ସତ୍ୟଶିଖା (ଭୁବନେଶ୍ୱର )୦୬ .୦୩.୨୦୨୧: ଦିନ ଦ୍ୱିପ୍ରହରରେ ରାଜଧାନୀ ରାଜରାସ୍ତାରେ ଜଣେ ଯୁବକଙ୍କୁ ହାଣିଦେଲେ ଦୁର୍ବୃତ୍ତ। ନୟାପଲ୍ଲୀ ଭିଆଇପି ଏରିଆରେ ଦିନ ଦ୍ୱିପ୍ରହରରେ ଜଣେ ପିକ୍ଅପ୍ ଭ୍ୟାନ୍ ଡ୍ରାଇଭରଙ୍କୁ ଗାଡ଼ି ଭିତରେ ହାଣିଲେ ଦୁର୍ବୃତ୍ତ। ଫଳରେ ଆକ୍ରମଣରେ ଯୁବକଙ୍କ ମୃତ୍ୟୁ ହୋଇଥିବା ଜଣାପଡ଼ିଛି। ଘଟଣା ପରେ ପୁଲିସ୍ ୨ ଯୁବକଙ୍କୁ ଅଟକ ରଖିଥିବା ବେଳେ ମୃତକଙ୍କ ପରିଚୟ ମିଳିପାରିନି। ପ୍ରତ୍ୟକ୍ଷଦର୍ଶୀଙ୍କ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ହତ୍ୟାକାରୀ ୨ ଜଣ ଓ ମୃତ ପିକ୍ଅପ୍ ଭ୍ୟାନ ଡ୍ରାଇଭର ଗୋଟିଏ ଗାଡ଼ିରେ ଥିଲେ । ଅଭିଯୁକ୍ତମାନେ ଛକ ପାଖରେ ମୃତକଙ୍କ ବେକକୁ ଭୁଜାଲି ଓ ଫାର୍ସାରେ ହାଣି ପକାଇଲେ । ଡ୍ରାଇଭରଙ୍କ ଚିତ୍କାର ଶୁଣି ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରିବା ସହ ୨ ଆକ୍ରମଣକାରୀ ଯୁବକଙ୍କୁ କାବୁ କରି ପୁଲିସ୍କୁ ହସ୍ତାନ୍ତର କରିଥିଲେ। ପୂର୍ବ ଶତ୍ରୁତାରୁ ଏହି ହତ୍ୟାକାଣ୍ଡ ହୋଇଥିବା ଅନୁମାନ କରାଯାଉଛି । ଗୁରୁତର ଡ୍ରାଇଭରଙ୍କ ମେଡିକାଲରେ ଭର୍ତ୍ତି କରାଯାଇଥିବା ବେଳେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଘଟଣାସ୍ଥଳରେ ଡିସିପିଙ୍କ ସମେତ ବରିଷ୍ଠ ଅଧିକାରୀ ଘଟଣାସ୍ଥଳରେ ପହଞ୍ଚିଛନ୍ତି। ରାଜଧାନୀ ରାଜରାସ୍ତାରେ ଏପରି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଛି। ତେବେ ଆକ୍ରମଣର ଶିକାର ହୋଇଥିବା ଯୁବକ ଓ ଆକ୍ରମଣକାରୀଙ୍କ ମଧ୍ୟରେ କ’ଣ ସମ୍ପର୍କ ତାହା ସ୍ପଷ୍ଟ ହୋଇପାରିନାହିଁ। ଆକ୍ରମଣକାରୀ ସ୍ଥାନୀୟ ଅଞ୍ଚଳର ନା ବାହାରର ତାହା ମଧ୍ୟ ଜଣାପଡ଼ିନି। ସୂଚନାଯୋଗ୍ୟ, କିଛି ମାସ ପୂର୍ବେ ସାମନ୍ତରାପୁରରେ ଏପରି ସମାନ ଘଟଣା ଦେଖିବାକୁ ମିଳିଥିଲା। ଜଣେ ବ୍ୟକ୍ତିଙ୍କୁ କେତେକ ଦୁର୍ବୃତ୍ତ ଗୋଡ଼ାଇ ଗୋଡ଼ାଇ ହତ୍ୟା କରିଥିଲେ। ଏବେ ପୁଣି ଥରେ ଏପରି ଘଟଣା ଘଟିବାରୁ ରାଜଧାନୀରେ ସ୍ଥାନୀୟ ଲୋକ କେତେ ସୁରକ୍ଷିତ ତାହା ପ୍ରଶ୍ଚବାଚୀ ସୃଷ୍ଟି କରିଛି।
