକା ଗ୍ରହଣ କରିଥିଲେ । ଏକ ବୃଦ୍ଧାଶ୍ରମ ମଧ୍ୟ ଚଳାଉଥିଲେ । କିନ୍ତୁ ବିବାହର ମାତ୍ର ୨୭ ଦିନ ପରେ ହଠାତ୍‌ ଆଦିତ୍ୟ କେଉଁଆଡ଼େ ଗାଏବ ହୋଇଯାଇଥିଲେ । ସ୍ତ୍ରୀ ବିଦ୍ୟାଶ୍ରୀ ଆଦିତ୍ୟଙ୍କୁ ଖୋଜିଖୋଜି ଲିଙ୍ଗରାଜ ଷ୍ଟେସନ୍‌ ରେଳଧାରଣାରେ ମୃତ ଅବସ୍ଥାରେ ପାଇଥିଲେ । ଆଦିତ୍ୟଙ୍କୁ ହତ୍ୟା କରାଯାଇ ଆତ୍ମହତ୍ୟାର ରୂପ ଦିଆଯାଇଛି ବୋଲି ପରିବାର ପକ୍ଷରୁ ଅଭିଯୋଗ କରାଯାଇଥିଲା ।

କ୍ରାଇମ୍‌ବ୍ରାଞ୍ଚ୍‌ ଘଟଣାର ତଦନ୍ତ କରୁଥିଲେ ମଧ୍ୟ ରହସ୍ୟ ପଦାକୁ ଆସିପାରି ନାହିଁ । ଯାହାଫଳରେ ପରିବାର ଲୋକେ  ହାଇକୋର୍ଟଙ୍କ ଦ୍ୱାରସ୍ଥ ହୋଇ ସିବିଆଇ ତଦନ୍ତ ପ୍ରାର୍ଥନା କରିଥିଲେ । ଆବେଦନକାରୀଙ୍କ ପକ୍ଷରୁ ଆଇନଜୀବୀ ବ୍ୟୋମକେଶ ତ୍ରିପାଠୀ ମାମଲା ପରିଚାଳନା କରୁଥିଲେ ।